उत्पत्ति 35
35
याकूबो रा बेतेलो खे वापस आऊणा
1तिजी ते बाद परमेशरे याकूबो खे बोलेया, “एथा ते निकल़ी की बेतेलो खे जा ओर तेथी रओ; ओर तेती परमेशरो खे बेदी बणा, जिने ताखे तेस बखते दर्शण दित्तेया, जेबे तूँ आपणे पाई एसावो रे डरो रे मारे नठणे लगी रा था।”
2तेबे याकूबे आपणे कराने ते ओर तिना सबी खे जो तेस साथे थे, बोलेया, “तुसा बीचे जो पराये देवता ए, तिना खे निकयाल़ी की सेटी देओ ओर आपू खे शुद्ध करो ओर आपणे टाल्ले बदली लओ; 3इजी खे आओ आसे एथा ते निकल़ी की बेतेलो खे चलूँए; तेती मां परमेशरो खे एक बेदी बनाणी, जिने मुसीबता रे बखते मेरी सुणी ओर जेते बाटा रे आऊँ चलूँ था, तिदे मां साथे रया।” 4इजी खे जितणे पराये देवता तिना गे थे ओर जितणे कुण्डल तिना रे कानो रे थे, सेयो सब तिने याकूबो खे दित्ते; ओर तिने सेयो तेस बड़े डाल़ो निठे जो शकेम शईरो रे नेड़े था, दबाईते। 5तेबे सेयो तेथा ते चली पड़े ओर तिना रे चऊँ कनारले शईरो दे रणे वाल़ेया रे मनो दे परमेशरो रिया तरफा ते एड़ा डर बैठीगा कि तिने याकूबो रे पाऊआ रा पीछा नि कित्तेया। 6याकूब तिना सबी समेत, जो तेस साथे थे, कनान प्रदेशो रे लूज शईरो खे आया। तेस शईरो खे बेतेल बी बोलोए। 7तेती तिने एक बेदी बणाई ओर तेसा जगा रा नाओं एलबेतेल राखेया; कऊँकि जेबे से आपणे पाईए रे डरो रे मारे नठणे लगी रा था, तेबे परमेशर तेस पाँदे तेथी प्रगट ऊआ था। 8ओर रिबका री दाई दबोरा मरी गी ओर से बेतेलो रे बड़े डाल़ा निठे दबाईती ओर तेस बड़े डाल़ो रा नाओं अल्लोनबक्कूत राखेया। 9फेर याकूबो रे पद्दनरामो ते आऊणे ते बाद परमेशरे तेसखे दर्शण देई की फेर आशीष दित्ती।
10ओर परमेशरे तेसखे बोलेया, “एबुओ तक तो तेरा नाओं याकूब रया, पर आगो खे तेरा नाओं याकूब नि रणा, ताखे इस्राएल बोलेया जाणा।” ईंयाँ तिने तेसरा नाओं इस्राएल राखेया। 11फेर परमेशरे तेसखे बोलेया, “आँऊ सर्वशक्तिमान परमेशर ए। तूँ फल़़ो-फूलो ओर बढ़ो; ओर तांते एक जाति, बल्कि जातिया री एक मण्डल़ी बी पैदा ऊणी ओर तेरे वंशो रे राजा पैदा ऊणे 12ओर जो प्रदेश मैं अब्राहम ओर इसहाको खे देई राखेया, सेई प्रदेश ताखे देऊँआ ओर तांते बाद तेरे वंशो खे बी देऊँगा।” 13तेबे परमेशर तेसा जगा ते, जेती तिने याकूबो साथे गल्ला कित्तिया तिना गे ते ऊबे चलीगा। 14ओर जेते जगा रे परमेशरे याकूबो साथे गल्ला कित्तिया, तेती याकूबे पात्थरो रा एक खम्बा खड़ा कित्तेया ओर तेते पाँदे अर्घ देई की तेल पाईता। 15जेती परमेशरे याकूबो साथे गल्ला कित्तिया, तेते जगा रा नाओं तिने बेतेल राखेया।
राहेला री मौत
16फेर सेयो बेतेलो ते चली पड़े ओर एप्रात थोड़ी ई दूर रईगा था कि राहेला खे बच्चा जमणे रिया बऊत पीड़ा आऊणे लगिया। 17जेबे तेसा खे बऊत ई जादा-जादा पीड़ा आओ थिया, तेबे दाईये तेसा खे बोलेया, “डर नि; एबे बी तेरे पाऊ ई ऊणा।” 18तेबे एड़ा ऊआ कि से मरी गी ओर प्राण निकल़दे-निकल़दे तेसे तेस पाऊए रा नाओं बेनोनी राखेया; पर तेसरे बाओ तेसरा नाओं बिन्यामीन राखेया। 19ओर राहेल मरी गी ओर एप्रात, मतलब बेतलेहमो री बाटा रे तेसा खे माट्टी दित्ती। 20ओर याकूबे तेसा री कब्रा पाँदे एक खम्बा खड़ा कित्तेया; राहेला री कब्रा रा सेई खम्बा आजो तक बणेया राए। 21फेर इस्राएल तेथा ते चली पड़ेया ओर तिने एदेर नाओं रे गुम्मटो ते आगे बढ़ी की आपणा तम्बू खड़ा कित्तेया।
याकूबो रे पाऊ
22जेबे इस्राएल तेस प्रदेशो रे बसेया था तेबे एक दिन एड़ा ऊआ कि रूबेने जाई की आपणे बाओ री रखैल बिल्हा साथे गल़त काम कित्तेया; ओर ये गल्ल इस्राएलो खे पता लगी गी। याकूबो रे बारा पाऊ ऊए। 23तिना बीचा ते लिआ रे पाऊ यो थे, मतलब याकूबो रा जेठा, रूबेन, फेर शिमोन, लेवी, यहूदा, इस्साकार ओर जबूलून। 24ओर राहेला रे पाऊ ये थे, मतलब यूसुफ ओर बिन्यामीन। 25ओर राहेला री दासी बिल्हा रे पाऊ ये थे, मतलब दान ओर नप्ताली। 26ओर लिआ री दासी जिल्पा रे पाऊ ये थे, मतलब गाद ओर आशेर। याकूबो रे येई पाऊ थे, जो तेसते पद्दनरामो रे पैदा ऊए।
इसहाको री मौत
27ओर याकूब मम्रे रे, जो किर्यतर्बा, मतलब हेब्रोन ए, जेती अब्राहम ओर इसहाक परदेशी ऊई की रओ थे, आपणे बाओ इसहाको गे आया।#35:27 इब्रानी 11:9 28इसहाको री उम्र 180 साल ऊई। 29ओर इसहाक स्याणा ओर पूरी उम्रा रा ऊई की आपणे मरे रे लोका साथे जाई की मिली गा; ओर तेसरे माठेया एसाव ओर याकूबे से दबाईता।
Zur Zeit ausgewählt:
उत्पत्ति 35: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
