Habakkuku 3
3
Kukomba kwa Habakkuku
1Kukomba kwa Habakkuku musinsimi, mbuli kwiimba kwa Syigiyonoti.
2O Mwami Leza ndakamvwa nzyookacita, ndiyoowede O Mwami Leza.
Abukulusye alimwi mazuba eesu. Nikuba kuti ulinyemede, inga tolubi luse lwako.
3Leza wakazwa ku Temani, Uusalala wakazwa kucilundu ca Palani.
Bulemu bwakwe bwakavumbilide julu, nyika yoonse ilamutembaula.
4Ulabala mbuli zuba, mumaanza aakwe kwakali kumweka mumuni mwaakasiside nguzu zyakwe.
5Ulatuma zyuumo kumbele lyakwe, musule ulalailila lufu kumutobela.
6Naima nyika ilazungaana, nalanga misyobo yoonse yamunyika ilakankama.
Malundu aakale-kale alakolomoka,
atulundu tusyoonto tulawa. Nzila zyakwe zilikkalilide.
7Ndakabona matente aaba Kusyani kabayoowede, abalo ba Midiyani kabazyangama.
8O Mwami Leza, sena wakanyemenede milonga? Sena ndwizi lwakakunyemya?
Naa wakanyemena tulonga?
Sena wakanyemena lwizi ciindi nookatanta amabbiza
aayo ngozundya ankalaki?
9Wakalibambilila kubelesya buta bwako, wakafusa mivwi minji,
mvula yako yakaandaula nyika amilonga.
10Zilundu nozyakakubona zyakazyangama,
maanzi aamumilonga alavuuma, aalo mayuwe alakomena.
11Zuba amwezi zyakaima mujulu,
zyabona kumweka kwamivwi yako akumweka kwasumo lyako.
12Wakeendeenda mubukali bwako akati kanyika,
wakanyonyoona bantu bamisyobo yoonse mubukali.
13Wakasika kuzoofutula bantu bako,
wakaboola kuzoovuna munanike wako,
wakapwaya musololi wanyika yabantu babi,
wakabanyonyweeda limwi bantu bakwe.
14Asumo lyakwe mwini wakayasa musololi wabasinkondo,
balo bakaboolede mbuli kambizi kuti bazootumwaye.
Wakali kukkomana naakali kuyoonyonyoona bacete cakusisikizya.
15Nywebo mwakalyatauka lwizi amabbiza aanu, eelyo maanzi aanguzu akavundauka.
16Nindakamvwa zintu eezi moyo wangu wakaduntaana,
nindakamvwa munzunzumina milomo yangu yakabimba.
Ndakavwelauka mumafuwa, mazwi kaakankama,
ndilindila buzuba bwacisubulo, eeco cizoosikila basinkondoma,
17Mikuyu tiizyede micelo pe, mumyuunda yansaansa kunyina nsaansa,
taakwe maoliva, myuunda inyina zyakulya,
nokuba kuti taakwe mbelele mucimpati, taakwe ŋombe mucibaya,
18nikuba boobo njoosekelela mu Mwami Leza,
njootangala muli Leza Mufutuli wangu.
19Mwami Leza wangu, nguundipa nguzu,
ulacita kuti ndibe amaulu mauba mbuli aambaambi,
ulandicita kuti ndikonzye kutanta mumalundu.
Kumweendelezi wanyimbo. Ndiimbya zingwali-ngwali zyangu.
Zur Zeit ausgewählt:
Habakkuku 3: Tonga96
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tonga Bible © United Bible Societies, 1994.