उत्पत्ति 17
17
अब्रामो साथे परमेशरो रा वादा
1जेबे अब्राम नड़िनूए साला रा ऊईगा, तेबे यहोवे तेसखे दर्शण देई की बोलेया, “आँऊ सर्वशक्तिमान परमेशर ए; मेरी मौजुदगिया रे निर्दोष ओर विश्वासो साथे चल। 2तेबे मां तां साथे वाचा बानणी ओर तेरा वंश बऊत जादा बढ़ाणा।” 3तेबे अब्राम मुंए रे पारे थाले चुकेया ओर परमेशर तेस साथे ईंयाँ गल्ला करदा रया, 4“देख, आँऊ ये वाचा तां साथे बानणे लगी रा कि तूँ प्रदेशो री जातिया रा मूल़ पिता ऊई जाणा। 5एबे आजो ते तेरा नाओं अब्राम नि रणा, पर तेरा नाओं अब्राहम#17:5 अब्राहम अब्राहमो रा मतलब ए बऊत सारी जातिया रा बाओ ऊणा, कऊँकि मैं तूँ देशा-देशा रिया जातिया रा मूलपिता ठराईता रा। 6मां तूँ बऊत जादा फल़वंत करना ओर तूँ प्रदेशो-प्रदेशो री जातिया रा मूल़ बणाई देणा ओर तेरे वंशो बीचा ते कई राजा पैदा ऊणे। 7आँऊ तां साथे कित्ते रे वादे खे तेरे वंश ओर आऊणे वाल़ी पीढ़िया-पीढ़िया तक जुगो-जुगो री वाचा बानूँआ कि आऊँ तेरा ओर तांते बाद तेरे वंशो रा बी परमेशर रऊँगा। 8ओर आऊँ ये सारा कनान देश जिदे तूँ परदेशी ऊई की रणे लगी रा, एसा जमीना खे ताखे आऊँ सदा खे तेरे कब्जे रे ओर तांते बाद तेरे वंशो खे जुगो-जुगो तक देऊँआ ओर आऊँ तिना रा परमेशर रणा।”
9फेर परमेशरे अब्राहमो खे बोलेया, “तुसा री ये जिम्मेबारी बणोई कि तूँ ओर तांते बाद तेरा वंश ओर तिना री पीढ़िया रे लोक बी तेरे जेड़ी मां साथे बानी रिया वाचा खे मानेया करयो। 10मां साथे बानी री वाचा खे जो ताखे ओर तांते बाद तेरे वंशो खे मानणी पड़नी से ये ए कि तुसा बीचा ते हर एक मर्दो खे खतना करना पड़ना। 11मां ओर तुसा बीचे वाचा निबाणे रा येई चिह्न् ऊणा कि तुसे परमेशरो रे जरीये ठराया रा बच्चे पैदा करने रे अंगो रा खतना कराई लएओ। 12आऊणे वाल़ी पीढ़िया बीचा ते बस तेरे वंशो रेई मर्द नि, पर जो तेरे कअरे पैदा ऊईरा ओ या परदेशिया ते चाँदी देई की मोले लई राखेया ओ, एड़े सारे मर्द बी जेबे आठा दिना रे ऊई जाओ, तेबे तिना रा खतना कित्तेया जाओ। 13जो तेरे कअरे पैदा ऊईरा ओ या चाँदी देई की मोले लई राखेया ओ, तिना सबी रा खतना जरूर करना; ईंयाँ मेरी ये वाचा जेतेरा चिह्न् तुसा रे शरीरो रे ऊणा से जुगो-जुगो तक रणी। 14जो मर्द बिना खतने ते रई जाओ, से मर्द आपणे लोका बीचा ते निकाल़ेया जाओ, कऊँकि तिने मां साथे बानी री वाचा तोड़ी ती।”
परमेशरो रे वादे रा पाऊ इसहाक
15फेर परमेशरे अब्राहमो खे ये बी बोलेया, “जो तेरी लाड़ी सारै ए, तेसा खे तैं एबे सारै नि बोलणा, तेसा रा नाओं सारा#17:15 सारा सारा रा मतलब ए राजकुमारी ऊणा। 16मां तेसा खे आशीष देणी ओर ताखे तेसा रे जरीये एक पाऊ देऊँगा। मां तेसा खे एड़ी आशीष देणी कि से प्रदेशो री जातिया री मूलमाता ऊई जाणी ओर कईया देशा रे राजा तेसा ते पैदा ऊणे।”
17तेबे अब्राहम मुंए रे पारे थाले चुकेया ओर आसदे ऊए ओर आपणे मनो ई मनो दे बोलणे लगेया, “क्या सौ साला रे मर्दो रे बी ल्वाद ऊई सकोई ओर क्या सारा जो नब्बे साला रिये तेसा रे पाऊ जमणा?”
18ओर अब्राहमे परमेशरो खे बोलेया, “इश्माएल तुसा रिया नजरा रे तेरी आशीष पाई सको तो, येई बऊत ए।”
19तेबे परमेशरे बोलेया “जरूर! तेरी लाड़ी सारा ते ताखे एक पाऊ पैदा ऊणा ओर तैं तेसरा नाओं इसहाक राखणा। मां तेस साथे ओर तेसते बाद तेसरे वंशो साथे एड़ी वाचा बानणी जो सदा खे ऊणी।#17:19 गलाति 4:7-8 20ओर इश्माएलो रे बारे दे बी मैं तेरी सुणी राखी, मां तेसखे बी आशीष जरूर देणी ओर से फल़वंत करना ओर बऊत जादा बढ़ाणा। तेसते बारा परदान पैदा ऊणे ओर मां तेसते एक बड़ी जातिया रा देश बनाणा। 21पर मां आपणी वाचा इसहाको ई साथे बानणी जो सारा रे गर्भो ते आगले साल एस ई ऋतुआ रे ठराए रे बखतो रे पैदा ऊणा।”
22जेबे परमेशरो रिया अब्राहमो साथे गल्ला करनिया पुरिया ऊईगिया तेबे परमेशर तेसगे ते ऊबे चढ़ीगा। 23तेबे अब्राहमे आपणा पाऊ इश्माएल लया ओर तेसरे कअरे जितणे बी मर्द पैदा ऊई रे थे ओर जितणे लोक तिने चाँदी देई की मोले लई राखे थे, मतलब तिना सबी मर्दा रा जो तेसरे कअरे थे, तेसी दिने परमेशरो रे वचनो रे मुताबिक तिना रा खतना कराया। 24जेबे अब्राहमो रा खतना ऊआ, तेबे से 99 साला रा था। 25ओर जेबे तेसरे पाऊ इश्माएलो रा खतना ऊआ, तेबे से 13 साला रा था। 26अब्राहम ओर तेसरे पाऊ इश्माएल दुँईं रा खतना एक ई दिने ऊआ। 27ओर तेसरे कअरे जितणे बी मर्द थे जो तेसरे कअरे पैदा ऊए ओर जो परदेशिया रे आथो ते मोले लई राखे थे, तिना सबी रा खतना तेस ई साथे ऊआ।
Zur Zeit ausgewählt:
उत्पत्ति 17: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
