१ कोरिन्थी 4
4
प्रेरितन्हक सेवा
1टुह्र हमन परमेश्वरक ख्रीष्टक सेवक सम्झपर्ठा। हमन परमेश्वरक रहस्यक बात प्रकट कर्ना जिम्मा देगैल बा। 2असिन कामक जिम्मा पाइल सेवक विश्वासयोग्य हुइपर्ठा। 3टुह्र या और कौनो अदालत म्वार न्याय कर्लसे फे महीह चिन्ता नैहो। वास्तवम मै अपन्हे फे आपन न्याय नैकर्टुं। 4मै कुछु गल्ती कैरख्नुजसिन महीह नैलागट्, तर याकर मतलब मै कबु गल्ती नैकर्लहुँ कना बात नैहो। म्वार न्याय करुइया त प्रभु पलबाट। 5उहओर्से प्रभु फेदोस्र नैआइट्सम किहुह फे दोष जिन लगाओ। अन्धारम नुकल बात, ओ हरेक मनैयक मनम गोप्य रहल बात उहाँ देखादेहुइयाबाट। तब हम्र सबजन परमेश्वरसे प्रशंसा पउइयाबाटी।
6हेरो भैयौ, मै टुँहन “ठीक-ठीक नियम पालन करपर्ठा” कना बात बुझाइक लाग अपोल्लोस ओ आपन उदाहरण देनु। एकठो मनैयक पक्ष लेक और मनैयह हेल्हा कर्ना ठीक नैहो। 7टुँहन औरजहनसे बरा के बनाइल? टुन्हकठे रहल चिज परमेश्वरक देहल नैहो का? यदि हो कलसे, यी टुँहन कुई नैदेहल जसिन टुह्र काजे घमण्ड कर्ठो?
8आवश्यक परल सब चिज टुन्हकठे बा हुँ। टुह्र त धनी होरलो हुँ। हम्र राजा नैरलसे फे, टुह्र राजा होगैलो। जाट्टीसे टुह्र राज्य कर्टो त मजा हुइनेरह। तब टुन्हक सँगसँग हम्र फे राज्य कर सेक्नेरलही। 9महीह का लागटा कलसे, विजय जुलुसक पाछ नेङ्ग्ना मृत्युदण्ड पैना कैदीअस परमेश्वर हम्र प्रेरितहुँकन सबसे पाछ ढैरख्ल। ओ हम्र संसारम स्वर्गदूतन्हक ओ मनैन्हक आघ तमाशा होरली। 10ख्रीष्टप्रति समर्पित हुइलक कारणले हम्र मूर्ख होरली, तर टुह्र ख्रीष्टम बुद्धिमान बाटो। हम्र कमजोर बाटी, तर टुह्र भारी बलगर बाटो। हम्र हेल्हा कर्वापारख्ली, तर टुह्र मानसम्मान पारख्लो। 11आम्ही फे हम्र भुँख्ल, पियस्ल बाटी, फाटलचिठल लुगा बाहेक हमारठे लगैना लुगा और कुछु नैहो। हम्र पिट्वापैठी, ओ हमार घरबार कुछु नैहो। 12हम्र आपनऽ हाँठले मेहनत कैक खैठी। सराप पैलसे हम्र आशीर्वाद देठी। दुःख पैलसे हम्र सहठी।#प्रे १८:३ 13बदनाम हुइलसे हम्र मीठ बोली बोल्ठी। आम्ही फे हम्र संसारक बन्ह्वार ओ फुहर फँक्ना घुर्राअस बाटी।
14मै टुँहन शरमम पारक लाग यी बात नैलिखठुइटुँ, तर आपन प्रिय लर्कनअस टुँहन अर्ती देहक लाग लिखटुँ। 15येशू ख्रीष्टक बारेम टुँहन सिखुइयन हजारौँ जन रलसे फे, टुन्हक आत्मिक बाबा एक्कठो बाट। खुशीक खबर प्रचार कैक ख्रीष्ट येशूम मै टुन्हक बाबा हुइनु। 16उहओर्से म्वार देखासिकी करुइयन होओ कैक मै टुँहन बिन्ती करटुँ।#१ कोर ११:१; फिलि ३:१७ 17यी बातम टुँहन सहायता करक लाग मै प्रभुम म्वार प्रिय ओ विश्वासयोग्य छावा तिमोथीह टुन्हकठे पठाइटुँ। मै जाक सारा मण्डलीम सिखाइल अनुसार ख्रीष्ट येशूम म्वार जीवन कसिन बा कना बात ऊ टुन्हकठे बट्वादेहुइयाबाट।
18मै टुन्हकठे फेदोस्र नैअइम कना मान्क टुह्रमध्ये कत्रा जन घमण्डी होरलो। 19तर प्रभुक इच्छा हुई कलसे मै टुन्हकठे झट्टहेँ अउइयाबाटुँ, ओ उ घमण्डी मनै गफ केल लगैठ कि जाट्टीसे हुँकन्हकठे परमेश्वरक शक्ति बाटन कना बात पत्ता लगुइयाबाटुँ। 20काकरकि परमेश्वरक राज्य बातम नैरहट्, तर शक्तिम रठा। 21टुह्र का चहठो? मै टुँहन सजाय देहक लाग लठ्ठी लेक आऊँ, कि नम्र आत्मा लेक प्रेम देखाए आऊँ?
Zur Zeit ausgewählt:
१ कोरिन्थी 4: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.