प्रेरित 12
12
पत्रुस जेलमसे छुट्कारा पैलक
1उ समयम राजा हेरोद मण्डलीक कुछ सदस्यन पकर्क अत्याचार कर भिर्ल। 2ऊ यूहन्नक दादु याकूबह तरवालले मुवाइ पठैल। 3जब ऊ यी कामले यहूदीहुँकन खुशी हुइल् देख्ल, तब ऊ पत्रुसह फे पक्र पठैल। (उ ब्याला खमिर नैमिलाइल रोटी खैना टिहारक समय रह।) 4तबदोस्र ऊ पत्रुसह जेलम डार्क सोह्र जन सिपाहीन चार-चारजन्हक समूह बनाक पत्रुसक गार्ड बैस लगैल। मुक्ति-दिवस टिहार ओरैलसे पत्रुसह सार्वजनिक कर्ना हेरोदक विचार रलहन।#प्रस १२:१-२७
5पत्रुस झ्यालखानम रहल्म मण्डलीक मनै हुँकहार लाग परमेश्वरसे जोड्दार प्रार्थना कर्टिरलह।
6हेरोद हुँकहीन सार्वजनिक करैना दिनिक आघक रात पत्रुस दुइठो सिक्रीले बान्ह्गैल् ओ दुइ जन सिपाहीन्हक बीचम सुतल रलह। ओ और सिपाहीहुँक्र फे ड्वारीम लग्लरलह। 7तब एकचोट्टे प्रभुक एकठो स्वर्गदूत देखपर्ल ओ झ्यालखानम ज्योति चम्कल्। स्वर्गदूत पत्रुसह हिलैटी “हाली उठो” कैक उठैल। तब हुँकहार हाँठम बान्धल सिक्री फुसुक्गैलन।
8स्वर्गदूत कल, “लुगा लगाओ ओ चप्पल घालो।” पत्रुस ओसहेँक कर्ल। स्वर्गदूत कल, “पिछौरी ओहर्क म्वार पाछपाछ आओ।” 9पत्रुस स्वर्गदूतक पाछपाछ झ्यालखानमसे बाहर अइल। तर स्वर्गदूतक करल यी काम हुँकहीन पक्का हो जसिन नैलग्लरलहन। हुँकहीन त दर्शन द्याखअस केल लागटलहन। 10पत्रुस ओ स्वर्गदूत पैल्ह ओ द्वासर गार्ड टोलीन नाहाङ्क सहरम जैना लुहाकिक गेटठे अइल। उ गेट अपन्हे खुलल् ओ हुँक्र बाहर गैल। हुँक्र एकठो गल्लीम सँगसँग नेङ्टीनेङ्टी स्वर्गदूत पत्रुसह छोर्क चलगैल।
11जब पत्रुसक होस खुल्लन, तब ऊ कल, “आब मै जाट्टीसे थाहाँ पैनु, कि परमप्रभु आपन स्वर्गदूत पठाक हेरोद राजा, ओ यहूदी अगुवाहुँक्र कर चाहल सब हानीमसे महीह छुट्कारा देल।”
12यी बात थाहाँ पैल त, ऊ मरियमक घरम गैल। मरियम मर्कूस नाउँले बलाजैना यूहन्नक डाई रलही। उहाँ धेर जन जम्मा होक प्रार्थना करटलह। 13पत्रुस गेट ढकढक्यैल त, रोदा नाउँ रहल एकठो कमारी गेट उभ्क आइल। 14जब ऊ पत्रुसक बोली चिन्हल, तब ऊ खुशी होक गेट बिना उभ्कल दौरटी भित्तर गैल् ओ कहल, “पत्रुस गेटम बाट।”
15तर हुँक्र ओहीह कल, “टैँ बौराइट्या, कि का री?” तर ऊ आपन कहल बात जाट्टीसे हो कैक कटीरहल। तब हुँक्र कल, “पत्रुसह हेरविचार कर्ना स्वर्गदूत हुहीँ।”
16पत्रुसजुन गेट ढकढक्यैटी रल। पाछ हुँक्र गेट उभ्कल त, हुँकहीन देख्क हुँक्र छक्क पर्ल। 17पत्रुस हुँकन हाँठक इशाराले चूप लगैल, ओ प्रभु हुँकहीन जेलमसे कसिक छुट्कारा देल कना बात हुँकन कल। ऊ “यी बात याकूब ओ और विश्वासीन फे जनादेहो” कैक कल। तबदोस्र ऊ और ठाउँम चलगैल।
18बिहान हुइल् त, पत्रुसह का हुइलन कैक सिपाहीन्हक बीचम भारी हलचल हुइलन। 19हेरोद राजा हुँकहीन खोज्ना आदेश देल, तर हुँक्र कहोँ फे नैभेटैल। हेरोद सिपाहीन सोधपुछ कर्ल ओ हुँकन मृत्युदण्ड देल।
तबदोस्र हेरोद यहूदियासे कैसरिया गैल ओ उहँ रल।
हेरोदक मृत्यु
20उ समयम हेरोद राजा टुरोस ओ सीदोन सहरक मनैनसे धेर रिसारलह। उहओर्से उ दुइ सहरक नेताहुँक्र मिल्ल ओ बलस्तस कना हेरोदक निजी कर्मचारीह मनाक हेरोदसे मेलमिलापक बिन्ती कर्ल, काकरकि उ दुइ सहरक मनै हेरोदक देशसे अनाजपानी झिकाइँट्।
21नेताहुँकनसे भेटघाट कर्ना कैक त्वाकल दिन हेरोद आपन विशेष लुगा लगाक राजगद्दीम बैस्ल, ओ हुँकन्हक आघ भाषण कर्ल। 22मनै कर्रसे हुँकहार प्रशंसा करलग्ल, “यी मनैन्हक बोली नैहो, तर दिउँतक हो!” 23तबहेँ परमप्रभुक पठाइल एकठो स्वर्गदूत हुँकहीन कर्रा बेराम बनादेल, काकरकि ऊ परमेश्वरह महिमा नैदेल। पाछ ऊ स्याउँ-स्याउँ कीरा पर्क मुल।
24तर परमेश्वरक वचन फैलटीगैल ओ विश्वासीन्हक संख्या धेर बहर्टीगैल्।
25जब बारनाबास ओ शाऊल यरूशलेमम आर्थिक सहायता पुगाक सेक्ल, तब हुँक्र मर्कूस कैजिना यूहन्नह लेक एन्टिओखिया सहरम गैल।
Zur Zeit ausgewählt:
प्रेरित 12: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.
