Məfaʼ Pəghaŋə-ntə̂u 2
2
Zəghʼə Ndêi-lěi shíʼ ńkə́u lə́ pəghaŋə-ntə̂u
1Ə́ lə́ pə́ leʼé lətsei pəyúda yi pə́ fûŋ ńgó Paŋtekôtə, ngaŋə-ntə̂u Yěso kə̂ ncí nkə̂itə yʉʼ wêi. 2Gháp ghi zúʼ, có wâr fû ləfaŋ nzôr ghíʼ mpfu yi tâʼ tə́koʼ fə̂m pə̌ ncʉ̂ʼ yʉʼ, ə́ ntó ńkə́u tə ndóghʼə́ ndə̂ zêi yi gháp lə pə́ cər wó lêi. 3Gháp jwô məcó məzə̂u kwatə ḿbə́ pə́ ghíʼ mələ̂ʉ mǒghʼ, ə́ sěi ńkə́u tâʼ tâʼ môʼ lə́ wǒwó təcər páp. 4Zəghʼə ndêi-lěi lóghʼə lə́ páp, gháp jî lə̂ ntsár mətsâr tə̂u ndeʼe, wǒwó pə̂ ntsâr ye yi Zəghʼə Ndêi-lěi cóghʼ ntsʉ zʉ́.
5Ə́ lə pə́ leʼé wêi, pəyúda pi gháp lə pə́ mbôghʼ Sê fû məlâʼ mə́tsəm cər ngoŋ ńtó ḿbə́ Yelúsalêm. 6Gháp lə lei tə nzúʼ wâr zei, ə́ nǎa ncûu ńtó ńkə́u yʉʼ wêi ə́ nzáa, ə́ fû nkəʼə́ gháp gháʼate, ńté no wǒwó lə́ pye pi gháp lə cǔu ńtó lêi lə pə́ nzúʼ, gháp cʉ̂ʼ ntsâr pə̂ ndʉʉ tsâr lâʼ yi pə́ jî yé wó. 7Ə́ kə́ʼə gháp ə́ mbou ntsə̂ gháp, gháp pə̂ ntúŋu təcər páp ngô: «Pye pwo pə́tsəm pi gháp tsâr lo, kâa pə́ pye Galilêi mo? 8Ə́ pou nděi gháʼá wǒwó lə́ pághʼə pə́ nzûʼ ghíʼ gháp cʉ́ʼ tsâr pə̂ tsâr lâʼ yi pə́ jí yé wó? 9Ə́ pə́ təcər paghʼə, ə pye pi gháp fú Paatês mbaa Medî gháp Elâm pə̂ wó. Ə pye Mezopotamî pə̂ wó, ə pye Yudêi gháp Kapadósʉ pə̂ wó, ə pye pi gháp fú Pôŋ mbaa fú paghʼə-ngoŋ Azî pə̂ wó; 10ə pye pi gháp fú Fəlijî, ə́ fú Pəmfilî, ə́ fú Egípto mbaa cər paghʼə-ngoŋ Libî yi ə́ páatə́ Silêinə pə̂ wó, pəcó pye fú Lóma, 11Pəcó pye fú Kəlêtə mbaa Arabî; pəcó pye pə̂ pi pə́ jí gháp, gháp pə̂ pəyúda, pəcó pə̂ pə́ pye pi gháp kə́u-kə́u lə̂ no Sê pəyúda. Paghʼə zûʼ gháp lâghʼ pə̂ mətsâr lâʼ mághʼə ndêʼtə mənkəʼə-məno Sê áa?» 12Ə́ kəʼə gháp gháʼate, káa gháp kə́ njí gháp no yi mboʼ gháp pwor, ə́ ncʉ́ʼ mə́ ntúŋu təcər páp ngô: «Zei yo no laghʼ mbə́ ńgó ho?» 13Lə́ pəcó pye pə́ nzôutə záp pəpə́i no Sê zoutə́ ńdâʼ ngô: «Gháp fú mə́ mbʉ́ʉ məluʼ.»
Pyêh laʼ no lə̂ lâʼ
14Ə́ pə̂ yə́rə́, Pyêh gháp pə có ngaŋə-ntə̂u ntsap moʼ lə̂ ləghə̂m lesê ńtə́ʉ ndáʼ lə̂ təʉ mbó lâʼ yi ə́ kəitə́ ngô: «Pei pəyúda, ə́ ngʉ̌ wéi pə́tsəm pi pei tǒ ḿbə́ Yelúsalêm leʼé wo, pei tsúŋú nzúʼ no yi n ngwo ndǎʼ pei, ə́ njí zə̂u yi ə́ pə́ nděi! 15Pye pwo, kâa pə́ gháp məpʉ̂ʉ-məluʼ ghíʼ pei kwaŋ lə̂, ńté no yo pyěr pə́ pəmə́nəu ləpfuʼú mbaʼa-mbaʼ#2.15 Ə́ lə pə́ lə̂ cǐ pəyúda, káa pye pə́ nô gháp məluʼ mbaʼa-mbaʼ. Gháp kə pfâr mbap mbóu nô məluʼ, ə́ mbou pfâr mbap pə̂ mpfu ngwʉ̂.. 16Yo no ghʉ gháʼa, ə́ ndaghʼ ḿbə̂utə lə̂ no yi Jowêl ntsətə-nkəʉ Sê lə lǎʼ ngô:
17“Ə Sê laʼ ngô: Yo no ə́ táa kwǎr lə̂ pəlyəghʼ-nzəm məleʼé-lâʼ,
n ngʉ̌ fwóghʼ Zəghʼə zâa lə́ pye-mə́soŋ pə́tsəm;
ghəpə́ zéi pi mbiŋə gháp pi pəngyě pôu ncʉ́ʼ pətsətə́-nkəʉ Sê,
n ŋéʼ nyôghʼ máp, gháp jwó məzə̂u pə́ tə́ pə̌ ndé;
ə́ ngʉ̌ pətikáŋ péi jwô məzə̂u cər mənjwo.
18Ə̂ŋ, ə́ ngwǒ lə̂ ngaŋə-faʼ zâa pi mbiŋə gháp pə pi pəngyě, n fwóghʼ Zəghʼə zâa lə́ páp lə̂ mêi məleʼé,
gháp cʉ̂ʼ pətsətə́-nkəʉ Sê.
19N ngʉ́ pə́ jwó mənkəʼə-məno tʉ̌-lə́pû,
ə́ ngʉ̌ pə́ jwô mələiʼi jwǐ ndəu ndesé:
ə́ pə́ jwó məci, ə́ njwó mǒghʼ gháp ndî mǒghʼ yi ə́ kô ghíʼ məlâm.
20Mə́nəu shə́rə́ ńcʉ́ʼ nzə̌m,
mə́saŋ pou ncʉ́ʼ məci,
leʼé lâʼ nde yi ə́ pə́ leʼé lâʼ jwǐ, ə́ mbə́ yi shʉʼʉ poŋə́ tó.
21Ŋuu ntsəm yi a ghʉ̌ fúŋ ləjôghʼ nde, ə́ sʉ́ʉtə́ yé ghʉ̌ cwór.”»
22«Pye Ísə́lahêl, pei zúʼ mətsâr mwo, Sê lə lei lə́ Yěso môu Nǎazalêi, ə́ ngʉ́ mənkəʼə-məno, ə́ ngʉ́ məndǎa-jwô-mə́no gháp pə mələiʼi jwǐ lə̂ ndághʼ ńnyarə́ wéi ńgó Yěso wêi ghwo mətəʉ; tû-mbəʉ zéi tsúŋu mə́ njí. 23Pə́ lə féi ŋuu wêi ńŋə́ lə́ pei, ə́ pə̂ ghíʼ Sê lə láʼ nzáʼ nzʉ̂ ntághʼ ńgó ə́ ghʉ̌ pə́ yə́rə́, ə́ mə́ njî ghíʼ ə́ táa ghǐ lyəghʼtə́ ə́ pə́. Pei lə jwí yé, ńté ńgó pei lə ŋə́ yé lə́ pətəpə̌i-no Sê, gháp kʉ̂ʉ yé lə̂ tʉ̌-mbʉ̂ŋtə, a kwʉ̂. 24Lə́ Sê lə kêʼtə mənkʉ ləwʉ̂ lə́ zʉ́, ə́ ngʉ̌ a zʉ̂ʉ, ńté no kâa ləwʉ̂ lə kûʼ yé lə̂ nkúʼtə́ yé. 25Ńté no Davîd lə tsár ńté yé ndâʼ ngô: “N ndə pə́ njwô nde mbi məŋ maa mpfu tsəm, ńté ńgó a pə́ lə̂ ndyəghʼə́ pô ghâa yi təʉ mə́ mbâp ghâa ńgó koo có zə̂u ghʉ ghâa. 26Ə̂ zə̂u yi ə́ ghʉ̌, n ngwô lətsei ntə̂ʉ məŋ, m mə̂ ndâʼ məno shʉʼʉ. M mbə̌ tə mbə́ pə́ ŋuu mə́soŋ, lə́ ə́ fú mə́ njî ńgó n ngʉ̌ kwʉ́, ə Sê ghʉ́ n nzʉ́ʉ lə̂ ləwʉ̂. 27Ńté no mboʼ o táa mêʼ ghô ghâa lâʼ pəpfû sê po, ə́ nkə́ nyêr ghô ghâa yi məŋ mbə̌ ndʉŋ-ndʉŋ mbi ghô, n ndyʉ̂ cər ləshi po. 28O kə nyarə́ ghâa məlaŋə́-ndə̂u ləcwôr, n ngʉ̌ ghwǒ tə́koʼ lətsei ntə̂ʉ məŋ mpfu yi m mbə̌ mbəʉ gho.”» 29Pyêh kə̂ ncí ndáʼ ngô: «Pəfə̌r pâa, ə́ poŋ ńgó n sâa-sǎa ndáʼ wéi no ńté mə́ngâa-njʉʼ waghʼə fou Ndavîd, a lə kwʉ̂, pə́ tʉ̂ŋ yé, ləshi yé pyêr pyerə́ tə paghʼə tsúŋu mə́ njí. 30A lə pə́ tə nkwʉ́, lə́ ə́ mbə́ ntsətə-nkəʉ Sê, ə́ fú mə́ njî ńgó Sê lə laʼ yé tə nkâa ńgó a táa ghʉ̌ cǒ ŋuu lə̂ ngər yé zʉ́ ndə̂ ye, ə́ nyáŋ lə̂ lwoŋ ləfou yé. 31Ə́ nzáʼ nzʉ̂ ńjwó ńgó Kəlísto ghʉ̌ zʉ̂ʉ lə̂ ləwʉ̂, ə́ ndǎʼ ngô: “Káa pə lə mêʼ yé yé lâʼ pəpfû sê, mbap mbəʉ ye kâa kə́ ndyʉ̂ yé cər ləshi.” 32Yěso wêi, Sê lə ghʉ a zʉ̂ʉ lə̂ ləwʉ̂, paghʼ pə́tsəm fú ntsuŋú mə́ njí. 33Sê laghʼ yé nkóʼ ńdə́r lə̂ tʉ̌-lə́pû, ə́ nyáŋ yé lə̂ wuŋú pô yé yi təʉ, ə́ ŋə́ Zəghʼə Ndêi-lěi yi a lə ghʉ̌ ndaʼá lə̂ ŋə́ tə fú leʼé lə́ zʉ́; a pfû ńgáptə́ lə́ pye pé. Ə̂ zěi yi pei tə̌ʉ leʼé wo, ə́ mə́ njwó mbou mə́ nzúʼ. 34Ńté no Ndavîd, tû-mbəʉ yé kâa lə wô yé tʉ̌-lə́pû; lə́ mbou mə́ ndâʼ pə́ zʉ́ ngô: “Ə Nde Tǎa Sê lə lâʼ lə́ Nde ghâa ngô: Tó ńnyáŋ lə̂ ndyəghʼə́ pô ghâa yi təʉ, 35tə nkə̂u mpfu yi n ngwo nuŋú pəghaŋə mbəu pô sê, o lághʼ gháp ńgʉ̌ lətǎghʼ məku zô.” 36Ńgó pye Ísə́lahêl pə́tsəm tsúŋú njí ńgó Sê kə laghʼ Yěso wə̂ yi pei kə kʉ̌ʉ yé lə̂ tʉ̌-mbʉ̂ŋtə lə̂ ngʉ̌ Nde, ə́ mbou ndághʼ yé ńgʉ̌ Nzaʼ-nkʉ!» 37Gháp zûʼ tsâr yi Pyêh tsǎr lei, ə́ sâa-sǎa nkə̂u məntə̂ʉ máp, gháp túŋu Pyêh gháp pə pəcó pəghaŋə-ntə̂u ngô: «Pəfə̌r pâa, paghʼ ghʉ́ gháʼá?» 38Pyêh lâʼ lə́ páp ngô: «Ńgó wǒwó lə́ pei kə́p cǐ yé, ə́ mpfú nci lə̂ ləjôghʼ Yěso Kəlísto, ə Sê lyə́ghʼə́ məno məfaa ye. Ə̂ lêitə́ yə́rə́, ə Sê ŋə́ wéi Zəghʼə Ndêi-lěi.» 39Ńté no zə̂u yi Sê lə ghʉ̌ ndaʼá mə́u lə̂ ngʉ́ ŋə́, ə́ náŋtə́ wéi mbaa ghəpə́ zêi, ə́ nkə́ náŋtə́ pye pə́tsəm pi gháp pə́ cər məlâʼ mi ə́ pə́ ndǐ təsə. Zə̂u lətəi-ndwuŋ yi a wo ŋə́ tə́ pfû có zə̂u lêi, ə́ náŋtə pye pə́tsəm pi Sê ghʉ̌ fúŋ gháp.
40Pyêh lə pou ŋə̂ məcó mətsâr tə nzáa lə́ páp lə̂ ndághʼ ńgʉ̌ gháp tsuŋu nzúʼ, mbaa lə̂ ndághʼ ńcóghʼ mətəʉ máp, ə́ mə́ ndâʼ ngô: «Pei fú nou pye pi gháp faa mə́ laŋə́-ndə̂u ńkwǎr, ə́ ndáʼ ngwô ləcwôr.» 41Pye tə nzáa lə́ pye pi gháp lə pə́ yʉʼ wó lə zúʼ tsâr Pyêh, ə́ mbə́i, ə́ mpfú nci. Ə́ pə̂ leʼé wêi, pye no tóusʉ tárə́ kʉʼʉ lə́ pye pi gháp pə̂i mə́ no Sê.
Mbə̂u yi pye Kəlísto lə laghʼ ńnyáŋ
42Gháp pə́tsəm lə pə́ sâʼ təʉ lə̂ nzúʼ zə̂u yi pəghaŋə-ntə̂u Yěso jyêʼ gháp zěi, ə́ mə́ sâʼ təʉ lə̂ ntə̂mtə́ ńnyáŋ ghíʼ pəfə̌r; ə́ ntəmtə məzʉ̂ máp təmtə́ ńzʉ́, ə́ mbou mə́ nkə́itə́ ńsʉ́ʉtə Sê. 43Wǒwó təcər páp pə̂ mbóghʼ Sê, ńté no a lə pə́ ndêitə lə́ pəghaŋə-ntə̂u, ə́ ngʉ̂ mənkəʼə-məno gháp pə məndǎa-jwô-mə́no. 44Gháp lə kəitə́ ńgwǒ tâʼ ntsʉ, ə́ mbou ngâptə məzə̂u máp təcər páp. 45Gháp lə pə́ fə̂i məndesé máp gháp pə məzə̂u máp, ə́ ngâptə nkâp zěi təcər páp, ə́ ŋə̂ yi wǒwó ə́ fə̂iʼ pə́ lə̂ no yi ə́ yǎa mə́ ntsə̂ yé. 46Ə́ mbə̂ leʼé tsəm ə́ nkə̂itə ndə̂ Sê; ə́ nkə́u məndə̂ páp, ə́ nkə̂itə nzʉ̂ məzʉ̂ ndêi-lěi, ə́ mbou nzʉ̂ məzʉ̂ máp lə̂ lətsei tə́ ghwǒ məcó məkwaŋtə ndeʼe. 47Gháp lə pə́ ngûʼtə Sê, ŋuu ntsəm pôu mə́ nkôŋ no záp. Ə Nde pôu mbə̂ leʼé tsəm ə́ ndâghʼ pye pi a ghʉ̌ gháp cwôr, ə́ nkʉ́ʼʉ nou gháp.
