१ यूहन्ना 2
2
1हेरो लर्काओँ, टुह्र पाप जिन करो कना उद्देश्यले मै यी बात टुँहन लिख्टीबाटुँ। तर यदि कुई पाप कैडारल कलसे फे, हमार पक्षम परमेश्वर बाबकठे बिन्ती कैदेहुइया एकठो धर्मी जन बाट। उहाँ येशू ख्रीष्ट हुइट। 2उहाँ हमन पापक दण्डसे बचाइक लाग बलि हुइलह, ओ हमन केल नाहीँ, तर सारा संसारह बचाइक लाग बलि हुइलह।
3यदि हम्र उहाँक आज्ञापालन कर्ली कलसे, हम्र उहाँह चिनरख्ली कना बात हम्र जन्ठी। 4मै उहाँह चिनरख्नु कना तर उहाँक आज्ञाजुन पालन नैकर्ना मनैया झूट बोलुइया हो, ओ ऊ सत्य हिसाबले नैचलट्। 5तर परमेश्वरक वचन पालन करुइयन उहाँह जाट्टीसे प्रेम कर्ठ। यैहेँमसे हम्र उहाँकम बाटी कैक हम्र जन्ठी।#२:५ “उहाँकम बाटी” कलक उहाँसे हमार सम्बन्ध अत्रा घनिष्ठ बा कि हम्र उहाँसे एक बाटी। यी बात त अङ्गूरिक ब्वाँटिम हङ्ग्या रहलअस हो (यूहन्ना १५:४-५)। 6उहाँकम रठुँ कहुइया येशूकअस जीवन जिएपर्ठा।
7प्रियहुँक्र, मै टुँहन कौनो लौव आज्ञा नैलिखठुइटुँ, तर टुह्र सुरुसे सुन्टीआइल उह पुरान आज्ञा हो।#यूह १३:३४ 8तर फे, एकठो लौव आज्ञा मै लिखटुँ, जौन सत्यता येशू ख्रीष्टक ओ टुन्हक जीवनम प्रमाणित हुइल्, काकरकि अन्धकार हेरैटीजाइटा ओ ज्योतिजुन आघहेँसे चम्क भिररहल।
9ज्योतिम बाटुँ कना तर विश्वासी भैयह हेल्हा कर्ना मनैया आम्ही फे अन्धकारम जो बा। 10आपन भैयह प्रेम करुइया ज्योतिम रठा, ओ वाकरम ठ्यास लग्ना कुछु कारण नैरटस। 11तर आपन भैयह हेल्हा करुइया अन्धकारम पलबा, ओ अन्धकारम जो नेङ्ग्टीबा। ऊ अन्धकारम कुछु फे नैदेख्लकओर्से अप्न कहाँ जाइटा कैक थाहाँ नैपाइट्।
12हेरो लर्काओँ, येशू ख्रीष्टद्वारा
टुन्हक पाप क्षमा हुइलक कारण
मै टुँहन यी लिखटुँ।
13मै टुह्र बाबा सरहक परिपक्व मनैन यी लिखटुँ,
काकरकि टुह्र सुरुसे रहुइयह चिनरख्लो।
मै टुह्र जवान हुइल् मनैन यी लिखटुँ,
काकरकि टुह्र दुष्ट शैतानह जितरख्लो।
14हेरो लर्काओँ, मै टुँहन यी लिखटुँ,
काकरकि टुह्र परमेश्वर बाबह चिनरख्लो।
मै टुह्र बाबा सरहक परिपक्व मनैन यी लिखटुँ,
काकरकि टुह्र सुरुसे रहुइयह चिनरख्लो।
मै टुह्र जवान हुइल् मनैन यी लिखटुँ,
काकरकि टुह्र विश्वासम बलगर बाटो,
ओ परमेश्वरक वचन टुन्हक जीवनम काम कर्ठा,
ओ टुह्र दुष्ट शैतानह जितरख्लो।
संसारह प्रेम जिन करो
15संसारह या संसारम रहल कौनो चिजह प्रेम जिन करो। यदि कुई संसारह प्रेम कर्ठा कलसे, ऊ परमेश्वर बाबह प्रेम कर नैस्याकट्। 16काकरकि संसारम रहल चिज कलक शरीरक पापी चाहना, आँखिले देख्क लग्ना लालच, धनसम्पत्तिक कारण अइना घमण्ड हो। असिन चिज परमेश्वर बाबकठेसे नैआइट्, तर संसारमसे अइठा। 17संसार ओ संसारप्रतिक चाहना हेरैटीजाइटा, तर परमेश्वरक इच्छा अनुसार चलुइया सड्डभर पलरहुइयाबा।
“ख्रीष्ट विरोधी” झूट हो
18हेरो लर्काओँ, संसारक यी अन्तिम समय हो। “ख्रीष्ट विरोधी” अइटीबा कैक टुह्र सुनरख्लो, ओ धेर “ख्रीष्ट विरोधीहुँक्र” पैल्हहेँ आरल। उहओर्से यी अन्तिम समय हो कैक हम्र जन्ठी। 19हुँक्र हमार मण्डलीमसे निकर्क गैल, वास्तवम हुँक्र हमार बगालिक नैरलह। यदि रट कलसे, हुँक्र मण्डलीमसे निकर्क जैनेनिरलह। हुँक्र गैल त, जाट्टीसे हमार बगालिक नैरलह कना बात प्रमाणित हुइल्।
20तर ख्रीष्ट त टुँहन पवित्र आत्मा देरख्ल, ओ टुह्र सबजन सत्य बात जन्ठो। 21टुह्र सत्य बात नैजन्टो कैक नाहीँ, तर टुह्र सत्य ओ झूट अल्गाइ सेक्ना हुइलकओर्से लिखटुँ। 22येशू जो ख्रीष्ट हुइट कैक इन्कार करुइया झूट हो। परमेश्वर बाबह ओ उहाँक छावह इन्कार करुइया “ख्रीष्ट विरोधी” उह हो। 23छावह इन्कार करुइयकम बाबा नैरट। छावह स्वीकार करुइयकम बाबा फे रठ।
24सुरुसे टुँहन सिखागैल् बात आपन मनम ढर्लरहो। ढर्लरलो कलसे, टुह्र छावकम ओ बाबकम रठो। 25ओ उहाँक प्रतिज्ञा करल बात यिह हो- अनन्त जीवन।
26मै यी सब बात टुँहन छल करुइयन्हक बारेम टुँहन चेताउनी देहक लाग लिखटुँ। 27तर टुह्र त पवित्र आत्मा पारख्लो, ओ उहाँ टुन्हकम पलरठ। उहओर्से कुई फे टुँहन सत्य बात सिखाइपर्ना जरुरी नैहो। काकरकि टुह्र जानपर्ना सब बात उहाँ टुँहन सिखैठ ओ उहाँक सिखाइल बात झूट नैरहट्। उहाँक सिखाइल अनुसार ख्रीष्टम पलरहो।
परमेश्वरक सन्तान ओ शैतानक सन्तान
28हेरो लर्काओँ, ख्रीष्ट फेदोस्र अइहीँ त हम्र निडर हुइबी ओ हमन लजाइ नैपरी कैक ख्रीष्टम पलरहो।
29ख्रीष्ट धर्मी बाट कैक टुह्र जन्ठो। उहओर्से ठीक काम करुइयन परमेश्वरक सन्तान हुइट कना बात फे टुह्र जानपर्ठा।
Zur Zeit ausgewählt:
१ यूहन्ना 2: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.