Isaías 66
66
Bi llazralle da wxhiyen llwerao aken
1Xanllon nee:
Yeban naken gan llia llnebian
na yell-li'on naken ga llazirall nia ka'.
¿Gaxha gak gunchawre to yo' kia?
¿Gaxha gak gunre to ga waziralla?
2Nadaksa ba bena yoyte da ki,
na kan guken bzuraw bzu aken.
Nada', Xanle, bakse bnia ka'.
Be'nnen llwia nada' nake
be'nn yiach na be'nn su yiach
be'nn llap xtillan baran.
3Axha zu be'nn llut to bell na lloeraw ake',
na leskakse llut ake' to be'nn nach,
llzoy ake' yen xhiren, na leska llchuy ake' yichj bekon,
llazarall ake' nbas, na leska xchen kuch,
llzey ake' llen yar, na leska lloeraw ake' to loe lsak.
Be'nn ka' ba biazrall gun ake' damar ki,
llawe akre gun ake' yoyte da ki.
4Na leskakse nada' wia ke ake' yel llsakzi,
na wsela ke ake' dan llebraz llcheb le aken.
Le balwilla, na nutno balli kian,
bnia, na nutno bzenay kia,
ben ake' da bi llazralla,
biazrall ake' ben ake' da bi llawera.
Yelkorchis na yel wasra
5Le wzenay xtill Xanllon,
re' llapre baran xtillen:
Bal be'nn wrall kere ka', llwiere ren,
nawlloa ake' re' nike dan llalwillre nadan, ne ake':
Wroechga Xan aken yelwak ke'en
lleneto re'reto re' sure nbaraz.
Axha le aken si' ake' yelsdo.
6Bixha dane'n ren llak yell xhen'na,
llakia dan za lo yoda'on,
llakia da llun Xanllon
kanake llsakzie'e be'nn ka' llwiere le'en.
7Sión'na bxhane,
ke ze gaktere bes.
8¿Nuxha ba benre ka dani?
¿Nuxha ba brere ka dani?
¿Llarj to yell xhen tllaze cha?
¿Llarj to yell chulldaoze?
Axha kan Sión'na bzoraw llake besen,
to setegaze le bzute xhi'nne ka'.
9¿Akxha guna wzaya dan garj,
le nadaksan lluna nench llarj aken?
Xano Dios ko'on ba bnee ka'.
10Le yewere konen Jerusalén'na,
le su nbaraz konen len yoyte re' nllieren,
le gun txhen dan zun nbarazen
yoyte re' ba bllellre ke'en,
11na le'en ka to xna bdao,
walle'e xhi'nne ka'
xte yerj aktebe.
12Le nadan, Xanle, nia:
Nadan guna nench'na yed da wzoa le wen
ke to yeo,
na yel wnia ke latj yell-liw ka'
ke to ga lloj yeo.
Len gune da yej gawre,
chele'e re' kone xhichje ka'
na chajchebe re' raw xhibe ka'.
13Ka' to xna bdao, llayunxhene xhi'nnen,
kakse wayunxhena re',
na wallelre dan wayunxhen re' Jerusalén'na.
14Keten re're dani, raxhdaoren yeweren,
na wakubre ke to yix.
Xanllo wroerawe yelwak ke'en radj be'nn wen llin ke ka',
na yel llaklla ke'en konen be'nn ka' llwiere le'en.
15Le Xanllon ze'e radj yi' llalninen,
karret ke'e ka' naken ka' to bdon,
wsane doxhente yel llaklla ke'en
na yi' llalnin ke yel llsakzi ke'en.
16Awa, Xanllon gune yel korchisen konen yi'n,
gunee yel korchis ke doxhente yell-li'on kone spad ke'en
na be'nn zan wlleyie'e.
17-18Xanllon ne'e:
Be'nn ka' llayun xhirall kwin, na llayib kwin ake'
nench'na werao ake' dios yub akre gan lla' yej na yay xhixh ka
na naw ake' nun zaj radjen,
be'nn ka' llaw ber kuch, na ber bzin
o cha bayix yubre ba bi nak xhirall
tuchize kweyi yoy akte,
le nadan numbiera dan llun ake' xbab na dan llun ake'.
Natell nadaksa yeda
na watupa yoyte yell ka', na latj yell-liw ka',
na yed ake' na re akre yelwak kian.
19Nada' guna to sen:
wia latj waxhonj bal ake'
na wsela le ake' latj yell-liw ka':
Tarsis, Libia,
Lidia, latj yell-liw gan llak llunlen ake' xhis waxiten llin,
Tubal, na Grecia
na na latj yell-liw zit ka' zajzu llwa nista'on,
ga chras bi ne yen akre kia
na bi ne re akre yelwak kian
le aken we diꞌll ke yelwak kian radj yell ka'.
20Gun ake' yed yoyte be'nn ka' lla' latj yell-liw ka',
yoyte be'nn wrall kere ka',
lo kabay, lo karret ake'
kone bllin ake', na konen ba ka nzi kamellos.
Gaken ke to da wazarall ake' nada'
raw Jerusalén'na, ya xhirall kian,
ke daka llazarall be'nn israelitas ka' na nox aken
to lo bas yall lo yodao kian.
Nada', Xanle ba bnia ka'
21Na bal ake' koaja
nench'na gak ake' bxus, na be'nn llakren lo yoda'on.
Nada' Xanle, ba bnia ka'.
22Leska ne'e Xanllon:
Ka yeba kuben, na yell-liw kuben
dan gunan
sibia aken ke chnare,
kakse sibia xhi'nn xhasoa ka', na raon.
23Na yew beo, na lla beo kuben,
na ze to xman waj, lla sab,
yoyte be'nn ka' yed ake' wchekw xhib ake' rawa.
Nada' Xanle, ba bnia ka'.
24Yed ake', na re akre be'nn wat ka'
bayechj nadan.
Belgun ka' llaw le aken bi kweyi akba,
na yi' llalnin llzey le aken, bi wayuren.
Gak ake' to da sral kwis ke yoyte be'nn nach.
Zur Zeit ausgewählt:
Isaías 66: ZPUPAT
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible Society of Mexico
Mehr über die Be'nnka'be Xti'll Dios erfahren