२ कोरिन्थी 5
5
विश्वासक आधारम चल्ना
1हमन थाहाँ बा, कि हमार बास करल यी भौतिक शरीर नाश होक गैलसे फे परमेश्वरक देहल अनन्तसम रना हमार घर स्वर्गम बा। उ परमेश्वरक बनाइल अनन्त शरीर हो, ओ मनैन्हक बनाइल नैहो। 2यी वर्तमान शरीरम रहबेर जाट्टीसे हम्र दुःखी बाटी, ओ स्वर्गीय शरीरम रना भारी चाहना कर्ठी। 3काकरकि हम्र स्वर्गीय शरीर पैबी, स्वर्गम हम्र बिना शरीरक आत्मा केल नैरनेहुइटी। 4हम्र यी भौतिक शरीरम रहबेर शोक ओ चिन्तले सुस्कारी मर्ठी। यी शरीर झट्ट छोर्क जैना इच्छले नाहीँ, तर कैह्या स्वर्गीय शरीर पैबी कैक हो। यी मरणशील शरीर अनन्त जीवनम परिवर्तन हुइनेबा। 5हमन यी बातक लाग तयार परुइया त परमेश्वर जो हुइट, जे हमन बयानक रूपम पवित्र आत्मा देरख्ल।
6उहओर्से हमन पूरा भरोसा बा। हमन थाहाँ बा, कि हम्र जबसम शरीरम रठी, तबसम प्रभुसे दूर रठी। 7हम्र आँखिले द्याखल बातक आधारम नाहीँ, तर विश्वासक आधारम चल्ठी। 8हमन पूरा भरोसा बा, बेनसे हम्र भौतिक शरीरसे अलग होक प्रभुकसँग रहक लाग इच्छा कर्ठी। 9उहओर्से चाहा हम्र यिह शरीरम रही, चाहा यी शरीरसे अलग रही, उहाँह खुशी बनैना हमार लक्ष्य हो। 10काकरकि ख्रीष्ट हम्र सबजन्हक न्याय करुइयाबाट। असिक शरीरम रहबेर हम्र हरेक जन आपन-आपन करल असल या खराब कामक नतिजा पैनेबाटी।#रोम १४:१०
मेलमिलाप करैना जिम्मा
11उहओर्से प्रभुक डर का हो कना बात जान्क हम्र मनैन सम्झाबुझा पर्ठी। तर हम्र जसिन बाटी परमेश्वर उ सबजन्ठ, ओ म्वार जीवन टुन्हक आघ खुलस्त बा कना महीह पूरा आशा बा। 12हम्र फेदोस्र टुन्हकठे आपन प्रशंसा करक लाग नाहीँ, बेनसे टुँहन हमारम गर्व कर्ना मौका देहटी। असिक टुह्र भित्री मनक बातम नाहीँ, तर बाहिरी देखावटी बातम घमण्ड कर्ना मनैन जवाफ देह सेक्नेबाटो। 13यदि हमार होस ठेगानम नैहो कलसे उ परमेश्वरक लाग हो। यदि हम्र होसम बाटी कलसे उ टुन्हक लाग हो। 14ख्रीष्टक प्रेमले हमन बाध्य करैठा, काकरकि हमन निश्चित बा, कि सबजन्हक लाग ख्रीष्ट मुलकओर्से हम्र सबजन मुरली। 15ख्रीष्ट सबजन्हक लाग प्राण देल। आब बचुइयन आपन लाग नाहीँ, तर उहाँक लाग जिएपर्ठा, जे हुँकन्हक लाग प्राण देल, ओ फेदोस्र जियागैल।
16आबठेसे हम्र कौनोजहन बाहिरी रूपले मूल्याङ्कन नैकर्टी। हुइना त हम्र एक समय ख्रीष्टह संसारिक हिसाबले हेरी। आब हम्र उहाँह असिक नैहेर्टी। 17उहओर्से यदि कौनो मनैया ख्रीष्टम बा कलसे, ऊ लौव सृष्टि हो। पुरान जीवन बितगैल्, आब लौव जीवन सुरु होस्याकल। 18यी सब करुइया परमेश्वर जो हुइट। उहाँ हमन ख्रीष्टद्वारा फेदोस्र आपनसँग मिलापम अन्ल, ओ और मनैन उहाँकसँग मेलमिलाप करैना जिम्मा हमन देरख्ल। 19परमेश्वर अपन्हे ख्रीष्टम रहक संसारक सब मनैन आपनसँग मिलापम अन्ना ओ हुँकन्हक पापक हिसाब नैलेना काम करटलह। आब यी मिलाप करैना कामक जिम्मा परमेश्वर हमन देरख्ल। 20उहओर्से हम्र ख्रीष्टक राजदूत हुइटी, परमेश्वर हमारम रहक टुँहनसे बिन्ती कर्टिबाट। ओ टुह्र परमेश्वरसे मिलाप करो कैक हम्र फे ख्रीष्टक तर्फसे टुँहनसे बिन्ती करटी। 21येशू ख्रीष्टम पाप नैरलहन, उहफे परमेश्वर ख्रीष्टम हमन धर्मी ठहराईक लाग उहाँह हमार पापक बलि बनैल।
Zur Zeit ausgewählt:
२ कोरिन्थी 5: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.