Jeremías 2
2
Israelen bi benee dalixhej
1Xanllon bne'e nada' dayubre, na gulle'e nada':
2Biaj na bne'e yell xhen ke Jerusalén'na,
bne'e zillj nench'na yen akre wen:
Kin ba bnee Xanllon.
Lljadinlalla kan nako nor weo, na ne' nako be'nn wen dalixhej kone nada',
na kan guko xhora, na blliero nada'
na bnao nada' latj dach yu billen,
gan nutno llasllanse.
3Israelen guken xhirall kone nada',
zerawze len naken danell da llrapa.
Cha nu bi llune len, nada' llsakzia le ake'
na llsela da llcheb le ake'.
Nada' Xanle ba bnia ka'.
4Yoyte xhi'nn xhasoa Jacoben, na yoyte re' sjanak bich loellj Israel, lewzenay lloa xtill Xanllon. 5Xanllo lle'e re':
¿Bixha damar brere xustawre ka' kia nada',
na babiy ake' kwitan cha'?
Na bnao ake' dios ka' bitbi zaken,
na le aken bayak ake' be'nn bitbi zak.
6Bi belallre wayirjre nada'
le nadan babeja re' Egipton,
na broa re' nez latj dach yu billen,
yu yech, na le nkan bdinj,
yell-liw ga bibi nis de, na llebraz llan da nxhull,
yell-liw ga nutno zu', na nutno llde gana'.
7Nada' badzwa re' latj yell-liw cha'on,
nench'na gawre daxhixh ken
na yoyte da sjanak wen rawen.
Axha re' bedre na benle bziw raw yell-liw kian,
benle nench'na brala latj yell-liw ni,
dan nake kian.
8Bxus ka' bi bayirj ake' nada',
na be'nn ka' numbie lloa xtillan bi bazak akre nada',
na xan ake' ka' bayechj ake' nada',
na be'nn ka' llayixjwe lloa xtillan bne'e ake' raw raz Baal, dios ke be'nn yub akre,
na naw ake' loe lsak ka' bibi zaken.
Da gak ke Israelen
9Kelen'na, nada' Xanle ba bnia:
Gakdilrena re' rente xhi'nnre ka', na xhasoa re' ka'.
10Lechaj lloa nista'on dan lli gan lloj willen, na le wia,
na le wsel bal ake' gan nzi Quedar nench'na wia ake' wen,
cha ba guk ke dan llak gani',
11cha latj gan sjalla aken ba bacha ake' dios ke ake' ka'.
Lakse nak akten dios wxhiye ake'.
Axha be'nn yell kia ka' ba bsanlall ake' nada', lakse naptia doxhente yelwaken,
na nawre loe lsak ka' bibi zaken.
12Le lleb, re' sjallare raw doxhente yell-liw.
Le xis, na le lleb.
Nada' Xanle ba bnia ka'.
13Yell kian ba ben ake' chop kwenle daxhinj,
bsanlall ake' nada'
le nadan naka nis yelnban ke re',
na ba bchenre ga bdare nis
axha da ki bi llzay aken nis.
Da nsa dan bi llun ake' dalixhej raw yell Israelen
14Israelen bi naken da llun llin da bi llaxhj,
bi gurjen ga llak llin ga llzakzi ake'.
¿Bixhchen na', llbanlen cha'?
15¿Bixhchen dilrenlen kan llun bell yix ka',
na llusiare zillj kwis?
Ba bkoan yiach ake' latj yell keren,
yell xhen ka' ba bzey aken
na nutno bagan gana'.
16Be'nn ka' sjalla Menfis na Tafnes
ba bla ake' llit yichjon.
17Dani ba guk ko'o kanake dan bsanlallo nadan,
le nadan naka Xano Dios,
na broa rwe' nez.
18Na na' ¿bixha guno gan'na chejgo Egipton
lljejo nis Nilon?
¿Bixha guno gan'na chejgo Asirian
lljejo nisen de Éufratezen?
19Kwinkse damar ko'on wsakzin rwe',
dan bi nako be'nn wen dalixhejen ba llxoan dol kullo.
Ben xbab, na rero katk damaren, na da slan
naken dan bsanlallo nadan
na bi bdapo nada' baran,
le nadan naka Xano Dios.
Nada' naka Dios nap doxhente yelwak.
Yel wednay ke Israelen
20Kan batnate bayechjo nada',
na bi bzenayo kia.
Bneo: Bi llenla werawa rwe'.
Raw yoyte rum ka' sjalli rale
na yoyte xhan yay xhen ka'
bllaw xtuw.
21Nada' guza rwe' keto yay uvas dazeraw nak wen,
keto yay uvas da za ke nbas da nak da xrawe.
Axha ba'ba xhinjrizo
na bill llezakra rwe'.
22Lakse wayibo kwino kone dan llayun llich,
na gunle'no llin biteze yextir
rawa ni zajzekse nak bziw dol ko'o ka'.
Nada' Xanle ba bnia ka'.
23¿Akre gunlizo neo: Bine gaka bziw
na nike ne' weraoza dios wxhiye ka'?
Bwiakero kan beno rachen,
na bwiayian katken ba benon,
rwe' kameya ba bi llze lliteze,
na llxhonjdo zajzew gateze,
24burr nor ba bi nmaxh
to llgu bich xhinba llbellewba be, dan llebraz llraban.
Na keten lleneba nu xoa leban, nutno llak llzay leba.
Na ba yayen bi lldeba lche keten llayirjba leban,
na du tiemp lleneba ba yay.
25Israel bi guno we niao ka', ke nake dadow rres galniazo,
bi weo latj wayech lo yenon.
Axha rwe' bneo: Ka', bni kwis naken,
nlliera be'nn zit ka', na nawa le ake'.
Israelen llayal sakzin
26Kan llayere be'nn wan'na keten lladol akre le'en,
ka' wayere Israelen,
be'nn yell, be'nn wnebia, na be'nn ka' nechj le aken,
bxus ka', na be'nn ka' llayixjwen,
27Na to yayen lle aken: Rwen nako xato,
na yajen lleren: Rwen nako xnato.
Na kaze llunere nada', na bi llayechjre wiare nada'.
Axha keten llrere da nxhollen, le lletere nada':
Da wasrao neto'.
28Judá, ¿ganxha dios ka' ba benon?
Llebraz napo dios ake' na llebraz napo latj yell xhen ake'.
Yed le ake' cha', narachk cha le aken wak wasran rwe',
keten yed dan wsakzi rwen.
29¿Bixhchen llxoare dol kulla,
le relren ba gukre be'nn wednay kone nada'?
Nada' Xanle ba bnia ka'.
30Kon bsakzi dadza xhi'nn re' ka',
le bi wen akrebe wzenay akbe.
Le kwinsren nakre ke bell yix snia,
na blleyire be'nn ke re' ka' llayixjwe di'llen.
31Lekse ka' re', zajzure na' lla,
lewzenayian xtill Xanllon.
Israel ¿ba guka keto latj dach yu bill ko'o rwe' cha'?
¿Ke to yell-liw da llebraz zen da xchul?
Yell kia, ¿Bixhchen neo:
Bill yalljeto rwe', bill wabito kone rwe'?
32¿Wak galall noren
ya chao nbaraz ke'e ka' dan benlene llin kan bchuynen cha?
Axha yell kian,
gulalle nada' kan batnate.
33Wen kwis numbiero nezen
keten llayirjo xtuw ka'.
Nako mexkoer ke damaren.
34Doxhente zodon naken bziw
dupen xchen be'nn yiach ake' be'nn bibi dol nap,
na be'nn bitbi damar ba ben ake'.
35Na lakse ka', rwe' neo:
Bitbi damar ne' guna. Diozen bill llaklle'e nada'.
Axha na' cha', ke naken neo bitbi daxhinj ne' guno,
na na' guna yel korchis ko'o.
36¿Bixhchen llebraz llyienzero wachadow be'nn ka run'reno txhen'na?
Lekse ka' be'nn Egipto ka' wsanlall ake' rwe',
kan ba bsanlall Asirian rwe'.
37Na de wabiw Egipton
to wayere yichjra'on,
le nada' ba balliya kale be'nn ka' nxenlallon,
na bitbi guno ga'n kone gukre ke aken.
Zur Zeit ausgewählt:
Jeremías 2: ZPUPAT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible Society of Mexico
Mehr über die Be'nnka'be Xti'll Dios erfahren