२ थेसलोनिकी 2
2
व्यवस्था भङ्ग करुइया
1हेरो भैयौ, आब हमार प्रभु येशू ख्रीष्ट फेदोस्र अइना ओ हम्र उहाँह भेटाइक लाग जम्मा हुइना विषयम स्पष्ट हुई।#१ थेस ४:१५-१७ हम्र टुँहनसे बिन्ती करटी कि, 2यदि कुई प्रभुक अइना दिन पुगरलन कही कलसे, टुह्र चिन्ता जिन करहो या विचलित जिन हुइहो। उ दिनिक बारेम हम्र अगमवाणी ब्वालबेर, या प्रचार करबेर ओसिक कली हुँ कैक कुई दाबी करसेक्ठ, या कुई हमार नाउँ पार्क लिखल चिठी पठाई फे सेक्ठ, तर हुँकन्हक बातम विश्वास जिन करहो। 3हुँक्र ज्या कलसे फे, हुँकन्हक उल्कम जिन लगहो। काकरकि परमेश्वरक विरोधम अन्तिम विद्रोह नैहुइटसम, ओ व्यवस्था भङ्ग करुइया ओ नाश हुउइया व्यक्ति नैदेखपरट्सम उ दिन अउइया नैहो। 4उ व्यक्ति मनै परमेश्वर मान्क पूज्लक सब चिजिक विरोध करुइया बा ओ अपन्हेह सबसे उच्च घोषणा करुइया बा। अत्र केल नैहोक, ऊ परमेश्वरक मन्दिरम समेत बैठुइया बा ओ “परमेश्वर मैहे हुइटुँ” कहुइया बा।#दान ११:३६; इज २८:२
5यी विषयम त, टुन्हक्केसँग रहलम मै टुँहन सिखैनहुँ। टुँहन याद नैहो का? 6दिन पुग्लसे उ दुष्ट देखपरुइया जो बा। आब का चिज ओहीह रोक्लबाटस कना बात त टुह्र जन्लबाटो। 7व्यवस्था भङ्ग करुइया गोप्य रूपम पैल्ह्हेँ आपन काम सुरु कैराखल। तर ओहीह रोकुइयह नैहटाजाइट्सम उ रोकजैलरहुइया बा। 8तबदोस्र व्यवस्था भङ्ग करुइया व्यक्ति देखपरुइया बा। तर प्रभु येशू तेज अजरारम आक आपन मुहक एक्क साँसले ओहीह नाश कैदेहुइयाबाट।#यशै ११:४ 9व्यवस्था भङ्ग करुइया व्यक्ति शैतानक शक्ति लेक अउइया बा, ओ सब किसिमक चमत्कार ओ अचम्म-अचम्म काम कर्लक बहाना बनुइया बा।#मत्ती २४:२४ 10ऊ हरेक किसिमक छल कैक नाश हुइना सबजहन ध्वाखा देहुइया बा, काकरकि हुँक्र मुक्ति देना सत्य वचनह प्रेम कर ओ स्वीकार कर नैचहल। 11उहओर्से, हुँक्र झूट बातम विश्वास करहीँ कैक परमेश्वर हुँकन भर्मैना शक्ति पठुइयाबाट। 12हुँक्र सत्य वचनम विश्वास नैकैक दुष्ट चालचलनम खुशी हुइलकओर्से हुँक्र दोषी ठह्राजउइयाबाट।
खुशीक खबरम अडिग रहपर्ना बात
13प्रभुक प्रेम करल भैयौ, हम्र टुन्हक लाग परमेश्वरह सड्ड धन्यवाद देहहीपर्ठा, काकरकि परमेश्वर सुरुहम टुँहन मुक्ति देहक लाग रोज्ल। उ मुक्ति टुँहन पवित्र बनैना पवित्र आत्मसे ओ सत्य बातम टुन्हक करल विश्वाससे अइठा। 14हम्र टुँहन प्रचार करल खुशीक खबरह माध्यम बनाक परमेश्वर टुँहन बलैलह। टुह्र फे हमार प्रभु येशू ख्रीष्टकअस आदर पाइसेको कैक उहाँ टुँहन बलैलह। 15उहओर्से, हेरो भैयौ, विश्वासम बलगर होओ, ओ चाहा मुहक वचनले ह्वाए, चाहा लिखल चिठीले ह्वाए, हमार सिखाइल बात पक्रलरहो।
16आब हमन प्रेम करुइया ओ अनुग्रहद्वारा हमन सड्डभर उत्साह ओ असल आशा देहुइया हमार प्रभु येशू ख्रीष्ट अपन्हे ओ परमेश्वर बाबा 17टुँहन उत्साह देटीरहीँ, ओ हरेक असल काम ओ वचनम टुँहन शक्ति फे देटीरहीँ।
Zur Zeit ausgewählt:
२ थेसलोनिकी 2: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.