उत्पत्ति 25
25
अब्राहमो री ओर लाड़िया ओर तेसरे पाऊ
1तेबे अब्राहमे एक ओर जवाणस ब्यायी जेसा रा नाओं कतूरा था। 2तेसा ते जिम्रान, योक्षान, मदना, मिद्यान, यिशबाक ओर शूह पैदा ऊए। 3योक्षानो ते शेबा ओर ददान पैदा ऊए। ददानो रे वंशो रे अश्शूरी, लतूसी ओर लुम्मी लोक ऊए। 4मिद्यानो रे पाऊ एपा, एपेर, हनोक, अबीदा ओर एल्दा ऊए। यो सारे कतूरा री ल्वाद ऊए। 5इसहाको खे तो अब्राहमे आपणा सब कुछ दित्तेया। 6पर अब्राहमे आपणियां रखैलिया रे पाऊआ खे आपणी जायदाता बीचा ते थोड़ा-थोड़ा देई की आपणे जिऊँदे जिऊए आपणे पाऊ इसहाको गे ते पूर्व प्रदेशो रे पेजी ते।
अब्राहमो री मौत
7अब्राहमो री सारी उम्र 175 साला री ऊई। 8अब्राहम जादा उम्र ऊणे रिया बजअ ते मतलब पूरे बुढ़ापे रे मरीगा ओर से आपणे पितरा साथे मिलीगा। 9ओर तेसरे पाऊए इसहाक ओर इश्माएले हित्ती सोहरो रे पाऊ एप्रोनो री मम्रे रे सामणे वाल़ी जमीना रे, जो मकपेला री गुफा थी, तेती तिने से दबाईता, 10मतलब जो जमीन अब्राहमे हित्तिया ते मोले लई थी, तिदे ई अब्राहम ओर तेसरी लाड़ी सारा दोनो जणे दबाईते। 11अब्राहमो रे मरने ते बाद परमेशरे तेसरे पाऊ इसहाको खे जो लहैरोई नाओं रे कुएँ रे नेड़े रओ था, आशीष दित्ती।
इश्माएलो रे खानदानो री सूची
12अब्राहमो रा पाऊ इश्माएल जो सारा री मिस्री दासी हाजिरा ते पैदा ऊआ था, तेसरा खानदान ये ए; 13इश्माएलो रे पाऊआ रे नाओं ओर खानदान ये ए; मतलब इश्माएलो रा जेठा पाऊ नबायोत, फेर केदार, अदबएल, मिबसाम, 14मिश्मा, दूमा, मस्सा, 15हदद, तेमा, यतूर, नापीश, ओर केदमा। 16इश्माएलो रे पाऊ यो ई ऊए ओर इना रे नाओं रे मुताबिक ई इना रे गाँवो ओर छावणिया रे नाओं पड़े ओर यो बारा परदान ई आपणे-आपणे कुलो रे ऊए। 17इश्माएलो री सारी उम्र 137 साला री ऊई, तेबे से मरीगा ओर से आपणे पितरा बीचे मिली गा। 18तेसरे वंश हवीला ते शूरो तक जो मिस्रो रे सामणे अश्शूरो रिया बाटा रे ए, बसी गे ओर तिना रा इस्सा तिना रे सारे पाई-बन्दुआ रे सामणे पड़ेया।
याकूब ओर एसावो रा जन्म
19अब्राहमो रे पाऊ इसहाको रा खानदान ये ए; अब्राहमो ते इसहाक पैदा ऊआ। 20ओर इसहाके चाल़िया साला रा ऊई की रिबका साथे, पद्दनरामो रे रणे वाल़े अरामी बतूएलो री बेटी ओर जो अरामी लाबानो री बईण थी, तेसा साथे ब्या करी ला। 21इसहाको री लाड़ी तो बांझ थी, तेबे तिने तेसा री खातर यहोवे ते बिनती कित्ती ओर यहोवे तेसरी बिनती सुणी। ईंयाँ तेसरी लाड़ी रिबका गर्भवती ऊई ओर तेसा रे गर्भो रे जुड़ूंआ बच्चे थे। 22माठे तेसा रे गर्भो रे आपू बीचे लिपटी की एकी-दूजे खे लाते बाणे लगे। तेबे तेसे बोलेया, “मां साथे एड़ा कऊँ ऊणे लगी रा?” ओर से यहोवे री इच्छा पूछणे गई।
23तेबे यहोवे तेसा खे बोलेया,
“तेरे गर्भो रे दो प्रदेश ए
ओर तेरी कोखा ते निकल़दे ई दो
राज्य रे लोक लग-लग ऊणे
ओर एकी राज्य रे लोक दूजे राज्य ते
जादा सामर्थी ऊणे ओर जेठा
छोटे रा दास ऊणा।”
24जेबे रिबका रे पाऊ पैदा ऊणे रा बखत आया तो क्या सामणे आया कि तेसा रे गर्भो रे जुड़ूंआ बच्चे ए। 25जो पईले जम्मेया से लाल निकल़ेया ओर तेसरा सारा शरीर काम्बल़ो जेड़ा बाल़ा वाल़ा था, इजी खे तेसरा नाओं एसाव राखेया। 26पीछे ते तेसरा पाई आपणे आथे की एसावो री आडी पकड़ी की पैदा ऊआ इजी खे तेसरा नाओं याकूब राखेया। जेबे रिबके तिना खे जन्म दित्तेया तेबे इसहाक 60 साला रा था।
एसावो रा आपणे बड़े ऊणे रा अक्क बेचणा
27फेर सेयो पाऊ बढ़ने लगे ओर एसाव तो बणो रे फिरदे चलाक शिकार खेलणे वाल़ा ऊईगा, पर याकूब शान्त सबाओ रा था ओर तम्बूए रे रया करो था। 28इसहाक तो एसावो रे शकारो रा मास खाया करो था, इजी री खातर से तेस साथे प्यार राखो था, पर रिबका याकूबो साथे प्यार राखो थी। 29एक दिन याकूब रोटी खाणे खे दाल़ पकाणे लगी रा था, तेसी बखते एसाव मैदानो ते थकी की आया।
30तेबे एसावे याकूबो खे बोलेया, “ये जो लाल दाल़ ए, इजी बीचा ते माखे कुछ खाणे खे दे कऊँकि आऊँ थकी रा।” इजी बजअ ते तेसखे एदोम बी बोलोए।
31याकूबे बोलेया, “आपणे जेठे ऊणे रा अक्क आज मेरे आथो रे बेची दे।”
32एसावे बोलेया, “देख, आऊँ मरने वाल़ा ए, एबे जेठे ऊणे ते मेरा क्या फायदा ऊणा?”
33याकूबे बोलेया, “पईले तो तूँ कसम खा।” इजी खे तिने तेसते कसम खाईली ओर आपणे जेठे ऊणे रा अक्क याकूबो खे बेचीता। 34इजी ते बाद याकूबे एसावो खे रोटी ओर पकाई री मस्सरा री दाल़ दित्ती ओर तिने खाया-पिया ओर उठी की चलीगा। ईंयाँ एसावे आपणा जेठे ऊणे रा अक्क तुच्छ जाणेया।
Zur Zeit ausgewählt:
उत्पत्ति 25: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
