MEEKYENA 17
17
Nsengye wa Aron
1Numa Nndumi Iruva karera na Mose, kammbia, 2Rera na vana va Israeli, kwiipoo misengye kwawo, nsengye umwi wa wo nndu nndumi wa nrwe, shaasa mmba tawo tikai, misengye ikumi na ivii, wo nsengye kuureiye irina lya muni nsengye. 3Nsengyeny wa Levi kureiye-u irina lya Aron, mashika ni nsengye umwi kwa nrwe wa mmba. 4Neewe mmbo kuivikaa yoo yemeny yeele mbee ya isanduku elyo lya mavavaso, yoo shikwaanannyaa neeni. 5Na nndu yeto nshensauwaa, nsengye wakwe mmbo usheparaa maa, neeny shirummbwe nkunung'unu yeto wa vana va Israeli uwe yaany. 6Naasa Mose kavia vana va Israeli, na vaniini vawo vakamweengye misengye, na nsengye wa Aron ukakaa nnang'ani ya yeyo yaawo. 7Mose kavika misengye yeyo mbee ya Nndumi Iruva yoo yeemeny yeele. 8Kwiikee nkonu wa kavii, Mose kaanga neefo yeemeny yeele, nsengye ulya wa Aron wa mmba ya Levi ate wampara maa, na ivaa fivaro, na yuuta ndunda mbiiri. 9Naasa Mose kasomuta velollye, vakalola neewarya wo nndu nsengye wakwe. 10Naasa Nndumi Iruva kavia Mose, Viira nsengye wa Aron alya isandukuny, ifingywa-u uve kyaaso kwa irika elyi yeesi, naambo kufishe nkunung'unu wawo, naambo valasheefwa. 11Mose katana indo, shaasa Nndumi Iruva alemmbavavasya.
12Naasa vana va Israeli vakarera na Mose, vakammbia, Lolate, mmbo lwiifoo lusiaa, lwarumaka, loose deny mmbo lukeesarummya. 13Wo nndu aserikyaa yoo yeemeny lya Nndumi Iruva mmbo afwaa, a ndesa mmbo lusiaa loose?
Zur Zeit ausgewählt:
MEEKYENA 17: MAS2
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Holy Bible in Kimashami © Bible Society of Tanzania, 2016.