हाग्गै 1
1
मन्दरो रे दुबारा बनाणे री आज्ञा
1परमेशरो रिया तरफा ते एक सन्देश हाग्गै भविष्यवक्ते गे दर्शणो दे आया। हाग्गैये ये जरूब्बाबेल ओर यहोशूए खे दित्तेया। जरूब्बाबेल यहूदा प्रदेशो रा राज्यपाल ओर शालतीएलो रा पाऊ था। यहोशू बड़ा पुरोईत ओर यहोसादाको रा पाऊ था। ये सन्देश फारसो रे राजा दारा रे राजो रे दूजे सालो रे छठे मीन्ने रे पईले दिने आया। हाग्गैये जो बोलेया से ईंयाँ ए, 2सेना रा यहोवा ईंयाँ बोलोआ, “यो लोक बोलोए कि परमेशरो रे मन्दरो खे बनाणे रा बखत नि आई रा” 3तेबे यहोवे रा ये वचन हाग्गै भविष्यबक्ते रे जरीये पऊँछेया: 4तेबे तुसा रा बड़े ओर बांके कअरो दे रणा बी सई नि आ, जेबे कि मेरा ये मन्दर टूटेया-फूटेया दा पड़ी रा ए, 5इजी री खातर सेना रा यहोवा ईंयाँ बोलोआ, “जो कुछ बीतणे लगी रा तीजी रे बारे दे सोचो, 6तुसे बाया तो बऊत, पर बाडेया थोड़ा जा, तुसे खाओ तो आए, पर पेट नि फरदा, तुसे पियो तो आए, पर त्याय नि मिटदी, तुसे टाल्ले पईनोए, पर गर्म नि ऊँदे ओर तुसा री मईणता री कमाई एड़ी राची जाओई मानो तुसे से छेदा वाल़िया थैलिया दे पाई राखी ओ।”
7सेना रा यहोवा तुसा खे ईंयाँ बोलोआ, “जो कुछ बीतणे लगी रा तीजी रे बारे दे सोचो, 8पाह्ड़ो पाँदे चढ़ी जाओ ओर लकड़ी ली आओ ओर एस मन्दरो खे बणाओ ओर आऊँ तेसखे देखी की खुश ऊणा ओर मेरी महिमा ऊणी” परमेशरो रा येई वचन ए। 9तुसे बऊत फसला री उम्मीद राखी, पर देखो, थोड़ी जी ए ओर जेबे तुसे तिजी खे कअरे ल्याये, तेबे मैं से उडाई ती। सेना रे यहोवे री ये बाणी ए, एड़ा कऊँ ऊआ? क्या इजी खे नि मेरा मन्दर उजाड़ पड़ी रा, पर तुसा सबी लोका खे आपणे-आपणे कअरो री पड़ी री ए। 10इजी बजा ते सर्गो ते बर्खा ऊणा ओर तरतिया दे नज्ज उगणा दोनो बन्द ए। 11मैं डोरूआ ओर पाह्ड़ा पाँदे बर्खा ना ऊणे री आज्ञा देई राखी। फेर जमीना दे नज्ज नि जम्मी सकेया। ताजा अंगूरा रा रस बनाणे खे अंगूर नि थे। डाल़ा पाँदे तेल बनाणे खे जैतून नि थे। लोका ओर डांगरा खे नुकशाण सईन करना पड़ेया। तुसा री सारी मईणत बेकार ऊईगी।
12तेबे शालतीएलो रे पाऊ जरूब्बाबेल ओर यहोसादाको रे पाऊ यहोशू बड़े पुरोईते सब बचे रे लोका समेत आपणे परमेशर यहोवे री आज्ञा मानी ओर जो वचन तिना रे परमेशर यहोवे तिना खे बोलणे खे हाग्गै भविष्यबक्ता पेजेया था, तिने से मानी ला ओर लोके परमेशरो रा डर मानेया। 13तेबे परमेशरो रे दूत हाग्गै परमेशरो ते आज्ञा लई की तिना खे बोलेया, “परमेशर ईंयाँ बोलोआ कि आऊँ तुसा साथे ए।” 14इजी री खातर यहोवे शालतीएलो रे पाऊ जरूब्बाबेल जो यहूदा रा राज्यपाल था, ओर यहोसादाको रे पाऊ बड़ा पुरोईत यहोशूए रा मन उभारेया। यहोवे सब बचे रे लोका रे मन बी तिना री मताद करने खे उभारे। तेबे सबी यहोवे रे मन्दरो दे काम करना शुरू कित्तेया जो सबी पाँदे राज करोआ। से तिना रा परमेशर ए। 15ये राजा दारा रे दूजे सालो रे छठे मीन्ने रे चौबिये दिने ऊआ।
Zur Zeit ausgewählt:
हाग्गै 1: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.