Mika 5
5
1Ndandamika basilumamba bako, omunzi wa Jelusalemu, nkaambo twasinkilizigwa. Balauma muleli wa Isilayeli asaya amusako.
Leza mbwaakasyomenzya muleli waku Betelehemu
2Pele yebo, Betelehemu-efulata, nokuba kuti uli musyoonto akati kaziinga zyamu Juda, mulinduwe momuyoozwa uuyooba muleli wamu Isilayeli, ooyo wakaliko kuzwa kale-kale, kuzwa mazuba aansiku.
3Nkaako cisi ca Isilayeli ciyoosiigwa mane kusikila ciindi eeco ooyo uuminingana nayootumbuka, eelyo babunyina basyeede nobayoopiluka ku Baisilayelinyina. 4Uyooima akweembela butanga bwakwe munguzu zya Mwami Leza wakwe. Nkaako bayookkala cakuliiba, nkaambo mpuwo yakwe inooyosikide kale kumagolelo aanyina. 5Uyooba ndoluumuno lwabo.
Kufutulwa akunyonyoonwa
Baasiliya basaala nyika yesu akweendeenda mumayubilo eesu tuyooleta beembezi bali ciloba kuti babalwane, iiyi mane basololi bali ciloba. 6Bayoolela nyika ya Asiliya a panga, nyika ya Nimulodi apanga lisomwedwe. Uyootuvuna kuzwa ku Baasiliya baakusaala nyika yesu akweendeenda muminyinza yesu.
7Bantu ba Jakobo basyeede bayooba akati kabantu banji ba Mwami Leza, bayooba mbuli mume uuzwa ku Mwami Leza, mbuli lunywaanywa mboluputulula bwizu, talulindili bantu nokuba kwiimina bantu baansi pe. 8Bantu ba Jakobo basyeede bayooba akati kamisyobo imwi, bayooba akati kabantu banji, mbuli syuumbwa akati kabanyama bamusokwe, mbuli mwanaa syuumbwa akati kamatanga aambelele, ulazivwaampila akuzizapaula, pele taakwe uukonzya kuzivuna. 9Nobaisilayeli muyoozunda basinkondonyoko akubanyonyoona boonse.
10“Mubuzuba oobo, Mbwaamba Mwami Leza, njoonyonyoona mabbiza aanu, akupwayaula nkalaki zyanu. 11Njoonyonyoona minzi yamunyika yanu akuyoomumwayawida mayubilo aanu mayumu oonse. 12Ndiyoonyonyoona bulozi bwanu, tamukabi abasikuposela ziposo pe. 13Ndiyoonyonyoona mituni yanu mibeze amabwe aamalende aanu, tamukakombi limbi eezyo nzimwakalipangila pe. 14Ndiyoozyula zikozyanyo zya Asyela akumwayaula minzi yanu. 15Mubukali bwangu bupati njoobweedezya bubi kumisyobo yoonse iitandiswiilili.”
Zur Zeit ausgewählt:
Mika 5: Tonga96
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tonga Bible © United Bible Societies, 1994.