१ कोरिन्थी 3
3
ख्रीष्टक सेवकहुँक्र
1हेरो भैयौ, मै टुन्हकठे रहलब्याला आत्मिक मनैनसे बट्वाइअस टुँहनसे बट्वाइ नैसेक्नु। मै टुँहनसे संसारिक मनैनसे ब्वालअस बोल्नु। ख्रीष्टम भक्खर विश्वास करल छुटी लर्कनसे बट्वाइअस बोल्नु। 2उहओर्से दूध पिना लर्कनअस मै टुँहनसे व्यवहार करपरल। मै टुँहन दूध पियैनु, काकरकि टुह्र ठोस खाना खाइ नैसेको, ओ आम्ही फे नैसेक्टो।#हिब ५:१२-१३ 3टुह्र आम्हीसम फे पापी स्वभावक अधीनम बाटो। टुन्हक बीचम डाहा ओ झैझग्रा पलिबा। का यिहिँले टुह्र पापी स्वभावक अधीनम पलबाटो कना बात नैदेखाइट्? का टुह्र संसारक और मनैअस नैहुइलो? 4जब टुह्रमध्ये कुई “मै पावलक हुइटुँ” ओ औरजुन “मै त अपोल्लोसक हुइटुँ” कठा कलसे, का यी संसारक मनै करअस नैहुइल् नि?#१ कोर १:१२
5अपोल्लोस के हो? ओ पावल के हो? हम्र त टुँहन विश्वासम अन्ना परमेश्वरक सेवकहुँक्र केल हुइटी। हम्र प्रभुक खटाइल काम त कर्ठी। 6मै टुन्हक हृदयम बीया बुइनु, अपोल्लोस पानी चर्ल, तर ओहीह बह्रैना काम त परमेश्वर जो कर्ल।#प्रे १८:४-११,२४-२८ 7बीया बुउइया या पानी चरुइया महान नैहो, तर ओहीह बाह्र हुर्क लगुइया परमेश्वर पो महान हुइट। 8बीया बुउइया ओ पानी चरुइया बराबर हुइट। सबजन आपन-आपन मेहनत अनुसार इनाम पउइयाबाट। 9हम्र त सँगसँग परमेश्वरक काम करुइयन हुइटी, ओ टुह्रजुन परमेश्वरक जग्गा, परमेश्वरक घर हुइटो।
10परमेश्वरक अनुग्रह महीह देलक कारण मै एकठो सिपार घर बनुइयाअस जग बैठैनु। और जनजुन यैहेँम घर बनैटीबाट। तर यी जगम घर बनुइया हरेक मनैया होस कैक बनाइपर्ठा। 11काकरकि परमेश्वर पैल्हहेँ येशू ख्रीष्टह एकठो जगक रूपम बैठारख्ल। उ बाहेक कुई फे और जग बैठाइ नैस्याकट्। 12यी जगम कुई स्वान, चाँदी या बहुमूल्य पदार्थले घर बनाइसेक्ठ। कुईजुन काठपात, खर वा पैँरले घर बनाइसेक्ठ। 13परमेश्वर न्याय कर्ना दिनम आगीद्वारा हरेक मनैयक करल कामक जाँच हुउइया बा। के कसिन काम करल कना बात उ दिन थाहाँ हुउइया बा। 14उ दिन ज्याकर काम आगीले भस्म नैहुई, उह मनैया इनाम पाई। 15यदि कौनो मनैयक काम जर्क भस्म हुहिँस कलसे, वाकर भारी नोक्सान हुहिँस, तर उ मनैयाभर आगीमसे उम्कलअस बाँचजाई।
16टुह्र परमेश्वरक मन्दिर हुइटो, ओ पवित्र आत्मा टुन्हकम बास कर्ठ। का यी बात टुँहन थाहाँ नैहो?#१ कोर ६:१९; २ कोर ६:१६ 17परमेश्वरक मन्दिरह नाश करुइया जेहीह फे परमेश्वर नाश करुइयाबाट। काकरकि परमेश्वरक मन्दिर पवित्र रठा, ओ उ मन्दिर टुह्रहे हुइटो।
18अपन्हेह ध्वाखा जिन देओ। यदि टुह्रमध्ये कुई यी संसारक हिसाबले अपन्हेह बुद्धिमान सम्झठा कलसे, ऊ वास्तविक रूपले बुद्धिमान हुइक लाग मूर्ख हुइना आवश्यक बा। 19काकरकि संसारक बुद्धि परमेश्वरक सामुन्ने त मूर्ख बात हो। धर्मशास्त्रम असिक लिखल बा, “परमेश्वर बुद्धिमान मनैन हुँक्र चलाकी कर्टीकर्टी पक्रठ।”#अयू ५:१३ 20और ठाउँम यी फे लिखल बा, “बुद्धिमान मनैन्हक विचार काम नैलागट् कना बात परमप्रभुह थाहाँ बाटन।”#भज ९४:११ 21उहओर्से मानव अगुवक पाछ लग्ना बातम गर्व जिन करो। वास्तवम सब चिज टुन्हक्के हो, 22चाहा पावल, कि अपोल्लोस, कि पत्रुस, कि संसार, कि जीवन, कि मृत्यु, कि आबक समय, कि पाछक समय। सब चिज टुन्हक्के हो, 23ओ टुह्र ख्रीष्टक हुइटो, ओ ख्रीष्टजुन परमेश्वरक हुइट।
Zur Zeit ausgewählt:
१ कोरिन्थी 3: thl
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2020, Wycliffe Bible Translators, Inc. All rights reserved.