Efuza 4
4
1Musa omvi e’yo, eri ’yo ra, Te mi ne, yi ngani e’yo mani a’i ku, yi ngani o’duko mani eri ku indi; te yi nga ’yo, Yehova efuni mi milia ’de ku. 2Te Yehova ’yo eri tia, Mi dria ’di a’di afani ya? Eri ’yo ra, Kalini. 3Eri ’yo ra, Mi ’be eri nyakua. Eri ’be eri nyakua, nga i oja uriru; Musa nzu erisi nzu nzu. 4Yehova ’yo Musa tia, Mi eju mi dri, mi bi sobini-eri eju i dri, bi eri ra, eri nga di ofu kaliru eri ma dria 5#Efu 19:9’dini yi ma a’i kini Yehova Mungu yi ma a’bipiniri, Mungu Iburahimuni, Mungu Isakani, Mungu Yakoboni, eri e’da i mi milia ’bo 6#Kal 12:10; 2 Opi 5:27Yehova ’yo vini eri tia e’yo azini ’dini, Mi su mi dri mi agatia. Te eri su i dri i agatia; ka enze i agatiasi, mi ne, ofu nya eri ma dri emve forotoru. 7#Kal 12:13, 14; Azi 32:39; 2 Opi 5:14; Mat 8:3Mungu ’yo, Mi su mi dri mi agatia dika. ’Dini eri su i dri i agatia dika; te ka enze i agatiasi ’bo, mi ne, oja i dika ekile eri ma rua adarile. 8Te eri nga eca ’dini, yi ka mi a’i ku, yi ka eceta amboru okori ma o’duko eri ku, ka’dini yi nga eceta vileri a’i’i. 9#Efu 7:19Eri nga eca ’dini, yi ka eceta ’diyi iri tro a’i ku, azini ka 0’duko mini eri ku, ka ’dini mi nga yi eko yi ara Nilia, mi nga yiniri da nyaku a’wiru ma dria; te yi mini ekole yi ara Niliari nga i oja ariru nyaku a’wiru nderi ma dria.
10 #
Efu 6:12; Yer 1:6 Te Musa ’yo Yehova tia, Wo wo! Opi la! Ecazu curu’do ti mani ndrini e’yo ’yozu ku, azini vini engazu mini ’baria e’yo ’yoria mi ati’bo be ’borisi ti, ma tini ovu be ’dinile; a’disiku ma e’yo ’yo e’yere, ma andreni adri e’yo ombe ombe. 11#Zab 94:9Te Yehova ’yo eri tia, A’di ’ba ’ba tini ya? A’di ’ba ’bani ovuzu ti be ndi ndiruni ya, kani bile be dirinyaru, kani mile be afa ndrezu, kani afa ndrezu kurini ya? Eri ovuni ma’i Yehova’i ku va? 12#Isa 50:4; Yer 1:9; Mat 10:19; Mar 13:11; Luk 12:11, 12; 21:14Ka’dini mi mu di, ma nga ovu ti mini be tualu, ma nga mi imba e’yo mini ngale ’yolerisi ra. 13#Yon 1:3Te eri omvi e’yo kini, Opi la! mi pe tini ’ba mini lele tini peleri ma dria fo! 14Te Yehova ovu aokosi Musa vu, eri ’yo ra, Mi adri Aroni ’ba Levinini yo ya? Ma ni ra, ti erini eco e’yo ’yozaru onyiru; azini vini indi, mi ne, eri emu curu’do dri fuzu mi be, ka nga mi ne ’bo, asi eriniri nga ovu ayikosi, 15#Kal 23:12; Azi 18:18; Isa 51:16; Yer 1:9; Azi 5:31Te mi nga e’yo ’yo eri tia, mi nga e’yo ’ba eri tilia; ma nga ovu ti mini be, ti erini be indi, ma nga vini emi imba e’yo emini ngale ’yelerisi. 16#Efu 7:1; 18:19Eri nga e’yo olu mi ma paria ’ba ongulumuru driliani; te eri nga eca ’dini, eri’i eri nga ovu tile miniru, mi’i mi nga ovu Mungu erinile. 17Te mi nga kali ’dori ’du mi dria, eceta amboru nde ’diyi ’yezu erisi.
Musani emvizu Misiriari
18Musa mu ra, eri mvi Yetero i anyi vu, ’yo tinia kini, Ma zi mi tia, Kiri kiri mi ku nga ma mu mvi adripi mani angu Misiria ’diyi vu, yi nezu kani yi nga indi ya. Te Yetero ’yo Musa tia, Mi mu asi anzuru be. 19#Efu 2:15, 23; Mat 2:20Te Yehova ’yo Musa tia angu Midiani ma alia, Mi mu, mi mvi angu Misiria; a’disiku ’ba ndra lepi mi fupi ’diyi odra di dria ’bo. 20#Efu 17:9; Kal 20:8Musa ’du oku erini anzi be, ’ba yi akanya dria, mvi Misiria ra; te Musa nga di kali Munguni ’du i dria. 21#Yos 11:20; 1 Sam 6:6; Dan 5:20; Rum 9:14-23; Yak 1:13-17Yehova ’yo Musa tia kini, Mi ka mvi Misiria ’dale ’bo, mi ma ne mi ’ye eceta dria mani fele mi dri ’diyi Parau drilia; te ma nga asi erini ’ba mbazaru, eri ngani ku ’ba nde ’diyini muzu ku. 22#Hos 11:1; Rum 9:4; 2 Kor 6:18; Yer 31:9; Yak 1:18Mi nga ’yo ’dini Farau tia kini, Yehova ’yo ’dini, Israeli eri amurumva mani okori’i, 23#Efu 11:5; 12:29ma ’yo mi tia ’bo, Mi ku mva mani ma mu azi ngazu ma dri ani; te mi oga geri eri dri mu kosi ’bo; mi ne, e’yo ’disi ma nga mva mini amurumvaru okori fu.
24 #
Kal 22:22; E’do 17:14 Eri eca ’dini, pari yini lazu geriaria, Yehova fu dri eri be, eri ’ye eri fu fu. 25#Yos 5:2, 3O’du nderisi Zipora eri ’du oni were cizaru, eri li mva ini ma agele, eri ’be enyiniri Musa ma palaa, ’yo ra, Ada mi de di ma dri izio ari ofupiri’i! 26’Dini Mungu ku eri ra. O’du nderisi eri ’yo kini, Mi de di izio ari ofupiri’i, agele liza ma e’yosi.
27 #
Efu 3:1
Yehova ’yo Aroni tia, Mi mu roko dria dri fuzu Musa be. Eri mu ra, isu eri oni Munguni dria, eri o’de ’eri avasi. 28Te Musa ’yo Aroni tia e’yo dria Munguni eri ti pele ’yozu ’diyi, azini eceta dria erini azile, eri dri ’yezu ’diyi. 29#Efu 3:16Te Musa pi Aroni be yi mu ra, yi oku ’ba ’wara anzi Israelini ’diyi dria tualu. 30Aroni eri olu e’yo dria Yehovani ’yole Musa tiari, azini eri ’ye eceta ’diyi ’ba ongulumuru milia. 31#Efu 2:25; 3:16, 18; E’do 24:26; Efu 12:27; 1 Sur 29:20Te ’ba ongulumuru a’i ra; te yi ka eri Yehova andri anzi Israelini ’bo, ne candi yini ra, yi osu dri va inzizu.
Zur Zeit ausgewählt:
Efuza 4: LB66
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible in Lugbara © United Bible Societies, 1966.
