फिलेमोन 1
1
1येशू ख्रीष्टक बारेम खुशीक खबर प्रचार कर्लक कारण कैदम परल मै पावल ओ हमार विश्वासी भैया तिमोथी यी चिठी लिखटी। यी चिठी हमारअस काम करुइया प्रिय फिलेमोनक लाग, 2ओ हुँकहार घरम भेला हुइना मण्डली, हमार विश्वासी बहिन्या अप्फिया, ओ हमारअस परमेश्वरक सेवा करुइया अर्खिप्पसक लाग फे हो।#कल ४:१७ 3हमार परमेश्वर बाबा ओ प्रभु येशू ख्रीष्ट टुँहन अनुग्रह ओ शान्ति देहीँ।
फिलेमोनक प्रेम ओ विश्वास
4मै प्रार्थना करबेर टुँहीन समझ्क आपन परमेश्वरह सड्ड धन्यवाद देठुँ, 5काकरकि टुँ प्रभु येशूम विश्वास कर्लबाटो ओ परमेश्वरक मनैन प्रेम फे कर्लबाटो कना बात मै सुन्ठुँ। 6हमन देगैल् सब असल चिजिक बुझाइसे ख्रीष्टम विश्वासीहुँकनसे रहल टुँहार सङ्गति बलगर हुइटीजाए कना म्वार प्रार्थना बा। 7हेरो भाइ, टुँ औरजहन प्रेम कर्लक बात सुन्क मै धेर आनन्द ओ उत्साह पारख्नु, काकरकि टुँ परमेश्वरक मनैन्हक मन ताजा बनादेरख्लो।
ओनेसिमसक लाग बिन्ती
8टुँ का करपर्ठा कैक मै ख्रीष्टक प्रेरितक रूपम टुँहीन आज्ञा देना साहस रलसे फे, 9हमार प्रेमक कारणले मै टुँहीन अनुरोध करटुँ, मै उमेर ढल्कल् पावल ओ आब ख्रीष्ट येशूक एकठो कैदी, 10म्वार छावा ओनेसिमसक लाग मै टुँहीनसे अनुरोध करटुँ। मै कैदम रहल समयम जो हुँकहार आत्मिक बाबा होरनु।#कल ४:९ 11हुइना त ऊ टुँहार लाग बिनकामक होरलह, तर आब टुँहार लाग ओ म्वार लाग फे काम लग्ना होरल। 12मै हुँकहीन फेदोस्र टुँहारठे पठाइटुँ। ऊ म्वार मुटुक टुक्राअसक हुइट। 13खुशीक खबरक कारण मै कैदी रहल समयम ऊ टुँहार सटाहा म्वार हेरविचार कर सेक्नेरलह कैक मै हुँकहीन आपनसँग ढर चाहलरनहुँ 14तर टुँहार मञ्जुरी बिना ओसिक कैडर्ना महीह ठीक नैलागल, काकरकि टुँ करकापले नाहीँ तर स्वइच्छाले सहायता करल मै चहठुँ।
15ऊ सड्डभर टुँहारसँग पलरहीँ कैक सायद ऊ कुछ समयक लाग टुँहीनसे अल्ग होरलह। 16आब ऊ टुँहार कमारा केल नैहुइट, तर कमारासे धेर मूल्यवान हुइट, काकरकि ऊ टुँहार लाग प्रिय भैया हुइट। ऊ म्वार लाग धेर प्रिय हुइट, तर आब टुँहार लाग उ, व्यक्तिक रूपम ओ एकठो विश्वासी भैयक रूपम दुनु, झन् प्रिय हुइहीँ। 17उहओर्से, यदि टुँ महीह आपनसँग-सँग काम करुइया मन्ठो कलसे, महीह स्वीकार करअस हुँकहीन फेदोस्र स्वीकार करो। 18यदि ऊ टुँहार कुछु बिगारऽ कैरख्ल या टुँहीन कुछु तिरहीपर्ना बाटन कलसे फे, उ तिर्ना म्वार जिम्मा होगैल्। 19मै तिरदेहम कैक मै पावल आपनऽ हाँठले लिखटुँ। टुँ म्वार कारणले आत्मिक जीवन पाक टुँ म्वार ऋणी होरलो कना बात मै टुँहीन कटीरह नैपरी। 20उहओर्से, हेरो भाइ, हम्र प्रभुक मनै हुइलकओर्से महीह यी दया देखाओ, ओ ख्रीष्टियन भैयक नाताले म्वार मनह ताजा बनादेओ। 21टुँहार आज्ञापालनम महीह पूरा विश्वास बा, कि टुँ म्वार कहलसे धेर करुइयाबाटो कना बात जान्क मै टुँहीन यी चिठी लिखटुँ।
22एकठो और बात, म्वार लाग एकठो बैठ्ना क्वाठा ठीकठाक पारदेओ, काकरकि टुन्हक प्रार्थनक कारण मै टुन्हकठे फेदोस्र जाइपैम कना आशा कर्लबाटुँ।
चिठीक अन्तिम भाग
23ख्रीष्ट येशूक सेवा कर्लक कारण म्वारसँग कैदी हुइलक इपाफ्रास टुँहन अभिवादन पठारख्ल।#कल १:७; ४:१२ 24म्वार सँगसँग काम करुइयन मर्कूस, अरिस्तार्खस, डेमास ओ लूका फे अभिवादन पठारख्ल।#प्रे १२:१२,२५; १३:१३; १५:३७-३९; १९:२९; २७:२; कल ४:१०,१४; २ तिमो ४:१०-११
25प्रभु येशू ख्रीष्टक अनुग्रह टुन्हकसँग पलरह।
Zur Zeit ausgewählt:
फिलेमोन 1: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.