एफिसी 4
4
ख्रीष्टक शरीरम एकता
1उहओर्से प्रभुक लाग मै कैदी बाटुँ, ओ टुँहनसे बिन्ती करटुँ, परमेश्वर टुँहन बलैलकओर्से उहाँक बोलावट अनुसारक जीवन जिओ। 2सड्डभर नम्र, स्वाझ मनक ओ सहनशील होओ। एक-औरजहन सह्क प्रेम देखाओ।#कल ३:१२-१३ 3पवित्र आत्मा जो टुँहन मेलमिलापम अन्लह। आब उ एकताह स्याकलसम जोगैलरहो। 4टुह्र सबजन एकठो शरीरक अङ्ग हुइटो ओ पवित्र आत्मा फे एकठो बाट। टुह्र एकठो आशम बोलावट पारख्लो। 5एकठो प्रभु, एकठो विश्वास ओ एकठो बप्तिस्मा बा। 6सबजन्हक परमेश्वर ओ बाबा एकठो बाट। उहाँ सबजन्हक प्रभु हुइट, सब मनैद्वारा काम कर्ठ ओ सबजन्हकम बाट।
7तर अनुग्रहक वरदान त ख्रीष्ट सबजहन आपन हिसाबले देरख्ल। 8धर्मशास्त्रम लिखल बा,
“उहाँ उच्चम जाइबेर
धेर कैदीहुँकन आपनसँग लैगिल
ओ मनैन वरदान देल।”#भज ६८:१८
9उहाँ उच्चम गैल कलक का हो? यी बातले उहाँ यी धर्तीक गहिराईम गैल कना बात बुझ्जैठा। 10सारा विश्वम आपन शक्ति भरपूर पारक लाग, यी धर्तीक गहिराईम जे गैल, उहाँ जो सारा स्वर्गसे फे उच्चम गैल। 11उहाँ अपन्हे कौनोजहन प्रेरित, कौनोजहन अगमवक्ता, कौनोजहन प्रचारक, कौनोजहन मण्डलीक पाष्टर ओ कौनोजहन शिक्षक हुइना वरदान देल। 12सब पवित्र जनहुँकन उहाँक काम कर सेक्ना बनाइक लाग ओ ख्रीष्टक शरीर अर्थात् मण्डलीक उन्नति करक लाग यी वरदान देगैल् हो। 13यी वरदानक कामले हमन विश्वासक एकतम आनक लाग ओ परमेश्वरक छावक ज्ञानम हमन बहर्टी जाइक लाग सहायता देटीरठा ओ एक दिन हम्र परिपक्व हुइबी ओ ख्रीष्टक पूरा नापसम पुग्बी। 14धूर्त मनैन्हक विभिन्न शिक्षक बतासले जहोँर लैगिलसे फे उहँरे जाजैना हम्र छोटी लर्काअस नैहुइटी। हुँकन्हक सिर्जाइल झूटा शिक्षा औरजहन गलत डगरिम लैजिठा। 15प्रेमम सत्य बोल्टी सब बातम हम्र आपन शिर ख्रीष्टअस बृद्धि हुइटी जाई। 16उहाँक अधीनम सारा शरीरक हरेक अङ्ग ठीक-ठीक ठाउँम जोरगैल् बा। एक-एक अङ्ग आपन करपर्ना काम करल कलसे पूरा शरीर प्रेमम बहर्टीजैठा।
ख्रीष्टम लौव जीवन
17आब मै प्रभुक नाउँम शिक्षा देटी कहटुँ, टुन्हक चालचलन परमेश्वरह नैचिन्ह्ना मनैन्हकअस जिन ह्वाए। हुँकन्हक विचार त काम नैलग्टन। 18हुँकन्हक समझ अन्धकारले छोपगैल् बाटन। हुँक्र परमेश्वरक देना जीवनसे दूर बाट काकरकि हुँकन्हक हृदय कुछु नैजन्ना ओ कठोर बाटन। 19हुँकन्हक त लाज फे पचरलन ओ हर किसिमक फुहर कामम आपन जीवन समर्पण कैरख्ल।
20तर टुह्र त ख्रीष्टक शिक्षासे असिन बात नैसिख्लो। 21टुह्र उहाँक शिक्षा सुन्क उहाँक चेला हुइलकओर्से येशूक बारेम सत्य बात सिख्लो। 22पुरान हिसाबले जिना टुन्हक पैल्हक चालचलन छोरदेओ। टुन्हक पुरान जीवन आपन खराब इच्छक कारणले नष्ट हुइटह।#कल २:१९ 23टुह्र आपन सोचविचार ओ चालचलनम लौव होओ। 24टुह्र लौव स्वभाव पाइपर्ठा। टुह्र परमेश्वरकअस हुइक लाग उहाँक स्वरूपम बनागैल् हुइटो, आब टुन्हक स्वभाव धार्मिक ओ पवित्र हुइपर्ठा।#उत १:२६; कल ३:१०
25उहओर्से लभर्ना बान छोरदेओ। एक-औरजहनसे सत्य बोलो काकरकि हम्र सबजन ख्रीष्टक शरीरम एक-औरजन्हक अङ्ग हुइटी।#जक ८:१६ 26रिसक झ्वाँकम पाप काम जिन करहो। सन्झ्या हुइनासे आघहेँ आपन रिसह मुवादेहो।#भज ४:४ 27शैतानह मौका छ्वाप जिन देहो। 28चोर्ना मनै आबठेसे च्वार काम छोर्क परिश्रम करपर्ठा। ऊ आपन हाँठले इमानदार होक कमैना ओ खाँचोम परल मनैन सहायता देना हुइपर्ठा।
29फुहर बोली जिन बोलो। आवश्यक, भलाइ हुइना, मीठ वचन बोलो ओ टुन्हक बात सुन्ना मनै उत्साह पैहीँ। 30परमेश्वरक पवित्र आत्मह दुःखी जिन बनाओ, काकरकि छुट्कारक दिनिक लाग टुह्र छाप लगागैल् बाटो। 31मनम ईबी लेना, झैझग्रा ओ रिसराग त्यागदेओ। अपमान कर्ना बोली बोल्बो-बोल्बो जिन करो, सब किसिमक दुश्मनी त्यागदेओ। 32बेनसे एक-औरजहन दया देखाओ। ख्रीष्टम परमेश्वर टुँहन क्षमा देहलअस टुह्र फे एक-औरजहन क्षमा देओ।#कल ३:१३
Zur Zeit ausgewählt:
एफिसी 4: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
