मीका 6
6
इस्राएलो रा दोष
1जो गल्ल परमेशर बोलोआ, तिजी खे सुणो, खड़े ऊई जाओ ओर मेरे खलाफ आपणा मामला बताओ। पाह्ड़ा ओर पाह्ड़िया खे आपणे गवा बणने देयो। 2ओ पाह्ड़ो, ओ तरतिया री अटल़ निऊँ, यहोवे रा मामला सुणो! यहोवे गे आपणे लोका रे खलाफ एक मामला ए। से इस्राएलो रे खलाफ दोष लगाणे जाणे लगी रा। 3से बोलोआ, “ओ मेरी प्रजा, मैं तेरा क्या बगाड़ी राखेया? ओर मैं क्या करी की तूँ मुसीबता दे पाया? माखे ज्वाब दे! 4मेरे खलाफ गवाई दे! आऊँ तो ताखे मिस्र देशो ते निकयाल़ी की ल्याया ओर तूँ गुलामिया ते छुड़ाया ओर तेरी अगुवाई करने खे मूसा, हारूण ओर मरियम पेजी ते।”
5ओ मेरी प्रजा, याद कर कि मोआबो रे राजा बालाके तेरे खलाफ क्या साजिश कित्ती? ओर बोरो रे पाऊ बिलामे तुसा खे आर्शीवाद किंयाँ दित्तेया? ओर शित्तीमो रे बणो ते गिलगालो तक री आपणी यात्रा खे याद करो, जेबे मैं, यहोवे तुसा खे सच्चाईया रे बारे दे सखाणे रिया तँईं सबी तरआ री कोशिश कित्ती थी। 6इस्राएलो रे लोके बोलेया, “आसे क्या लई की तां सामणे आऊँ ओर ऊबे रणे वाल़े परमेशरो सामणे नपूँ? क्या आसे होमबलिया खे एक-एक सालो रे बाच्छू लई की तां सामणे आईए? 7क्या यहोवा कई ह्जार खाडूआ साथे या तेलो री लाखो नदिया साथे खुश ऊणा? क्या आऊँ आपणे पापो रे प्राश्चितो खे आपणे जेठे या आपणे पापो रे बदले आपणे बच्चेया बीचा ते केसी खे पेंट करी की देऊँ?” 8ओ माणूंआ, से माखे बताई चुकेया रा कि अच्छा क्या ए ओर यहोवा तांते ये सब छाडी की क्या चाओआ कि तूँ न्याय साथे काम करे ओर कृपा साथे प्यार राखे ओर आपणे परमेशरो साथे नम्र ऊई की चले।
9आऊँ यहोवा ए, इजी री खातर जे तुसे समजदार ओ, तो तुसा खे मेरा आदर करना चाईयो। आऊँ यरूशलेमो रे लोका खे बुलाऊँआ, तुसारे शईरो खे नाश करने वाल़िया सेना आऊणे लगी रिया, इजी री खातर मां पाँदे त्यान देयो, जो तिना खे आपणे सोठे ते तुसा खे सजा देणे खे उकसाणे लगी रा। 10आऊँ तिना दुष्टा रे कअरा रे बारे दे क्या बोलूँ जो तोखा देई की कमाए रे खजाने ते परी रे ए? बेईमानिया ते नापी की नज्ज नापणे री बुरी प्रथा रे बारे दे क्या बोलूँ? 11आऊँ तिना लोका खे कियाँ माफ करी सकूँआ जो छलो री ताकड़िया ओर चूठे बट्टेया री थैलिया रा इस्तेमाल करोए? 12शईरो रे अमीर लोक बऊत बुरे ए। जेती हर कोई एड़िया गल्ला बोलोआ जो सच्च नि ए। सब छलो रिया गल्ला बोलोए।
13इजी री खातर मैं तुसा खे कुटणा शुरू करिता दा ए। मैं तुसे नाश करना शुरू करीते दे ए कऊँकि तुसे बऊत पाप करी राखे। 14तां खाणा, पर रज्जणा नि, तेरा पेट फूखदा ई रणा ओर तूँ आपणी सम्पत्ति लई की चलणा, पर बचायी नि सकणा ओर जो कुछ तूँ बचायी बी लएगा, से मां तिना लोका खे देई देणी जिना तुसे तलवारे की अराई देणे। 15तां बेजा बाणा, पर तुँ कोई बी फसल बाडी नि सकणा। तां जैतूनो रा तेल निकयाल़ना, पर तिजी रा इस्तेमाल नि करी सकणा। तां अंगूर केसणे, पर तुँ तिजी ते बणी दी शराब पी नि सकणा। 16तुसे ओम्री राजे री बिधिया मानोए। तुसे सेई कित्तेया जो राजा अहाबे ओर तेसरे सबी लोके कित्तेया था। तुसे तिना रे बुरे बिचारा री नकल कित्ती। इजी री खातर मां तुसे ओर तुसा रिया सारिया चीजा पूरी तरआ ते नाश करी देणियां। तेबे दूजे देशा रे लोका तुसा पाँदे ना तो दया करनी ओर ना ई नम्र ऊणे। इजी रे बदले तिना तुसे बेज्जत करने।
Zur Zeit ausgewählt:
मीका 6: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
