1 Bakolinti 2
2
Makani aa Kilisito wakakankaminwa
1Nindakasika kulindinywe, nobakwesu, kuzoomwaambila makani aa Leza aasisidwe alo aali ngabwini, nsiindakasola kulitondezya mbuli musongo amajwi acenjede. 2Nkaambo ndakayeeya kuti intazibyi cimwi cintu akati kanu ccita buyo Jesu Kilisito ooyo wakakankaminwa. 3Ndakaboola kulindinywe mubuteteete akuyoowa. Alimwi ndakali kuzyangama kapati. 4Nindakali kukanana naa kukambauka, nsiindakabelesya majwi masongo mukusola kukwela bantu, pele ndali kubonya zitondezya nguzu zya Muuya Uusalala. 5Ndakali kucita oobo kuti mutasyomi nkaambo kabusongo bwabantu pele nkaambo kanguzu zya Leza.
Busongo buzwa ku Muuya Uusalala
6Tulakanana majwi aabusongo kulibaabo basimide mulusyomo. Busongo oobu tabuli bwabuntunsi nibuba bwabaleli banyika balaanguzu zimana buyo. 7Busongo mbotwaamba, mbusongo bwa Leza busisidwe. Leza katanalenga nyika, wakabambila limwi zyabusongo eezi kuti atupe bulemu. 8Taakwe naba omwe wabaleli basunu wakabumvwisya pe, nkaambo nibakabumvwisisya nibatakakankamina Mwami wabulemu. 9Pele mbuli Malembe mbwaati,
“Eezyo muntu nzyaatakabona naa kumvwa,
eezyo muntu nzyaatakayeeya,
nzenzizyo Leza nzyabambilide aabo bamuyanda.”
10Swebo, Leza, wakatuyubunwida eezi kwiindila mu Muuya Uusalala. Nkaambo Muuya nguuzi zintu zyoonse, naaba makani aamaseseke aa Leza. 11Sena kuli muntu uuzi miyeeyo yamuntu umwi kunze aamuuya wakwe mwini? Mbubonya oobo taakwe muntu uukonzya kuziba miyeeyo ya Leza kunze aa Muuya wa Leza mwini. 12Swebo tiitwakatambula muuya wabuntunsi, pele twakatambula Muuya uuzwa kuli Leza, kuti atuzibye eezyo Leza nzyatupa cabuyo.
13Tulakambauka eezi kutali amajwi aaiisigwa abusongo bwabantunsi, pele amajwi aatwiisya Muuya Uusalala. Tulaiisya zyamuuya amajwi aazwa ku Muuya. 14Muntu uutajisi Muuya ulakaka zizwa ku Muuya Uusalala. Uziyeeya kuti nzyabufuba-fuba, alimwi takonzyi kuziziba, nkaambo kunyina muntu uukonzya kuziziba katajisi Muuya. 15Kuti naa muntu kajisi Muuya ulakonzya kuziba bubi bwazintu zyoonse kwamana kunyina uukonzya kumukazya pe. 16Cili mbuli bwaamba Malembe kuti,
“Ani nguni uuzi mizeezo ya Mwami Leza
kuti amulailile walo?”
Lino swebo tulijisi mizeezo ya Kilisito.
Zur Zeit ausgewählt:
1 Bakolinti 2: Tonga96
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tonga Bible © United Bible Societies, 1994.