Efuza 22
22
Azita ’ba azi ma afa ma arioti ofezuri ma e’yosi ’diyi
1 #
2 Sam 12:6; Luk 19:8; O’be 6:31 Agu ka ti ogu, kani kabiloni, eri ka eri li kani ozi ra, eri nga ti ofe towi ti nde aluri ma arotiru, kani kabilo su kabilo alu ma arotiru. 2#Efu 20:15; Lev 19:11; Azi 5:19; Mat 6:19; 24:43; Luk 18:20; Rum 13:9; Efe 4:28; 1 Pet 4:15; Kal 35:27Te ka oguou isu jo eti luria, ka eri co kai, ka dra ra, ma ofe arini ku; 3#Efu 21:2; Mat 18:25te etuni efuzu drinia ’borisi, yi arini ofe ra. Te oguouni nga afa erini oguleri ofe; te ka eco ofezu ku, eri nga ovu jezaru ati’boru ogu erinisi. 4#Efu 21:16; O’be 6:31Te anyapa erini oguleri ka nga ovu idriru eri vu, eri ka ovu tini, kani akanyani, kani kabiloni, eri ma ofe pale iri.
5Te ’ba azini ka ’ba azini ma amvu fe eza, kani amvu zabibuni, ka anyapa erini ku saaru erini ’ba azini ma amvu ezazu ani, agu nderi nga afa esele onyiru agapi ra i vile amvuari, kani afa esele onyiru agapi ra nga i vile amvu zabibuniari, ofe tinia.
6Aci ka i pa, ka ti ko oci ruaarisi, ’dini anya go driari, kani lole nga kuri, kani amvu nde ma adani ka ve, adaru agu ad nderi dupiri nga ofeni.
7’Ba azini ka silingi kani afa fe ’ba aku erini ejeliari dri tani mbazu, te ’ba azini ka nga eri ogu agu nde vile joarisi ra, yi ka oguou nde isu ra eri ma ofe pale iri. 8Te ka oguouni isu ku, jo e’i ma esi ogogo Mungu vu e’yoni ndazu kani i ma ngulupi su i dri i agyi ma afa alia ku ya.
9 #
Azi 25:1; 2 Sur 19:10 E’yo ezatanisi dria, kani e’yo tini, kani akanyani, kani kabiloni, kani bongoni, kani afa ngoni ngori ka avi, ’ba aluni ani ’yozu, Eri ’di’i-ri ma e’yosi, yi iri tro ma e’yo ma eca Mungu drilia; ’ba Munguni e’yoni lile onziri nga i agyini ofe pale iri.
10’Ba azini ka akanya fe, kani tini, kani kabiloni, kani anyapa azini ’ba i aku ejeliari dri tani mbazu, ka dra ra, kani afa azini ’ye erini, kani agu dro eri ’bani nekokoru, 11#Ebra 6:16oyo soza Yehovani ma adri yi ma eselia iri tro, e’yoni ndazu kani i su i dri i ma agyi ma afa alia ku ya; te anyapa nderi ma e’i ma a’i e’yoni ra, agu nderi ngani ofe ku. 12#E’do 31:39Te eri ka ovu oguzaru eri vu ’dasi, eri ma ofe e’i dri be. 13Te nguru ka eri cini, eri ma eji avuni ecezu, eri ngani nguruni cileniri ofe ku.
14Agu ka anyapa a’i i agyi dri, afa ka eri ’ye ra, kani dra dra, e’ini ovuzu yoria, eri ngani ece ofezu ku. 15E’i ka ovu indi, eri ngani ofe ku; ka eri omve azi ngazu oyasi, eri emu mi vu oya nde ’dasi.
Azita ’bani adrizu yi eselia ngoni yari ma e’yosi ’diyi
16 #
Azi 22:28-29
’Ba azini ka zamva ’bale jele kuri ma bile o’bu, ka la erisini, eri ma fe a’bu eri jezu oku eriniru ecekokoru. 17#1 Sam 18:25Ati ka ga eri fekokoru eri dri si, eri ma ofe ali alirianiri’i.
18 #
Azi 18:10-11
Mi ma ku oku enaa beri ma ovu idriru ku.
19 #
Lev 18:23; 20:15-16; Azi 27:21 ’Ba dria alu alu lapi anyapa beri, ma fu eri ecekokoru.
20 #
Azi 13:1; 17:2-7; Kal 25:2; Hos 8:14; 1 Opi 18:40 ’Ba edeta edepi Mungu azini dri, kiri Yehova dri a’dule kuri, ma ja eri dri teketeke ra.
21 #
Efu 23:9; Lev 19:33-34; 25:35; Azi 10:19; Zek 7:10; Mal 3:5; Azi 24:17-18; 27:19 Emi ma ’ye ani’bo onzi ku, emi inza eri ku indi, emini ovule ndra angu Misirinia ani’banirisi. 22#Isa 1:17; Eze 22:7; Azi 10:18Emi ecandi oku awuzioru kani mva imvoaruri ku. 23#Azi 15:9; Yob 35:9; 34:28; Yak 5:4Mi ka yi dri candi fe e’yo ngonirisi ti, yi ka wu ma vu, ma nga wuta yini eri adaru; 24#Yob 31:23; Zab 109:9adra mani nga di aciru, ma nga emi ofu seisi, oku emini nga ovu awuzioru, anzi emini nga ovu imvoanziru indi.
25 #
Lev 25:35-38; Azi 15:7-11; 23:19-20; Neh 5:7; Eze 18:8 Mi ka silingi fe ’ba alioru ’ba mani ovupi mi be ’diyi ma eseliari dri mariru, mi ma ovu ekile ’ba adripi mari fepirile ku, mi ’ba drinia orodri azini ku. 26#Azi 24:10-13; Yob 24:3; O’be 20:16; Amo 2:8Mi ka bongo ’ba aku mini ejeliarini ’du toboru, mi ma omvi eri dri de etu ’deni ku; 27a’disiku bongo nderi ovu bongo erini alu a’dule i ma rua a’buzuri; eri nga la a’disi ya? Eri nga eca ’dini, eri ka wu ma vu, ma nga eri ra, mani ovule asi ndriza berisi.
28 #
’Yeta 23:5; Ekl 10:20; 2 Pet 2:10 Mi ma o’da Mungu ku, mi ma otri ambo suru emininiri ku indi.
29 #
O’be 3:9
Mi ma te ku anya kapi mi vile a’ucea ’diyi ma esele fezu ma dri, azini patiefi su mini ma esele indi.
Mi fe ma dri amuruamva osipi oko agupianzi mini ma eseliari. 30#Azi 15:19; Lev 22:27Mi ’ye ’dini indi ti minisi, kabilo mini pie; eri ma ovu andri erini be o’du aziri, o’du arosi mi ma fe eri ma dri ndo.
31 #
Lev 17:15; 19:2; Eze 4:14 Te emi ma ovu ’ba alatararu ma dri; e’yo ’disi mi nya za nguruni die aseaniri aluni ku; mi ’be eri oce dri.
Zur Zeit ausgewählt:
Efuza 22: LB66
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible in Lugbara © United Bible Societies, 1966.
