हिब्रू 13
13
अन्तिम अर्ती
1एक-दोसरजहन आपन मनै मान्क प्रेम कर्टिरहो। 2परदेशी मैनन आपन घरम बलाक मानमर्जाट् कर जिन बिस्राओ, काकरकि कौनो-कौनोजन असिक करबेर थाहँ नैपाक स्वर्गदूतन्हक मानमर्जाट् कैरख्ल।#उत १८:१-८; १९:१-३
3अपन्हे फे थुन्वापाइल समझ्क थुन्वापाइल मनैन्हक वास्ता करो। दुःख पाइल मनैन अपन्हे दुःख पाइलअस सम्झो।
4सबजन्हक बीचम वैवाहिक जीवन आदरणीय ह्वाए, वैवाहिक सम्बन्ध बिट्वालल् जिन ह्वाए। काकरकि वैवाहिक सम्बन्ध बिटोलुइयन ओ व्यभिचारीहुँकन परमेश्वर दण्ड देहुइयाबाट।
5टुह्र रूप्या-पैँसक मोहसे दूर रहो। टुन्हकठे ज्या बा उहिँम सन्तुष्ट रहो, काकरकि परमेश्वर कैरख्ल, “मै कौनो हालतम फे टुँहन छोरुइया नैहुइटुँ, ओ टुन्हकठेसे दूर जउइया नैहुइटुँ।”#व्य ३१:६,८; यहो १:५ 6उहओर्से हम्र निर्धक्क होक कहसेक्ठी,
“प्रभु महीह सहायता करुइयाबाट।
मै डरुइया नैहुइटुँ।
मनै महीह का कर सेकहीँ जे?”#भज ११८:६
7टुँहन सुरुम परमेश्वरक वचन सिखाइल अगुवन जिन बिस्रैहो। हुँकन्हक जीवनशैलीमसे आइल असल परिणाम विचार करो, ओ परमेश्वरम हुँकन्हकअस भरोसा करो। 8येशू ख्रीष्ट काल, आज ओ सड्डभर एकसमान बाट।
9धेर किसिमक अनौठो शिक्षक भ्रमम जिन परो। खानपिनक विधिद्वारा नाही, तर परमेश्वरक अनुग्रहद्वारा हृदय मजबूत हुइल् मजा हो। खानपिनक विधि किहुह फाइदा नैपुगैल हो। 10ख्रीष्टक बलि चह्राइल हमार एकठो वेदी बा, जौन वेदीम सहभागी हुइना अधिकार हुँकन नैहुइटन, जे मोशक व्यवस्था मान्क पवित्र पालम सेवा कर्ठ।
11प्रधान पूजारी महापवित्रस्थानम पापक लाग बलि चह्राइल पशुन्हक रगत लेक जैठ। तर बलि चह्राइल पशुन्हक शरीर बस्तीसे बाहर लैजाक जरैठ।#लेवी १६:२७ 12ओस्तहँक येशू फे आपन रगतले मनैन पवित्र बनाइक लाग सहरसे बाहर दुःख भोग्ल। 13उहओर्से हम्र फे बस्तीसे बाहर उहाँकठे जाई ओ उहाँक सहल अपमान हम्र फे सही। 14काकरकि हमार लाग यी संसारम सड्डभर रना कौनो सहर नैहो। हम्र त पाछ अइना सहरक बट्या हेर्क बैठल बाटी।
15उहओर्से येशूक माध्यमद्वारा परमेश्वरह प्रशंसक बलि निरन्तर चढैटीरही। उहाँ जो हमार प्रभु हुइट कैक स्वीकार कर्टी हमार मुहमसे निक्रल् प्रशंसा जो हमार चह्राइल भेटी हो। 16एक-औरजहन भलाइ कर ओ आपनठे रहल चिज बाँचचूँड कर जिन बिस्राओ, काकरकि अस्तह बलिले परमेश्वर खुशी हुइठ।
17टुह्र अगुवन्हक आज्ञापालन करो ओ हुँकन्हक अधीनम बैठो। आपन कामक लेखा परमेश्वरह देहपर्ठा कैक हुँक्र टुन्हक आत्मक रेखदेख कर्ठ। हुँकन्हक कहल मन्बो त हुँक्र आपन काम खुशी होक करहीँ, नकि त दुःखी होक करहीँ, ओ उ बातले टुँहन कुछु फाइदा नैहुइनेहो।
18हमार लाग प्रार्थना कर जिन छोरो। हम्र निश्चित बाटी कि हमार मन शुद्ध बा, ओ हम्र सब काम ईमान्दारसे केल कर चहठी। 19मै फेदोस्र टुन्हकठे झट्ट आइसेकु कैक म्वार लाग प्रार्थना कैदेओ। टुँहनसे यी म्वार विशेष आग्रह हो।
20भेँरीन्हक महान गोठाला हमार प्रभु येशू त आपन रगत बहाक अनन्त कालसम्मक लाग लौव बाचा स्थापित कर्ल। उह बहागैल् रगतक आधारम परमेश्वर उहाँह मुवलमसे फेदोस्र जीवित बनैल। 21आब टुह्र उहाँक इच्छा पूरा कर सेको कैक शान्ति देना परमेश्वर टुँहन हरेक असल गुणले सम्पन्न बनैहीँ। ओ टुन्हकम उहाँह मनपर्ना बात ह्वाए कैक उहाँ येशू ख्रीष्टद्वारा टुन्हकम काम करहीँ। सड्डभर येशू ख्रीष्टक महिमा ह्वाए। आमेन।
22भैयौ, टुह्र यी उत्साहक उपदेश बिना झर्कल मानदेहो कना म्वार बिन्ती बा, काकरकि मै टुँहन छोटकरीम लिखरख्नु। 23हमार भैया तिमोथी जेलमसे छुटरल कना खबर मै टुँहन देह चाहटुँ। ऊ झट्ट यिहाँ अइहीँ कलसे मै हुँकहीन लेक टुन्हकठे अइनेबाटुँ।
24मण्डलीक सब अगुवन ओ परमेश्वरक भक्तहुँकन हमार अभिवादन सुनादेहो। इटालिया देशम रहल भाइहुँक्र फे टुँहन अभिवादन पठारख्ल।
25परमेश्वरक अनुग्रह टुह्र सबजन्हकसँग पलरह।
Zur Zeit ausgewählt:
हिब्रू 13: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.