एफिसी 2
2
पुरान ओ लौव जीवन
1आपन अट्टेरीपन ओ पापक कारण टुह्र आत्मिक रूपले मुवल रलहो। 2उ ब्याला टुह्र संसारक पापी चालम चलो। टुह्र आकाशक शक्तिक मालिकह आदर करो। ऊ त परमेश्वरक आदर नैकर्ना मनैन आब आपन अधीनम पर्लबा। 3हम्र फे सबजन पैल्ह हुँकन्हकअस रलही ओ आपन शरीरक इच्छम लागल रलही ओ आपन शरीरक ओ मनक इच्छालागल बातम चली। हमार आपन पापी स्वभावक हिसाबले औरजन्हकअस हमारम फे परमेश्वरक रिस परपर्ना रह। 4तर परमेश्वर हमन धेर प्रेम कर्ल ओ हमन महान दया देखैल। 5हम्र अटेर कैक आत्मिक रूपले मुवल रलसे फे उहाँ ख्रीष्टकसँग हमन फेदोस्र जियादेल। टुह्र मुक्ति पैलक फे परमेश्वरक अनुग्रहले हो।#कल २:१३ 6हम्र येशू ख्रीष्टम रलकओर्से उहाँकसँग परमेश्वर हमन फे जीवित बनैल ओ उहाँकसँग स्वर्गीय ठाउँम राज्य कर देल। 7यी सब उहाँ सड्डभरिक लाग आपन अनुग्रह देखाइक लाग कर्ल। यी अनुग्रह उहाँ हमन ख्रीष्ट येशूम देखारख्ल। 8परमेश्वरक अनुग्रहले टुह्र विश्वासद्वारा मुक्ति पैलहो। टुह्र आपन शक्तिले फे मुक्ति पैलक नैहुइटो, यी त परमेश्वरक वरदान हो। 9यी टुन्हक कोसिसले हुइल् नैहो, उहओर्से घमण्ड कर्ना ठाउँ नैहो। 10काकरकि हम्र उहाँक सृष्टि हुइटी। हमार जीवनमसे असल काम ह्वाए कैक उहाँ हमन ख्रीष्ट येशूम सृष्टि कर्ल। हम्र उ असल काम करी कैक परमेश्वर पैल्हहेँ तयार कर्ल।
ख्रीष्टम सबजन एक
11उहओर्से एक समयम टुह्र कसिन रलहो उ बात सम्झो ना। शरीरक अङ्गम हाँठले खतना कर्ना इस्राएलीहुँक्र अपन्हेहभर शरीरम खतना करल ओ टुँहनजुन खतना नैकरल गैरयहूदी कहँट्। 12उ ब्याला टुह्र ख्रीष्टसे अलग रलहो। टुह्र त परमेश्वरक र्वाजल जाति इस्राएलीनसे सम्बन्ध नैरहल विदेशी रलहो। परमेश्वर प्रतिज्ञा कैक मिलाप कराइल बाचम टुन्हक स्थान नैरह ओ संसारम टुह्र बिना आशक ओ बिना परमेश्वरक रलहो। 13तर ख्रीष्टक रगतक कारण टुन्हक मेलमिलाप होरहल।
14काकरकि उहाँ आपन रगत बहाक हमन परमेश्वरक सामुन्नेम अन्ल। आपन शरीर बलिदान देक उहाँ हमन अल्गैना दुश्मनीक पर्खाल भत्कादेल। 15उहाँ यहूदी ओ गैरयहूदी जातिक मनैन शान्ति देहक लाग ओ उहाँम लौव जाति बनाइक लाग आपन शरीरम व्यवस्था ओ रीतिथितिह खारिज कैदेल।#कल २:१४ 16दुश्मनी नाश करक लाग ओ हमन एक्क जाति बनाक परमेश्वरसे मेलमिलाप कराइक लाग उहाँ क्रूसम बलिदान हुइल।#कल १:२० 17उहाँ आक परमेश्वरक लग्घ ओ दूर रहल दुनु जातिक मनैन मेलमिलाप कराइक लाग खुशीक खबर सुनैल।#यशै ५७:१९ 18उहाँक कारण हम्र दुनु जातिक मनै एक्क पवित्र आत्मा पैली ओ परमेश्वर बाबक सामुन्नेम जाइसेक्ना होरली।
19उहओर्से टुह्र आब परदेशी ओ विदेशी नैहुइटो। टुह्र त परमेश्वरक जातिसे सह-नागरिक होरलो ओ परमेश्वरक घरक मनै होरलो। 20प्रेरितन्हक ओ अगमवक्तन्हक बैठाइल जगम बनल घर टुह्र हुइटो, ओ यी जगक मुख्य पत्थ्रा ख्रीष्ट येशू हुइट। 21उहाँ सारा घरह ठम्ह्लबाट ओ उहाँ यी घरह प्रभुम अर्पण कैगिल् बहर्टी जैना एक पवित्र मन्दिर बनुइयाबाट। 22टुह्र फे उहाँम औरजन्हक सँगसँग उ घर बन्टीबाटो जहाँ परमेश्वर आपन पवित्र आत्माद्वारा बास कर्ठ।
Zur Zeit ausgewählt:
एफिसी 2: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
