प्रेरित 15
15
यरूशलेमक सभा
1तब यहूदिया क्षेत्रसे कुछ मनै अइल ओ विश्वासीहुँकन असिक सिखाइलग्ल, “यदि टुह्र मोशक व्यवस्थक रीत अनुसार खतना नैकर्ना हो कलसे, टुह्र मुक्ति पाइ नैसेक्नेहुइटो।”#लेवी १२:३ 2यी बातम पावल ओ बारनाबासक हुँकनसे चर्काचर्की पर्लन। अन्तम, उहाँक विश्वासीहुँक्र यी विषयम प्रेरितहुँकनसे ओ एल्डरहुँकनसे बात बट्वाक टुङ्गो लगाइक लाग पावल, बारनाबास ओ कुछ और विश्वासीन यरूशलेमम पठैना निर्णय कर्ल। 3मण्डलीक सदस्यहुँक्र हुँकन उहाँसे बिदा देक पठैल। हुँक्र फोनिके ओ सामरिया क्षेत्र हुइटी जाइबेर ठाउँ-ठाउँम रहल विश्वासीहुँकन गैरयहूदीहुँक्र फे प्रभु येशूम विश्वास कैरख्ल कना बात सुनैटी गैल। यी सुन्क उहाँक विश्वासीहुँक्र धेर आनन्दित हुइल। 4पावल ओ बारनाबास यरूशलेमम आपुग्ल त, उहाँ रहल प्रेरितहुँक्र, एल्डरहुँक्र लगायत मण्डलीक सारा सदस्यहुँक्र हुँकन स्वागत कर्ल। तब पावल ओ बारनाबास परमेश्वर हुँकन प्रयोग कैक करल सारा कामक बारेम उहाँ जम्मा हुइल् सबजहन सुनैल।
5तब फरिसी समूहसे कुछ विश्वासीहुँक्र ठह्रेइल ओ कल, “गैरयहूदी विश्वासीहुँक्र फे खतना सहित मोशक व्यवस्था सब पालन करपर्ठा।”
6यी विषयम सोचविचार करक लाग प्रेरितहुँक्र ओ एल्डरहुँक्र जम्मा हुइल। 7सभम धेर वादविवाद हुइलन। तब पत्रुस उठ्क हुँकन सम्बोधन कर्ल, “हेरो भैयौ, टुँहन थाहँ बा, कि गैरयहूदीहुँक्र फे खुशीक खबर सुनहीँ ओ विश्वास कर सेकहीँ कैक परमेश्वर महीह टुन्हक्के बीचमसे धेर वर्ष आघ रोज्लह।#प्रे १०:१-४३ 8मनैन्हक मनक विचार जन्ना परमेश्वर हमन देहलअस गैरयहूदीहुँकन फे पवित्र आत्मा देक हुँकन स्वीकार कर्ल कना बात हुँकन देखारख्ल।#प्रे २:४; १०:४४ 9उहाँ यहूदी ओ गैरयहूदीन्हक बीचम कुछु भेदभाव नैकर्ल। गैरयहूदीहुँक्र विश्वास कर्ल ओ परमेश्वर हुँकन्हक मन शुद्ध पर्ल। 10धर्मकर्मक जुवा ना हमार पुर्खाओँ ब्वाक सेक्ल, ना हम्र सेक्ली। उहओर्से यी जुवा गैरयहूदीहुँकन ब्वाक लगाक काजे परमेश्वरह रिस लगैना? 11हमार विश्वास का हो कलसे, हम्र, हुँकन्हकअस, प्रभु येशूक अनुग्रहले मुक्ति पारख्ली।”
12परमेश्वर बारनाबास ओ पावलह चिन्ह देखैना ओ अचम्म-अचम्मक काम कर्ना शक्ति देलक बात हुँक्र बयान करबेर, सारा सभक मनै चूपचाप होक सुन्ल। 13हुँक्र बोल्क सेक्ल त, याकूब कल, “हेरो भैयौ, म्वार बात सुनो, 14परमेश्वर सुरुम अपन्हे दया कैक गैरयहूदीन फे रोज्ल, ओ आपन मनै बनैल कना बातक बारेम सिमोन पत्रुस कैडर्ल। 15यी बातसे अगमवक्तन्हक लिखल वचन फे ठ्याक्क मिल्ठन। धर्मशास्त्रम असिक लिखल बा,
16 #
आमो ९:११-१२
‘तबदोस्र मै घुम्क अइम
ओ दाऊदक ढलल् घरह फेदोस्र उठैम।
मै बिग्रल भत्कल चिजह फेदोस्र बनाक
ओहीह पैल्हकअस बनैम,#१५:१६ जब परमेश्वर “मै दाऊदक ढलल् घरह फेदोस्र बनैम” कल, तब उहाँ सम्भवत: यी बातह कहख्वाजल रलह: येशूह मुवलमसे फेदोस्र जियैना ओ उहाँह आपन मनैन्हक, यहूदी ओ गैरयहूदी समेत, राजा बनैना।
17ताकि बाँकी रहल मनै,
म्वार बलाइल गैरयहूदीहुँक्र समेत
सबजन परमप्रभुकठे अइहीँ।
18यी परमप्रभुक कहल बात हो।
उहाँ यी बात अघट्टे जनादेरख्लह।’”
19याकूब कह्टीगैल, “उहओर्से परमेश्वरकठे आइल गैरयहूदीहुँकन धर्मकर्मक जुवा ब्वाक लगाक दुःख देना काम नैकरी कना म्वार विचार बा। 20बेनसे एकठो चिठी लिख्क हुँकन पठाई। चिठीम का लिखी कलसे, ‘मूर्तिपूजा करल अशुद्ध चिज जिन खैहो, व्यभिचार जिन करहो, घ्याँचा डाब्क मुवाइल पशुक शिकार जिन खैहो ओ रगत जिन खैहो।’#प्रस ३४:१५-१७; लेवी १७:१०-१६; १८:६-२३ 21हुँक्र अत्रा मनहीँ कलसे होगैल्, काकरकि मोशक व्यवस्था त पुस्तौँपुस्तासे हरेक शरहम रहल सभाघरम हरेक बिसैना दिन प्रचार कर्ना ओ पहर्ना काम हुइटी आइल बा।”#१५:२१ ग्रीक भाषक स्रोतम यी पद स्पष्ट नैहो। काजे गैरयहूदीहुँक्र उ चारठो नियम मानपर्ना कना सम्बन्धम सायद याकूब कारण देटीबाट। या ऊ यहूदीन्हक लाग हरेक बिसैना दिन सभाघरम मोशक व्यवस्था सिख्ना मौका धेर पलबाटन कटी आपन स्रोताहुँकन शान्त करैना कोसिस कर्टिबाट।
प्रेरितहुँक्र ओ मण्डलीम रेखदेख करुइयन गैरयहूदी विश्वासीहुँकन चिठी पठैल
22तबदोस्र प्रेरितहुँक्र ओ एल्डरहुँक्र सारा मण्डलीक सदस्यहुँकनसे मिल्क दुइ जन अगुवन रोज्ना ओ हुँकन पावल ओ बारनाबासक सँग एन्टिओखिया सहरम पठैना निर्णय कर्ल। उ दुइ जन बारसाबास कैजिना यहूदा ओ सिलास रलह। 23हुँक्र उ चारजहन एकठो असिन चिठी देक पठैल:
“हम्र यरूशलेमम रना प्रेरितहुँक्र ओ एल्डरहुँक्र यी चिठी टुह्र एन्टिओखिया, सिरिया ओ किलिकियाम रना गैरयहूदी विश्वासीहुँकन लिखटी। सबजहन टुन्हक दादुभैयनसे अभिवादन बा।
24यिहाँसे गैल् कौनो-कौनो मनै हुइल्नैहुइल् बात बट्वाक टुँहन दुःख देल कना बात हम्र सुन्ली। तर हुँक्र हमार पठाइल मनै नैहुइट। 25उहओर्से हम्र एकठो सभा बलैली ओ दुइ जन अगुवन रोज्क हुँकन प्रिय बारनाबास ओ पावलकसँग टुन्हकठे पठैना सहमतीम एकठो निर्णय कर्ली। 26हुँक्र हमार प्रभु येशू ख्रीष्टक लाग आपन प्राणसमेत खतराम पाररख्ल। 27हम्र हुँकन्हकसँग यहूदा ओ सिलासह टुन्हकठे पठाइटी। हमार लिखल बात हुँक्र आपन मुहले टुँहन सुनादेहीँ। 28टुह्र मानपर्ना आवश्यक बात बाहेक और टन्टा टुँहन नैलगैना पवित्र आत्मक ओ हमार इच्छा बा। 29टुह्र मानपर्ना बात का हो कलसे मूर्तिपूजा करल अशुद्ध चिज जिन खैहो, रगत जिन खैहो, घ्याँचा डाब्क मुवाइल पशुक शिकार जिन खैहो, ओ व्यभिचार जिन करहो। टुह्र अत्रा बात मन्बो कलसे, टुन्हक लाग एकदम मजा हुई। आबक लाग बिदा।”
30यी चिठी लेक उ चार जन एन्टिओखिया गैल। हुँक्र उहाँ मण्डलीक सदस्यन बलाक यी चिठी देल। 31चिठी पह्रबेर हुँक्र धेर उत्साह पैल ओ खुशी हुइल। 32यहूदा ओ सिलास अपन्हे फे अगमवक्ताओँ रलह। हुँक्र विश्वासीन उत्साह देना वचन धेर बोल्क बलगर करैल। 33यहूदा ओ सिलास टनिक दिनसम उहाँ बैठ्ल, ओ पाछ उहाँक विश्वासीहुँक्र हुँकन आशीर्वाद सहित बिदावारी देलन ओ यरूशलेमक मण्डलीम पठैलन। 34[तर सिलास उहँ रना विचार कर्ल।] 35पावल ओ बारनाबासजुन एन्टिओखियम रल। हुँक्र और धेर जहनसे मिल्क प्रभु येशूक बारेम खुशीक खबर मनैन सिखैना ओ प्रचार कर्ना काम कर्ल।
पावल ओ बारनाबास अल्गैल
36टनिक दिन पाछ पावल बारनाबासह कल, “हम्र जौन-जौन सहरम प्रभु येशूक बारेम खुशीक खबर मनैन प्रचार कर्लही, उह-उह सहरम जाक लौव विश्वासीन्हक हालखबर बुझी।” 37बारनाबास मर्कूस कना यूहन्नह फे सँगसँग लैजाइ चहल। 38तर मर्कूसह सँगसँग लैजैना बात पावलह ठीक नैलग्लन, काकरकि पैल्हक प्रचार यात्रम मर्कूस पामफिलिया क्षेत्रम हुँकनसे अल्गाक घुमरलह ओ पूरा यात्रम हुँकन्हक कामम साथ नैदेलरलह।#प्रे १३:१३ 39यी बातम पावल ओ बारनाबासक बीचम चर्काचर्की परगैलन त, हुँक्र अल्गागैल। तबदोस्र बारनाबास मर्कूसह लेल ओ पानीजहाजम चिहुर्क साइप्रस टापुम गैल। 40पावलजुन सिलासह रोज्ल। विश्वासीहुँक्र पावल ओ सिलासह परमेश्वरक रेखदेखम सुम्पल त, हुँक्र उहाँसे नेङ्ग्ल। 41पावल सिरिया ओ किलिकिया क्षेत्र हुइटी विश्वासीन बलगर करैटी गैल।
Zur Zeit ausgewählt:
प्रेरित 15: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
