उत्पत्ति 19
19
लूतो रे मईमान
1साँजके बखते सेयो दोनो दूत जो यहोवे साथे अब्राहमो रे कअरे आई रे थे सदोम शईरो रे पऊँचे ओर लूत सदोम शईरो रे फाटको गे बैठी रा था। जेबे लूते सेयो देखे तो तिना साथे मिलणे खे उठेया ओर मुंए रे पारे चूकी की माथा तेकेया। 2ओर बोलेया, “ओ मेरे यहोवा, आँऊ तुसा ते बिनती करूँआ की आपणे दासो रे कअरे आओ। तुसे आपणे पैर तोओ ओर पूरी रात राम करने ते बाद आगले दिने प्यागा उठी की आपणी बाटा रे जाएओ।” तिने बोलेया, “ना, आसा चौको रेई रात बिताणी।”
3पर लूते तिना ते बऊत बिनती करी की सेयो मनाईते ओर सेयो तेसरे कअरे आईगे। तिने तिना खे रोटी त्यार कित्ती ओर बिना सजेड़े रिया रोटिया बणाई की तिना खे खुल़ाईया।
4तिना सबी रे सऊणे ते पईले ई सदोम शईरो रे हर जगा रे मर्द, जवाना ते लई की स्याणे लोका तक आई की कअरो रे चऊँ कनारे खड़ी रे थे। 5सेयो लूतो खे आका पाई की बोलणे लगे, “जो मर्द आज राती खे तांगे आई रे सेयो केईए? तिना खे आसा गे बारे ली आओ ताकि आसे तिना साथे गल़त सम्बन्द बणाईए।”
6तेबे लूत तिना गे द्वारो ते बारे गया ओर दुराजा आपू पीछे बंद करी की बोलेया, 7“ओ मेरे पाईयो, ना, एड़ा दुष्ट काम नि करो। 8सुणो, मेरिया दो बेटिया ए जिने यबुओ तक केसी बी मर्दो साथे सम्बन्द नि बणाई राखे। आऊँ तिना खे तुसा गे बारे ली आऊँ ओर तुसा खे जेड़ा ठीक लगो, तिना साथे तेड़ा ई बर्ताव करो। पर इना मर्दा साथे कुछ नि करो, कऊँकि यो मेरे छतो निठे आई रे।”
9तिने बोलेया, “आसा री बाटा ते दूर ऊई जा! तूँ एक परदेशी ऊई की एती रणे आया ओर एबे आसा रा न्याय करने वाल़ा बी बणीगा! एबे आसा तिना ते बी जादा तां साथे बुरा बर्ताव करना।” एड़ा बोलदे ऊए सेयो मर्द लूतो खे पाँदा ते बऊत दबाणे लगे ओर दुराजा तोड़ने खे नेड़े आए। 10तेबे तिने पराऊणेया आपणे आथ आगे करी की लूत आपू गे पीतरे खींजी ला ओर दुराजा बंद करी ता। 11ओर तिने सब मर्दा खे जवाना ते लई की बड़ेया तक जो कअरो रे द्वारो पाँदे थे सब अन्दे करीते ओर सेयो द्वार टोल़दे-टोल़दे थकी गे।
लूतो रा सदोमो ते बची की निकल़ना
12फेर तिने पराऊणेया लूतो ते पूछेया, “एती तांगे ओर कुण-कुण ए? जवांई, माठे-बेटिया ओर एते शईरो रे तेरा जो कोई ओ, तिना सबी खे लई की एथा ते निकल़ी जा, 13कऊँकि आसे एसा जगा खे नाश करने वाल़े ए, एते जगा रा चींगणा यहोवे रे सामणे बढ़ी गा रा; इजी खे यहोवे आसे एथो रा सत्यानाश करने पेजी राखे।”
14तेबे लूते निकल़ी की आपणे ऊणे वाल़े जवांईया खे जिना साथे तेसरी बेटिया री सगाई ऊई री थी, समजाई की बोलेया, “उठो, एते जगा ते चट निकल़ी जाओ कऊँकि यहोवा एस शईरो खे नाश करना चाओआ!” पर तेसरे जवांईया खे लगेया कि से मजाक करने लगी रा।#19:14 लूक 17:28-29 15त्याड़ा निकल़ने ते पईले ई दूते लूतो खे चट करने खे बोलेया, “उठ, आपणी लाड़ी ओर आपणियां दुँईं बेटिया खे एथा लई की निकल़ी जा, नई तो जेबे एस शईरो खे सजा मिलणी तेबे तू बी तेस साथे स्वा ऊई जाणा।”
16पर से देरी करदा रया, तेबे तिने दूते तेसरा, तेसरी लाड़िया रा ओर तेसरी बेटिया रा आथ पकड़ी की शईरो ते बारे सई सलामत निकयाल़ी ते, कऊँकि यहोवे तिना साथे दया दखाई राखी थी।#19:16 2 पत 2:7 17तिना खे शईरो ते बारे निकयाल़ने ते बाद, तिना दुँईं दूता बीचा ते एकी बोलेया, “एबे आपणा प्राण बचाई की नठी जा, पीछे मुड़ी की नि देखणा ओर ना ई बाटा रे सवीं जमीन खत्म ऊणे तक रूकणा! इना पाह्ड़िया पाँदो खे नठी जाणा, नई तो तूँ बी स्वा ऊई जाणा।”
18पर लूते तिना खे बोलेया, “ओ यहोवा, एड़ा नि कर!” 19देख, तेरे दासो पाँदे तेरी बड़ी दया ऊई री ओर तैं मेरा प्राण बचाई की बड़ी पारी कृपा दखाई राखी। पर आँऊ पाह्ड़ो पाँदे नि नठी सकदा, केथी एड़ा नि ओ कि कोई बिपदा मां पाँदे पड़ो ओर आऊँ मरी जाऊँ। 20देख, ये शईर इतणा नेड़े ए कि आऊँ तेती नठी सकूँआ ओर ये छोटा बीए। माखे तेथी नठणे दे, ये बऊत छोटा ए, ईंयाँ मेरे प्राण बची जाणे।
21तिने दूते लूतो खे बोलेया, “ठीक ए, तेरी ये बिनती बी मैं मानी ली कि तेस शईरो रा मां नाश नि करना। 22पर चटचारे तेथो खे नठी जा कऊँकि जदुओ तक तूँ तेती नि पऊँचो तदुओ तक आँऊ कुछ नि करी सकदा।” इजी बजअ ते तेस शईरो रा नाओं सोअर पड़ेया।
सदोम ओर अमोरा रा नाश
23लूतो रे सोअरो रे पऊँछदे ई त्याड़ा तरतिया पाँदे निकल़ने लगेया। 24तेबे यहोवे सदोम ओर गमोरा शईरा पाँदे सर्गो ते गन्धक ओर आग बरसाई।#19:24 लूक 17:29 25ईंयाँ तिना शईरा रा ओर सारी सवीं जमीना रा ओर तेते शईरो रे सारे रणे वाल़ेया रा ओर तेते जमीना रे ऊगी री सारिया फसला समेत नाश करिता। 26पर लूतो री लाड़िए जो तेस पीछे थी, पीछे मुड़ी की देखेया ओर से लूणो रा खम्बा बणीगी। 27प्यागा ई अब्राहम उठी की तेसा जगा खे गया, जेती से यहोवे रे नेड़े खड़ी रा था। 28ओर सदोम ओर गमोरा रे मैदानो री तरफा खे आखी चकी की देखेया तो तिने देखेया कि तेस प्रदेशो रे पट्ठिया रा जा तुआँ उठणे लगी रा था। 29ओर एड़ा ऊआ कि जेबे परमेशरे तेसा सवीं जगा रे शईरो खे जिदे लूत रओ था, उलट-पुलट करी की नाश करी ता, तेबे तिने अब्राहमो साथे कित्ते रे वादे खे याद करी की लूतो खे तेसा बिपदा ते बचाई ला।
लूत ओर तेसरी बेटिया
30लूते सोअर छाडीता ओर पाह्ड़ो पाँदे आपणियां दुँईं बेटिया साथे रणे लगेया, कऊँकि से सोअरो रे रणे ते डरो था। इजी री खातर से आपणियां बेटिया समेत तेती एकी गुफा रे रणे लगेया।
31एकी दिने बड़ी बेटिये छोटिया खे बोलेया, “आसा रा बाओ स्याणा ए ओर तरतिया पाँदे एड़ा कोई मर्द निए जो दुनिया रिया रवाजा रे मुताबिक से आसा गे आओ जिना रे जरीये आसा रे बच्चे पैदा ओ। 32इजी खे आओ, आसे आपणे बाओ खे शराब पल़्याई की तेस साथे सऊँईया ताकि आसे आपणे बाओ रे वंशो खे बचाई की राखिए।” 33तेसी राती तिने आपणे बाओ खे शराब पल़्याया ओर बड़ी बेटी जाई की आपणे बाओ गे लेटी गी। पर तेसखे पता नि लगेया कि से कदी जे लेटी ओर कदी जे उठी।
34ओर दूजे दिने बडिए बेटिए छोटिया खे बोलेया, “देख काल राथियो खे आऊँ आपणे बाओ साथे सयी, आज बी राथियो खे आसे तेसखे शराब पल़्याऊँईया, तेबे तैं जाई की तेसगे सऊणा ताकि आसे आपणे बाओ रे जरीये वंश पैदा करिए।” 35तेबे तिने तेस दिने बी राथियो रे बखते आपणे बाओ खे शराब पल़्याया ओर छोटी बेटी जाई की तेस साथे सयी गी। पर तेसखे तेसा रे सऊणे ओर उठणे रे बारे दे बी पता नि लगेया। 36ईंयाँ लूतो रिया दोनो बेटिया आपणे बाओ ते गर्भवती ऊईगिया। 37बडिया बेटिया रे एक पाऊ ऊआ ओर तेसरा नाओं मोआब राखेया ओर से मोआब नाओं रिया जातिया रा जो आजो तक ए, मूलपिता ऊआ। 38ओर छोटी बेटिया रे बी एक पाऊ ऊआ ओर तेसरा नाओं बेनम्मी राखेया ओर से अम्मोन वंशो रा जो आजो तक ए, मूलपिता ऊआ।
Zur Zeit ausgewählt:
उत्पत्ति 19: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
