२ कोरिन्थी 1
1
1यी चिठी परमेश्वरक इच्छासे ख्रीष्ट येशूक प्रेरित हुइक लाग बोलावट पाइल मै पावल ओ हमार भाइ तिमोथीसे हो। मै कोरिन्थ सहरम रहल परमेश्वरक मण्डलीह ओ सारा अखैया क्षेत्रम रहल पवित्र जनहुँकन यी चिठी लिखटुँ।#प्रे १८:१
2हमार परमेश्वर बाबा ओ प्रभु येशू ख्रीष्ट टुँहन अनुग्रह ओ शान्ति देहीँ।
धन्यवाद चह्रैना काम
3हमार प्रभु येशू ख्रीष्टक परमेश्वर ओ बाबक जयजयकार ह्वाए। उहाँ दया ओ सारा सान्त्वना देना परमेश्वर हुइट। 4हम्र फे दुःखम परल और मनैन परमेश्वरसे पाइल सान्त्वना देह सेकी कैक उहाँ हमन सारा दुःखम सान्त्वना देठ। 5हम्र प्रभु येशू ख्रीष्टक दुःखम जत्रा धेर सहभागी हुइठी, ख्रीष्ट फे हमार दुःखम हमन ओत्रह धेर सान्त्वना देठ। 6हम्र दुःख पैली त यी सब टुन्हक सान्त्वना ओ मुक्तिक लाग हो। हम्र सान्त्वना पैबी कलसे टुह्र फे सान्त्वना पैबो। हमार भ्वागल दुःख सहअस टुह्र फे धीरजसे सहबो कलसे उह सान्त्वनक अनुभव कर्नेबाटो। 7टुन्हकम रहल हमार आशा कबु फे नैडग्मगैने हो। काकरकि हमन थाहाँ बा, जसहेँक टुह्र हमार दुःखम सहभागी बाटो, ओसहेँक हमार सान्त्वनम फे सहभागी हुइनेबाटो।
8भैयौ, एशिया क्षेत्रम रहबेर हमार भ्वागल दुःखक बारेम टुँहन सम्झना कराइ चाहटी। उहाँ हम्र अत्रा दुःख पैली कि हम्र बच्बी कना त आश हेरारल्हा।#१ कोर १५:३२ 9हम्र त आब मुजैबी जसिन लागलरह। हम्र आपनम नाहीँ, तर मुवलमसे जियैना परमेश्वरम भर पर सेकी कैक असिन हुइलक हो। 10उहाँ हमन मृत्युक संकटमसे बचैल ओ आम्ही बचुइयाबाट। हम्र उहाँकम पूरा भरोसा कैरख्ली, कि अइना दिनम फे हमन बचैनेबाट। 11टुह्र फे प्रार्थनाद्वारा हमन सहायता करपर्ठा। असिक धेर जन करल प्रार्थनक उत्तरम हम्र आशिष पैनेबाटी, ओ हमार लाग बहुत मनै परमेश्वरह धन्यवाद देहहीँ।
पावलक योजना परिवर्तन
12हम्र बिना गर्व कैक शुद्ध विवेकले कहसेक्ठी, कि यी संसारम, खासकैक टुन्हक आघ हमार चालचलन इमान्दार ओ पवित्र ढर्ली। हम्र परमेश्वरक अनुग्रहम भर पर्ली, हमार आपन मानवीय बुद्धिम भर नैपर्ली। 13टुह्र पहर्क बुझ नैसेक्ना कुछु बात हम्र नैलिखठुइटी। महीह आशा बा टुह्र पूरा बुझ सेक्नेबाटो। 14जसिक टुह्र हमन डिनडिन बुझरख्लो, ओसहेँक प्रभुक अइना दिनम हमन पूरा बुझ सेक्नेबाटो, ओ हम्र टुन्हकम गर्व कर सेकी ओ टुह्र फे हमारम गर्व कर सेको।
15महीह यी बातक पक्का भरोसा रलकओर्से, ओ टुँहन दुनुओर्से फाइदा ह्वाए कैक मै पैल्ह टुँहन भेँट्ना इच्छा कैरख्नहुँ। 16माकेडोनिया जाइबेर टुँहन भेटघाट कर्ना ओ माकेडोनियासे घुम्क आइबेर फे टुन्हकठे जैना, ओ उहाँसे यहूदिया जाइबेर टुह्र म्वार लाग व्यवस्था मिलादेबो कना म्वार विचार रह।#प्रे १९:२१ 17का मै बिना विचार कर्ल अइना योजना करलअस टुँहन लग्ठा? संसारक मनैअस कबु “हाँ” कबु “नाहीँ” कैक मै आपन स्वार्थ केल हेर्ठुं का?
18परमेश्वर विश्वासयोग्य बाट ओ मै फे कबु “हाँ” कबु “नाहीँ” कैक कल नैहुइटुँ। 19काकरकि सिलास, तिमोथी ओ मै टुन्हक बीचम प्रचार करल परमेश्वरक छावा येशू ख्रीष्टम “हो” ओ “नैहो” कना नैरटन, तर उहाँकम सड्डभर “हो” केल रठन।#प्रे १८:५ 20काकरकि परमेश्वरक सक्कु प्रतिज्ञा येशू ख्रीष्टम “हो” कैक पूरा हुइठन, उहओर्से उहाँद्वारा परमेश्वरक महिमक लाग हम्र “आमेन” कठी। 21परमेश्वर हमन ओ टुँहन ख्रीष्ट येशूम अरगर बनारख्ल ओ हमन रोजरख्ल। 22उहाँ हमारम आपन छाप लगादेरख्ल, ओ हमार हृदयम बयानक रूपम पवित्र आत्मा देरख्ल।
23मै परमेश्वरह साक्षी मानक कहटुँ, टुँहनसे कडा बोली ब्वाल नैपर कैक मै कोरिन्थम नैअइनु। 24हम्र टुन्हक विश्वासम अधिकार जमाइ नैचहटी, बेनसे टुन्हक खुशीक लाग टुँहनसे मिल्क काम कर चहठी। काकरकि टुह्र आपन विश्वासम अरगर बाटो।
Zur Zeit ausgewählt:
२ कोरिन्थी 1: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.