हिब्रू 1
1
ख्रीष्ट त परमेश्वरक सक्कली रूप हुइट
1अघट्टेक समयम परमेश्वर हमार पुर्खनसे अगमवक्ताओँद्वारा धेर फ्यारा धेर किसिमले बोल्ल। 2तर यी आखिरी दिनम उहाँ आपन छावाद्वारा हमनसे बोलरख्ल। उहाँ सब चिजिक हकवाला हुइक लाग आपन छावह जो रोज्ल, ओ सारा चिजिक सृष्टि फे उहाँद्वारा जो कर्ल। 3परमेश्वरक महिमा उहाँकम चम्कठन। उहाँ जो परमेश्वरक सक्कली रूप हुइट। उहाँक शक्तिशाली वचनद्वारा जो सारा आकाश ओ पृथ्वी अर्याइल बा। उहाँ मनैन पापमसे शुद्ध हुइना बन्दोबस्त मिलाक सर्वोच्च परमेश्वरक दाहिन पाञ्जर बैठ्ल।
ख्रीष्ट त स्वर्गदूतनसे फे महान् बाट
4परमेश्वर उहाँह स्वर्गदूतनसे फे उच्च नाउँ देलन। यी बातले का देखैठा कलसे छावा त स्वर्गदूतहुँकनसे धेर महान् बाट। 5परमेश्वर आपन छावह कल,
“टुँ म्वार छावा हुइटो,
आज मै टुँहार बाबा हुइनु।”
उहाँ यी बात कौनो स्वर्गदूतह कबु फे नैकल। उहाँ आपन छावक बारेम असिक फे कल,
“मै हुँकहार बाबा हुइबुँ,
ऊ म्वार छावा हुइहीँ।”#भज २:७; २ शमू ७:१४; १ इति १७:१३
6परमेश्वर आपन सर्वोच्च छावह संसारम पठाइबेर कल,
“परमेश्वरक सारा स्वर्गदूतहुँक्र हुँकहीन जो दण्डवत करपर्ठा।”#व्य ३२:४३
7स्वर्गदूतन्हक बारेम उहाँ कल,
“परमेश्वर आपन स्वर्गदूतहुँकन बतासअस
ओ आपन दासहुँकन आगीक लहरअस बनैठ।”#भज १०४:४
8तर छावक बारेमजुन उहाँ कल,
“हे परमेश्वर, अप्नक राज्य सड्डभर पलरहुइयाबा,
ओ अप्न धार्मिक हिसाबले शासन कर्ठी।
9अप्न असल कामह मन परैठी,
ओ खराब कामह घिन मन्ठी।
उहओर्से परमेश्वर, अप्नक परमेश्वर अप्नह रोज्ल,
ओ अप्नक सङ्घारीनसे त कत्रा हो कत्रा धेर
सम्मान कैक आनन्दले अप्नह भरिपूर्ण बनारख्ल।”#भज ४५:६-७
10परमेश्वर यी फे कल,
“हे परमप्रभु, अप्न सुरुम पृथ्वीक जग बैठैली,
ओ आपन हाँठले सारा आकाश बनैली।
11सृष्टि त नाश होजउइया बा,
तर अप्न सड्डभर पलरबी।
सृष्टि त पुरान लुगाअस फाटजउइयाबा,
12अप्न पुरान चोँट्यह गुटमुटाइअस सृष्टिह गुटमुटैठी,
उ त लुगाअस फेरजउइयाबा।
तर अप्न त सड्डभर एकनास पलरठी,
ओ अप्नक उमेर कबु फे नैबितुइया हो।”#भज १०२:२५-२७
13परमेश्वर कौनो स्वर्गदूतह असिक कबु नैकल,
“म्वार दाहिन पाञ्जर बैठो,
जबसम मै टुँहार शत्रुन हराक
टुँहार पौलीक पाउदान नैबनैम।”#भज ११०:१
14स्वर्गदूतहुँक्र त परमेश्वरक सेवा कर्ना आत्माहुँक्र हुइट। परमेश्वर हुँकन मुक्ति पैना मनैन सहायता करक लाग पठैठ।
Zur Zeit ausgewählt:
हिब्रू 1: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.