Lóma 7
7
Ə fəiʼ no yi pə́ pyê lə̂ no lâa-ndə̂
1Pəfə̌r, pei fú mə́ mə́ njî no yi n ngwo ndǎʼ wo lə́ pei, ńté no pei pə̌ njî ləpə̌ʉ yi ə́ laʼ ngô: ləpə̌ʉ ghwo mətəʉ ndəu ŋuu-məsoŋ pə̂ mpfu yi a pyěr mə́ ncî mbî. 2Paghʼə pyé fəiʼ no lə́ məngyě nzoʼó, ləpə̌ʉ lar yé lə́ ndə̂u ye pə̂ mpfu yi ndə̂u ye wêi pyěr tʉ́; lə́ ndə̂u ye wêi lə̌i ndêi tə nkwʉ́, ləpə̌ʉ kə̂ mbyér ndâr yé gháp zʉ́ po. 3Ə́ laghʼ ńdâʼ ńgó ndə̂u məngyě lə̌i mbyér tʉ́, məngyě wêi wó nzóʼ ŋuu ndeʼe ə́ pə̂ ńgó a ghʉ məghap; lə́ ndə̂u ye póu nkwʉ́, ləpə̌ʉ kə̂ mbyér ndâr yé yé lə̂ ndə̂u ye po, ə́ pə̂ yə́rə́ ə́ mbə́ ńgó a lə̌i ngwó nzôʼ cǒ ŋuu ndeʼe, pə́ kə̂ ndâʼ yé ńgó a ghʉ məghap po. 4Pəfə̌r pâa, ə́ kə́ mbə́ pə́ yə́rə́ mbó pei. Pei lə lar mbəʉ zéi lə́ Kəlísto gháʼá, ə́ nkwʉ́ lə̂ ləpə̌ʉ. Pei tə̂ʉ mpfu wo gháʼá, ə́ ncʉ́ʼ nzûʼ pə́ mbó ŋuu ndeʼe, pə́ laʼ gháʼá ŋuu yi Sê lə ghʉ̌ a zʉ̂ʉ lə̂ ləwʉ̂ təcər pəpfû, ńjí ńgó ə́ leitə́ lə́ zʉ́ paghʼə cʉ̂ʼ ngʉ̂ pə̂ zə̂u yi wo poŋə́ Sê. 5Ə́ lə pə́ mpfu yi paghʼə lə ghʉ̂ pə̂ məzə̂u mi mbə̂ʉ zághʼə cʉ́ŋə wághʼə lə̂ ngʉ́, ləpə̌ʉ pə̂ ncʉ́ŋə wághʼə lə̂ ngʉ́ məfaa ghíʼ paghʼə pə̌ nkǒŋ. Mbə̂u lənyâŋ zêi cághʼə wághʼə ńŋə̂ pə́ cər ləwʉ̂. 6Lə́ ə́ pou mbə́ mpfu wo, Sê lə ghʉ paghʼə kwʉ̂ lə̂ zə̂u yi ə́ lə laghʼ wághʼə ńgʉ̂ məpuʼ. Kâa ləpə̌ʉ pyér mə́ sâʼ yé wághʼə tə ə́ pə̂ yi mboʼ paghʼə cʉ̂ʼ ndághʼ pə̂ mbə̂u yi shwî, ə́ fǎʼ mbó Sê, ə́ ndeitə́ lə̂ mətəʉ Zəghʼə Ndêi-lěi. Lə́u nkə́ mbyér faʼ wághʼə mbó Sê lə̂ mbə̂u yi ndwuŋ ghíʼ ləpə̌ʉ Mə̌usə̂i lə pə́ ndáʼ po.
Ə no lə̂ ləpə̌ʉ gháp no lə̂ məfaa
7Tə mboʼ paghʼə mâʼ nci laghʼ ńtsóʼ ńgó ho? Ńgó ləpə̌ʉ gháp məfaa tâʼ zə̂u? Ə́ ngə́ kâa pə̂ yé yə́rə́! Lə́ n ndə lei pə́ lə̂ ləpə̌ʉ ə́ mboŋə́ jí zə̂u yi məfaa pə̌ zěi. Ə́ pə̂ yə́rə́, m mboʼ n ndə jî ghâa ńgó ə náŋ zə̂u ŋuu ntsáa ə̂ no tə́poŋ po tə́ ghó ləpə̌ʉ laʼ ngô: «Koo o nâŋ zə̂u ŋuu ə́ ntsáa.» 8Ghíʼ ləpə̌ʉ lə ghʉ̌ n njî zə̂u yi məfaa zěi lə̂, məfaa wêi ghʉ̂ ńgó n ntsáa məzə̂u mbə̂u lə̂ mbə̂u. Ləpə̌ʉ lə̌i ndə́iʼ pə́ wó po, pə́ jî yé ńgó məfaa pə́ wó po. 9Ə́ lə pə́ mpfu yi kâa n ndə pə́ njî ghâa ləpə̌ʉ, lə́u m mə̂ ntsôʼtə ghâa lə̂ có zə̂u po. Lə́ n ndə lei tə njí ləpə̌ʉ, ə́ ntsáa lə̂ ngʉ́ məfaa kə̂u lə́ məŋ, 10tə ə́ pə̂ yi mboʼ məŋ ndâʼ ńgó məŋ kwʉ mə́. Ləpə̌ʉ yi Sê lə ŋə́ ə́ ndaghʼ ńdôu ńgó məŋ mbə́ wó, lə cʉ́ʼ ncʉ́ŋə́ ghâa ncóghʼ pə́ lə́ ləwʉ̂. 11Ghíʼ ləpə̌ʉ lə ghʉ̌ njî zə̂u yi məfaa zěi lə̂, məfaa wêi lə fútə́ ghâa, ə́ ncʉ́ŋə́ ghâa ńŋə́ lə̂ ləwʉ̂.
12Ə́ pə̂ yə́rə́, ə́ mbə́ ńgó ləpə̌ʉ fû mbó Sê, ə no yi zěi pou ndâʼ kâa ghwô yé có kotə, ə́ mbə́ ndʉŋ-ndʉŋ, ə́ mbou mbôŋ. 13Ə́ laghʼ ḿbə́ ńgó mboʼ zə̂u shʉʼʉ cʉ̂ʼ mbə́ ntû ləwʉ̂ ghâa? Ə́ ngə́ kâa pə̂ yé yə́rə́! Məfaa lə lwo nzəm zə̂u shʉʼʉ, ə́ ncʉ́ŋə́ ghâa ŋə́ lə̂ ləwʉ̂. Ləpə̌ʉ lə ghʉ yə́rə́, pə́ fû mə́u ə́ njí mbə̂u yi məfaa lǎghʼ nshwǒr.
Məfaa lə láʼ mə́ nzʉ́ ŋuu-məsoŋ
14Paghʼə pə̌ njî ńgó ləpə̌ʉ fû mbó Sê, lə́ ə́ ngwǒ lə́ məŋ, m mbə̂ zâa pə́ ŋuu-məsoŋ, mə́i ləpə̌ʉ lə féi ghâa ŋə́, n ncʉ̂ʼ puʼ məfaa. 15Kâa m mə́ nzûʼ ghâa tû zâa lə̂ zə̂u yi məŋ ngʉ zěi: ńté ńgó zə̂u yi m mə̌ nkoŋ lə̂ ngʉ̂, kâa n ngʉ̂ ghâa, ə zə̂u yi kâa mbóu mə́ nkôŋ lə̂ ngʉ́, n ngʉ̂ pə́ zěi. 16Ghíʼ n ngʉ̂ pə̂ zə̂u yi kâa n nyáa mə́ nkoŋ lə̂, n ndeitə́ mə́u ə́ mbə́i ńgó ləpə̌ʉ poŋ. 17Ə́ pə̂ ńgó zə̂u yi məŋ ngʉ zěi, káa n ngʉ̂ pə́ lə̂ ləkoŋtə ghâa, məfaa yi a zʉ mə́ ghâa lə̂ cʉ́ŋə ghâa, məŋ ngʉ̂ yə́rə́. 18M mə̌ njî ńgó, ə ngʉ̂ no shʉʼʉ kâa pə̂ yé cər ntə̂ʉ məŋ, yi məŋ mbə̂ ghâa pə́ ŋuu-məsoŋ. Kwaʼ lə́nə́ʉ, m mə̌ nkoŋ lə̂ ngʉ́ no shʉʼʉ lə́ káa kuʼ ghâa lə̂ ngʉ́. 19Ə no shʉʼʉ yi m mə̌ nkoŋ lə̂ ngʉ́, káa n ngʉ̂ ghâa zěi, ə no tə́poŋ yi kâa m mə́ nkôŋ ghâa lə̂ ngʉ́, ə́ ngʉ̂ pə́ zěi. 20Ghíʼ n ngʉ̂ pə̂ zə̂u yi kâa m mə́ nkôŋ lə̂ ngʉ́ lə̂, kâa məŋ lə̂ ngʉ̂ zěi, məfaa yi a zʉ́ mə́ ghâa lə̂ cʉ́ŋə ghâa məŋ ngʉ̂.
21Məŋ yi m mbə̂ mpfu tsəm ə́ ntsâa lə̂ ngʉ́ no shʉʼʉ, n ngí jwó mə́i mbəʉ zaa zaŋə́ mə́ lə̂ ngʉ́ pə́ yi tə́poŋ. 22Ə́ laghʼ mbə́ ńgó ləpə̌ʉ yi ə́ fû mbó Sê sâa-sǎa ə́ mbôŋ ghâa cər ntə̂ʉ məŋ. 23Lə́ có ləpə̌ʉ pou mə́ nkwâr ndəu məŋ, ə́ mə́ nkə̂ʼtə ghâa lə̂ ngʉ́ zə̂u yi kwaŋtə zâa yǎa ntə́ʉ mə́u lə̂ ngʉ́. Ə́ ncʉ́ʼ mə́ ndâghʼ ghâa ńgʉ̌ puʼ məfaa yi ə́ zʉ́ mə́ ghâa lêi. 24Yêe ngwôʼ zaa yêe! Wǒ ŋuu ghʉ̌ kwárə́ ghâa cər mbəʉ zêi yo yi shuŋ ghâa mpfu tsəm ə́ ncôghʼ pə́ cər ləwʉ̂ lo? 25Paghʼə ŋə́ nkhwo lə́ Sê, a ghʉ̌ lěi lə́ Nde waghʼə Yěso Kəlísto, ə́ kwárə́ wághʼə cər mbəʉ zêi!
Ə́ pə̂ yə́rə́ ə́ mbə́ ńgó m mə̌ ndaghʼ kwaŋtə zâa ńŋəi ghíʼ ləpə̌ʉ Sê pə́ ntúŋú, lə́ mbǒu ndághʼ ghíʼ m mbə̌ ŋuu-məsoŋ, mbəʉ zaa ghʉ̂ n ncʉ̂ʼ mbə́ pə̂ puʼ məfaa.
