मरकुस 8

चार ह्जार लोका खे खुलाणा

(मत्ती 15:32-39)

1तिना दिना रे जेबे बड़ी पीड़ कट्ठी ऊई और तिना गे कुछ खाणे खे नि था, तेबे तिने आपणे चेलेया खे आपू गे बुलाई की बोलेया, 2“माखे एसा पीड़ा पाँदे तरस आओआ, कऊँकि ये तीन दिना ते बराबर मां साथे ए और इना गे कुछ बी एबे खाणे खे निए। 3जे आऊँ इना खे पूखा कअरो खे पेजुँगा, तो यो बाटा रेई थकी जाणे, कऊँकि इना बीचा ते कोई-कोई बड़ी दूरो ते आई रे।” 4तिना रे चेलेया तिना खे बोलेया, “एती सुनसाण जगा रे इतणिया सारिया रोटिया केथा ते ल्याईए, ताकि यो रज्जी जाओ?” 5यीशुए तिना ते पूछेया, “तुसा गे कितणी रोटिया ए?” तिने बोलेया, “सात।”

6तेबे यीशुए तिना खे बोलेया, “जमीना पाँदे बैठी जाओ।” तिने सेयो सात रोटिया लईया और परमेशरो रा धन्यवाद करी की तोड़िया और आपणे चेलेया खे देंदे गए कि इना लोका खे देओ, और सेयो लोका खे देंदे गए। 7तिना गे थोड़ी जिया छोटिया मछलिया बी थिया और यीशुए सेयो बी धन्यवाद करी की लोका खे देणे खे बोलेया। 8तेबे सेयो खाई की रज्जी गे और जो टुकड़े बची रे थे तिना रे सात बड़े टोकरू परी की चके। 9खाणे वाल़े तकरीबन चार ह्जार लोक थे; तेबे तिने सेयो बिदा करी ते। 10तेबे यीशु आपणेया चेलेया साथे किस्तिया पाँदे चढ़ी की दलमनूता नाओं रे नगरो खे चली गे।

फरीसिया रे जरिए स्वर्गो रे चिह्नो री माँग

(मत्ती 16:1-4)

11तेबे फरीसी यीशुए साथे बईस करने लगे और तिना खे परखणे खे बोलेया, “कोई स्वर्गिय चिह्न् बता।” 12तिने लांबा साआ परी की बोलेया, “एते जमाने रे लोक चिह्न् कऊँ टोल़ोए? आऊँ तुसा खे सच्च बोलूँआ कि एस बखतो रे लोका खे कोई बी चिह्न् नि देणा।” 13तेबे सेयो तिना खे छाडी की किस्तिया रे बैठे और पार चली गे

फरीसी और हेरोदेसो रा सजेड़ा

(मत्ती 16:5-12)

14चेले रोटिया लणा पूली गे थे और किस्तिया रे तिना गे बस एक ई रोटी थी। 15तेबे यीशुए सेयो सावधान कित्ते कि देखो, “फरीसिये रे सजेड़े और हेरोदेसो रे सजेड़े ते चौकस रएयो” 16चेले आपू बीचे सोच-बिचार करी की बोलणे लगे, “से इजी खे बोलोआ कऊँकि आसा गे तो रोटी आए ई नि।” 17ये जाणी की यीशुए तिना खे बोलेया, “तुसे आपू बीचे ये बिचार कऊँ लगी रे करने कि आसा गे रोटी निए? क्या एबुए तक नि जाणदे और समजदे नि? क्या तुसा रे अक्ल निए? 18क्या आखी ऊँदे ऊए पनि देखदे और कान ऊँदे ऊए पनि सुणदे? क्या तुसा खे याद निए? 19कि जेबे मैं पाँज ह्जार लोका खे पाँज रोटिया तोड़िया थिया और तुसे टुकड़े रिया कितणिया टोकरिया चकिया थिया?” तिने तिना खे बोलेया, “बारा टोकरिया।” 20यीशुए फेर पूछेया, “जेबे चार ह्जारा लोका खे सात रोटिया थिया, तो तेबे तुसे टुकड़े रिया कितणिया टोकरिया चकिया थिया?” चेलेया बोलेया, “सात टोकरिया।” 21यीशुए तिना खे बोलेया, “क्या तुसे एबुए तक नि समजदे?”

बैतसैदा रे एक अन्दे खे ठीक करना

22तेबे सेयो बैतसैदा नगरो खे आए और लोक एक अन्दे खे यीशुए गे ल्याए और बिनती कित्ती कि तुसे एसखे छुँईं देओ। 23तेबे यीशु तेस अन्दे खे आथ पकड़ी की गांव ते बारे लईगे और तेसरी आखी पाँदे थूकी की आथ राखे और तेसते पूछेया, “क्या तूँ देखी सकेया?” 24तिने आखी चकी की बोलेया, “आऊँ माणूंआ खे देखी सकूँआ, सेयो माखे चलदे ऊए डाल़ा जेड़े दिशोए।” 25तेबे यीशुए तेसरी आखी पाँदे फेर आथ राखे और तेबे तिने अन्दे त्यानो साथे देखेया और से ठीक ऊईगा और सब कुछ साफ-साफ देखणे लगेया। 26यीशुए से कअरो खे पेजेया और तेसखे बोलेया, “एस गांव रे पीतरे पैर पनि राखणा।”

पतरसो रा यीशुए खे मसीह मानणा

(मत्ती 16:13-20; लूका 9:18-21)

27यीशु और तिना रे चेले कैसरिया फिलिपिया नगरो रे नेड़े-तेड़े गांव खे चली गे; तेबे यीशुए बाटा रे तिना ते पूछेया, “लोक माखे क्या बोलोए?” 28चेलेया जबाब दित्तेया, “यूहन्ना बपतिस्मा देणे वाल़ा; पर कोई-कोई एलिय्याह और कोई-कोई भविष्यबक्ता बीचा ते एक बी बोलोए।” 29यीशुए तिना ते पूछेया, “पर तुसे माखे क्या बोलोए?” पतरसे तिना खे बोलेया, “तुसे मसीह ए, परमेशरो रे पेजे रे।” 30तेबे यीशुए तिना खे सावधान करी की बोलेया, ये केसी गे नि बताणा, “आँऊ ई मसीह ए।”

आपणी मौता रे बारे रे यीशुए री भविष्यबाणी

(मत्ती 16:21-23; लूका 9:22)

31तेबे यीशु तिना खे बताणे लगे कि, “मां माणूं रे पुत्रो खे जरूरी ए कि आँऊ बऊत दु:ख उठाऊँ और बुजुर्ग, बड़े पुरोईत और शास्त्री माखे तुच्छ जाणी की काई देओ और आँऊ तीजे दिने जिऊँदा ऊई जाऊँ।” 32यीशुए तिना खे साफ-साफ बताईता। ये सुणी की पतरस तिना खे लग जे लईगा और थिड़कणे लगेया। 33पर यीशु मुड़े और आपणेया चेलेया खे देखी की पतरसो खे थिड़कणे लगे, “ओ शैतान! मेरी नजरा ते दूर ऊई जा; कऊँकि तूँ परमेशरो रिया गल्ला रे नि, पर माणूंए रिया गल्ला पाँदे आपणा मन लगाएया।”

यीशुए पीछे चलणे रा मतलब

(मत्ती 16:24-28; लूका 9:23-27)

34यीशुए पीड़ा समेत आपणे चेले आपू गे बुलाए और तिना खे बोलेया, “जो कोई मां पीछे आऊणा चाओआ, से आपणा सब कुछ छाडी की और आपणे दुःखो और कष्टा रा क्रूस चकी की आपणी इच्छा ते मां पीछे आई जाओ। 35कऊँकि जो कोई आपणा प्राण बचाणा चाओगा, तेस से खोणा, पर जो कोई मेरिया और सुसमाचारो रिया तँईं आपणे प्राण देओगा, तेस सच्ची ई आपणे प्राण बचाणे। 36जे माणूंए खे सारी दुनिया मिली जाओ, और आपणे ई प्राण नि रओ, तो तेसखे क्या फाईदा? 37और माणूंए आपणे प्राणो रे बदले ओर क्या देई सकोआ? 38जो कोई एसा व्याभिचारिया और पापी जातिया बीचे, मांते और मेरिया गल्ला ते शर्माओगा, तो तेबे मां माणूं रा पुत्रो बी, जेबे पवित्र स्वर्गदूता साथे आपणे पिते री महिमा साथे आऊणा, तो मां बी तेसते शर्माणा।”

Zur Zeit ausgewählt:

मरकुस 8: BGH

Markierung

Kopieren

Vergleichen