उत्पत्ति 11
11
पाषा रे गड़बड़ी
1एक बखत एड़ा था जेबे सारी तरतिया पाँदे एक ई पाषा ओर एक ई बोली थी। 2तेस बखते लोक पूर्वो ते चलदे-चलदे शिनार प्रदेशो दे एक मैदान पाई की तिदे बसी गे। 3तेबे सेयो आपू-बीचे बोलणे लगे, “आओ आसे ईटा बणाई-बणाई की ठीक-टंगो रे आगी रे पकाऊँए।” ओर तिने पात्थरो रिया जगा रे ईटा ते ओर तिना जोड़ने खे माट्टिया रे गारे री जगा रे चूने साथे काम कित्तेया। 4फेर तिने बोलेया, “आओ, आसे एक शईर ओर एक गुम्मट बणाऊँए ओर जेतेरी चूँडी सर्गो तक पऊँची जाओ ओर ईंयाँ आसे आपणा नाओं मशूर करूँए ओर आसा खे सारी तरतिया पाँदे बसणा नि पड़ो।” 5जेबे लोक शईर ओर गुम्मट बनाणे लगी रे थे, तेबे इना खे देखणे खे यहोवा उतरेया। 6ओर यहोवा आपणे आपू दे सोचणे लगेया, “सेयो सब एकी ई पाषा रे, एकी ई जातिया रे ए, इजी खे एबे जो कुछ सेयो करने लगणे तिना खे कुछ बी असम्भव नि ऊणा, ये तो सिर्फ शुरूआत ईए जो सेयो करने लगी रे। 7इजी री खातर मां, उतरी की तिना री पाषा रे गड़बड़ी पाणी, कि सेयो एकी-दूजे री बोली नि समजी सको।” 8ईंयाँ यहोवे सेयो तेथा ते सारी तरतिया पाँदे फैलाईते ओर तिने तेस शईरो खे बनाणा छाडीता। 9इजी बजअ ते तेस शईरो रा नाओं बाबेल पड़ेया, कऊँकि सारी तरतिया रिया पाषा दे जो गड़बड़ी ए, से यहोवे तेथी पायी, इजी बजअ तेई यहोवे माणूं सारी तरतिया पाँदे फैलाईते।
शेमो रा खानदान तेरह तक
10शेमो रा वंश ये ए। जलप्रलय रे दूई साला बाद जेबे शेम 100 साला रा ऊआ, तेबे तेसरे जरीये अर्पक्षद जम्मेया। 11ओर अर्पक्षदो रे जमणे ते बाद शेम 500 साल जिऊँदा रया ओर तेसरे ओर बी माठे-बेटिया ऊए। 12जेबे अर्पक्षद 35 साला रा ऊआ, तेबे तेसरे जरीये शेलह जम्मेया। 13ओर शेलह रे जमणे ते बाद अर्पक्षद 403 साल जिऊँदा रया ओर तेसरे ओर बी माठे-बेटिया ऊए।
14जेबे शेलह 30 साला रा ऊआ, तेबे तेसरे जरीये एबेरे जम्मेया। 15ओर एबेरो रे जमणे ते बाद शेलह 403 साल ओर जिऊँदा रया ओर तेसरे ओर बी माठे-बेटिया ऊए।
16जेबे एबेर 34 साला रा ऊआ, तेबे तेसरे जरीये पेलेग ऊआ। 17ओर पेलेगो रे जमणे ते बाद एबेर 430 साल ओर जिऊँदा रया ओर तेसरे ओर बी माठे-बेटिया ऊए।
18जेबे पेलेग 30 साला रा था, तेबे तेसरे जरीये रू ऊआ। 19ओर रूए रे जमणे ते बाद पेलेग 209 साल ओर जिऊँदा रया ओर तेसरे ओर बी माठे-बेटिया ऊए।
20जेबे रू 32 साला रा ऊआ, तेबे तेसरे जरीये सरूग जम्मेया। 21ओर सरूगो रे जमणे ते बाद रू 207 साल ओर जिऊँदा रया ओर तेसरे ओर बी माठे-बेटिया ऊए।
22जेबे सरूग 30 साला रा ऊआ, तेबे तेसरे जरीये नाहोर पैदा ऊआ। 23ओर नाहोरो रे जमणे ते बाद सरूग 200 साल ओर जिऊँदा रया ओर तेसरे ओर बी माठे-बेटिया ऊए।
24जेबे नाहोर 29 साला रा ऊआ, तेबे तेसरे जरीये तेरह पैदा ऊआ। 25ओर तेरह रे जमणे ते बाद नाहोर 119 साल ओर जिऊँदा रया ओर तेसरे ओर बी माठे-बेटिया ऊए। 26जदुओ तक तेरह 70 साला रा ऊआ, तदुओ तक तेसरे अब्राम, नाहोर ओर हारान पैदा ऊए।
तेरह रा खानदान तेरह तक
27तेरह रा वंश ये ए, तेरह रे अब्राम, नाहोर ओर हारान पैदा ऊए ओर हारानो रे जरीये लूत पैदा ऊआ। 28ओर हारान कसदिया लोका रे ऊर नाओं रे शईरो रे जो तेरह री जन्मपूमि थी, आपणे बाओ रे जिऊँदे रंदे तेबेई तेती मरीगा। 29अब्राम ओर नाहोर, दुँईं जणे ब्या करी ला, अब्रामो री लाड़िया रा नाओं सारै ओर नाहारो री लाड़िया रा नाओं मिल्का था। ये मिल्का तेस हारानो री बेटी थी, जो मिल्का ओर यिस्का दुँईं रा बाओ था। 30सारै रे कोई ल्वाद नि थी, से बांझ थी। 31ओर तेरह आपणे पाऊ अब्राम ओर आपणे पोते लूत जो हारानो रा पाऊ था ओर आपणी बऊ सारै, जो तेसरे पाऊ अब्रामो री लाड़ी थी, इना सबी खे लई की कसदिया लोका रे ऊर नाओं रे शईरो ते निकल़ी की कनान प्रदेशो खे जाणे लगेया, पर हारान नाओं रे प्रदेशो रे पऊँची की सेयो तेथी रणे लगे। 32जेबे तेरह 205 साला रा था, तेबे से हारान प्रदेशो रे मरीगा।
Zur Zeit ausgewählt:
उत्पत्ति 11: BGH
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
