E’doza 45
45
Yusufuni Jezu i nizu adripi driri
1 #
’Yeta 7:13
Vutinia Yusufu econi di i asi imbazaru ’ba dria pa sopi eri ma ageia ’diyi ma milia ku; eringa ’yo o’duko urusi, ’Ba dria ma fu ma vurisi ra. ’Dini ’ba aluni soni pa eri be ku Yusufuni i e’daria nizaru i adripi dri. 2Eri wu o’duko urusi; ’ba Misiria ’diyi nga eri ra, ’ba Farau vile joa ’diyi nga eri indio 3#’Yeta 7:13; Mat 14:26; Mar 6:50Yusufu nga ’yo i adripi ma tia, Ma Yusufu’i; ma atini nga idriru ya? Te adripi erini econi e’yo omvizaru eri ma tia ku, yi ma asini otile yini eri ma mile rulerisi.
4 #
E’do 37:28
Yusufu nga ’yo i adripi ma tia, Ma zi emi, emi esi ma vu ogogo fo. Yi nga di ani esi ogogo ra. Eri nga ’yo ra, Ma emi adri Yusufu, emini; ndra fele ozile Misiriari’i. 5#Isa 40:2; 2 Kor 2:7; E’do 50:20; Azi 23:14; 2 Sam 16:10, 11; Zab 33:18, 19; ’Yeta 4:24; 2 Pet 2:9Te di, candi ma fu emi ku, aoko ma nya vini emi emini fele ma ozile ’doarisi, ku; a’disiku Mungu pe ma ti emi, drilia ’ba ma idri ta mbazu. 6Liki ’de angua eli iri ’bo, te eli ’bani ani ngazu amvu ’yazu ku azini nyaka lozu ku ’diyi ace nga towi indi. 7Te Mungu pe ma ti emi drilia ’ba emini ma joloko ta mbazu nyakua, azini emi idri pazu pata amborusi. 8#E’do 41:43; Lip 17:10; Yob 29:16Ka’dini emi peni ma ti ’doa emi’i ku, te Mungu’i; eri ’ba ma ovuzu Farau dri ataru, azini opiru ’ba dria eri ma joa ’diyi ma drilia, ’ba vini ma opiru ’ba dri cezu angu Misiriari ma drilia dria. 9#’Yeta 7:14Emi ma ’ye mbele mbele, emi tu mu ma ati vu, emi ma ’yo eri tia, Mi mvi Yusufu ’yo ’dini, Mungu ’ba ma opiru Misiri ma drilia dria; mi esi ma vu, mi ci dri ku; 10#E’do 47:1te mi nga ovu angu Gosenia, mi nga ovu ma be ogogo, mi’i anzi mini pie, mi anzi ma anzipi pie, anyapa mini nyiri ’diyi pie, ’wara’diyi pie, afa dria mini ovuzu yi be ’diyi pie dria; 11#1 Tim 5:4ma nga nyaka fe mi dri ’dale, a’disiku liki ma eli ace nga towi; mi kazu ecazu ’ba alioru ku, mi’i, ’ba mi vile joa ’diyi pie, afa dria mini ovuzu yi be ’diyi pie dria. 12#E’do 42:23Te mi ndre, emi ndre emi milesi, azini ma adri Benyamini ndre vini i ma milesi indi, kini, ma ngulupini e’yo ’yo emi tia ma tisi ma’i. 13#Kal 18:12, 29; ’Yeta 7:14Emi nga diza mani dria angu Misiriari ma e’yo olu ma ati tia, afa dria emini ndrele ’diyi be. Te emi nga ’ye mbele mbele, emi nga ma atini eji ’doa ra. 14Eri nga i adri Benyaminini 0’de ombelea, nga wu mindresi; Benyamini nga vini wu mindresi eri ma ombelea indi. 15Eri nga i adripi dria ma o’bolo ndru, nga wu mindresi yi ma dria; vutinia eri ma adripi nga di e’yo ’yo eri be ndo.
16E’yoni nga di ku kpere Farau ma joa kini, Adripi Yusufuni yi eca ’bo; e’yo nde nga ayiko fe tu Farau pi dri ati’ba erini be. 17Farau nga ’yo Yusufu tia, Mi ’yo mi adripi tia, Emi ’ye ’dini: emi o’ba afa akanya emini ma dria, emi fu mu angu Kanania; 18#E’do 27:28emi ewu emi ati pi ’ba emi vile joa ’diyi be, emi emu ma vu; ma nga angu Misirini ma esele onyiru turi fe emi dri, emi nga angu ’doari ma oso nya ra. 19Curu’do azi e’yo mi tia ’bo, emi ’ye ’dini: emi ma o’du magali engazu angu Misiriariasi anzi nyiri nyiri emini ’diyi pi ejizu oku emini be, emi eji emi atini, emi emu. 20Emi ma ega afa emini ma e’yo ku, afa onyiru angu Misiriaria ’diyi driani ovule eminirisi.
21Anzi Israelini nga di ’ye ’dinile ra; Yusufu nga yi dri magali fe ekile Farauni azilerile, nga yi dri nyaka gerini fe indi. 22Eri fe yi dri dria alu alu bongo bongo elezuri; te Benyamini dri eri re silingi dahaburu turu na azini bongo elezu ’diyi towi. 23Eri nga ara ti pe i ati vu ’dinile: akanya mudri afa onyiru Misiria ’diyi jizu, te akanya andripi mudri auya pi jizu mikate pie, nyaka i atini ngale nya1e geriari be. 24’Dini eri pe i adripi ma ti mvizu, yi nga di mu ra; eri nga ’yo yi tia, Emi ndre emi awa geria ku ya! 25Yi nga di tu uru t’uzu Misiria, nga eli angu Kananiaria yi ati Yakobo vu. 26#Yob 29:24; Zab 126:1; Luk 24:11, 41Yi nga e’yo olu eri tia, kini, Yusufuni nga idriru, eri opiru angu Misiriari ma drilia dria! Eri ma ava oti ra, erini yi ma e’yo a’ile kurisi. 27Yi nga e’yo Yusufuni ’yole yi tia ’diyi ’olu eri ma tia dria, te eri ka magali Yusufuni ti epele eri jizu ’diyi ndre ra, yi ati Yakobo nga i asi omvi ra; 28Israeli nga ’yo ra, Awa’do; ma mvi Yusufuni nga idriru; ama nga di mu ama ne eri be, de nga ma drani ku.
Zur Zeit ausgewählt:
E’doza 45: LB66
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible in Lugbara © United Bible Societies, 1966.
