Filipi 1
1
Keyagi warinakike wene
1Kit Allah aʼburi Kristus Yesus kinom kunik dogolik, o Filipi werek mende, kinebe taʼbokogonat inom, kineugi Allah aʼburi pakisek werek mende inom, Allah aʼburi yamagiyaligogi mende inom, nagarlagi nirugi o. An Paulus Timotius nimbisak nen Kristus anduwanengge dogolik wene kolal mbalogo kinoba laʼbi wago o. 2Ninombae Allah, ninewe Endaganggok Yesus Kristus imbisak inobabut pano etnogo nen pano mende wokisigik, kinendainggen kambugut dinagigik, kagako dogowak o.
Allah aʼburi o Filipi mende inake, Allah keyagi wakik, ayonggo ʼbigik, yisike wene
3An kibitngge-yogongge kit kinoba eberek mondok dogolik, nombae Allah at keyagi warigogo o. 4-5Kit ebe-alep wene waganggigip eti kurli nen, yogondak kurli, an nen pano wene akoni amberek yogisilik noko dogowagaluk yamak niyasi mondok werek eti paga, an kibitngge-yogongge nakla arlenggen togo kit taʼbokogonat kinake sembayan yisi dogolik, Allah ayonggo ʼbigik, keyagi wakik, yiligogo o. 6At Allah nen kit pano kagat kinabigiluk, alebagik inggi pakinakikesik pano kagat kinako mondok dogoluk nen, kurli at Yesus Kristus wisigin etinemat, o arat paligogi kak, pano kagat kinabi wisigin eti eberogonat yiluk, nendainggen kambukogo werek. 7Allah obabut pano nen nayonggo ʼbisikemo, an ninggi kerle warek welagik, ninggi kerle awan wakidekma pano wene irli waganggik, obatne digik kagako lagi kak, kit taʼbokogonat esigit dilugat ninom kagako dogowagaluk kinayonggo ʼbisikeat eti paga, kit kinebe nendainggen kunik werek o. Eti paga, an nen kit taʼbokogonat pasik,
“Yesus eberogonat kagat kinabi wisigin,” yiluk ambausak mende motogonat ambaligogo o. 8Yesus Kristus nen kit kinebe taʼbokogonat kinaʼbuwa werek kak, an nen kit kinaʼbuwa dogolik,
“Ninom dogolep o,” yiluk, nakla eberogonat ambasi lagi mende eti at Allah ilu o.
9An nen sembayan kit kinake yisi dogolik, men yiligogo,
“Yi mende ndi mende ai yakonem erlo nggok atluk dukiligogo kak, kit ebe wene dikogo kinilu agik, didigik, kagako dogolik, akoni inebe inaʼbuwarogo werek eti mende nggokogonat inaʼbuwarogo dogobagik nen,” yiluk, sembayan yiligogoat o. 10Kit esigit diluk didiluk kagako dogogun kalok, kinakla nen,
“Yi pano. Kagasusak mende,” yigik,
“Eti weyak. Kagasusak dek mende,” yigik, didisi dogogun. Esigit diluk kagasugun kalok, Kristus wisigin etinem, wene kinoba degat, pano nggaʼberek mondok werekma wisigin o. 11Yi mende ndi mende ai yakonem erlo nggok atluk enggen yirigogo kak, at Yesus Kristus nen kagat kinako dogogin oba, kinobabut motogo kagako mondok amberek inomat obarluk kagako dogogun kalok, at ebe wagonem, akoni amberek nen Allah keyagi wakik, pogorakik, kagasugun o.
Paulus inggi kerle warek werek nggorlek, pano wene nggok agike wene
12Nagarlagi nirugi o. Wene yi kinilurogo yokisak. An yigit diluk kagat naka yi paga, pano wene dek agidek nggogarik liligogo o. 13An Paulus Kristus pasigat ninggi kerle wat danggama werek yi paga, it ap at Kaisar endaganggok aguma unggunogo yiluk su kambema suwam werek mende taʼbokogonat inom, it akoni amberek yoma mende taʼbokogonat inom nen, enggagat didanigogi o. 14An ninggi kerle wat danggama werek yi paga, Allah aʼburi amberek inebe nggokmangge inendainggen ninewe Endaganggok oba panggot diluk korle atluk nen, wene Kristus pasik inane paga ʼbukakogo yogisasi dogusak inayuk dek arigogo o.
15It eti amberek nen inakla nggorlo atluk, an noba uwa mbalko dogolik, yogisiligogi o. Mende, it amberek nen inakla pano dogolik,
16“At Allah nen Paulus ayonggo ʼbisi dogolik,
Akoni nen pano wene eti eberogonat yiluk ambawagaluk ʼbukakogo yogisasi dogono, yiluk ayonggo ʼbisikemo kiligogi o,” yiluk, enggagat didaniluk nebe naʼbuwa nen wene at Kristus pasik yogisiligogi. 17Mende, it amberek uwa mbaligogi eti paga, wene Kristus pasik yogisiligogi eti inendainggen omanggiat dogolik yogisiligogi ʼbuk. Inakla nen.
“Paulus inggi kerle warek werek eti ebe weyak asuwak,” yiluk, inenggaerek inendaganggok asuwagalugat yogisiligogi o.
18-19Mende, it amberek nen inendainggen mbere dogolik yogisigik, it amberek nen inendainggen omanggiat dogolik yogisigik, kagarigogi mende ogwe, wene Kristus pasik yogisiligogi kalok, yugunat. Nakla arlenggen kiligogo. Yigit diluk kagat nako werekma, kit nen sembayan an nake yisi dogumo, Yesus Kristus Agurengge nen an yamak niyasi nggorlek, Allah nen ndil nabigin yiluk an nilu dogolik, nakla arlenggen kasi dogoginat o. 20An nakla nen, wene Kristus pasik yu nenggarli degat yogisasi dogusak warlok mondok. Eti paga, nenggarli degat yogisasi dogogin o, yiluk, didiluk nakla pano werek. Kibitngge-yogonggeat ʼbukakogo yogisiligogo kak, yogondak esigit dilugat yogisagalugat werek. Nebe niluk dogumo panoat. Nen, watlasumo panoat. An esigit diluk kagat nako nggorlek, nebe abirat Kristus ake kagako lagi eti paga, akoni nen Kristus pogorasuwagalugat werek o. 21Esigit diluk werek eti nakla nen, nebe niluk werek eti Kristus akeat. Nen, watlagonem, pano mende sabusagin o. 22Nebe agat oba yoma niluk dogolik Allah eyabu yabunggane nggokogo kagasusak werek eti paga, niluk dogusak a? Watlasusak a. Nggi mende inde asik yiluk, nonggodek arigogo. 23An kagasusak mende wene mbere werek eti paga, nendainggen mbere arigogo. An watlatluk nen, Kristus nimbisak dogumo pano. Ebe pano mondok etiat o. 24Mende, an kit kinake agat oba yoma dogusak panoat o. 25An wene eti ake didiluk, dogogin, yiluk nilu o. Kit kinendainggen Allah oba panggot diluk dogolik, korle agik, kinakla arlenggen kigik, kagako dogobagik nen, kit kinebe taʼbokogonat ninom dogogunat o. 26Doguwogoluk, an yabunggane kinoba wisumo kit Kristus Yesus kinom kunik dogolik kinakla nen,
“Paulus ninom werek,” yiluk, an paga kinalon atluk kinakla arlenggen mondok kugun o.
Paulus nen, “Wim ako dogolik inobatnerogo abigogi kak, pano wene pasik, kinobatnerogo kagako dogono o,” yiluk yogisasike wene
27Wene pano wene Kristus nen kagakike wene etnogo paga,
“Yigit diluk kagako dogono, ndigit diluk kagako dogono,” yiluk yokisiligogi mendeat kagako dogono o. Esigit diluk kagako dogolik, kinebe omanggiat dambukogo kagako dogumo, it akoni amberek nen kinabok yisi dogolik,
“It inobabut pano wene yogisasinem koligogi ndak-ndagat inendainggen Allah oba panggot diluk obatnerogo mendek werek o,” yiluk, an nebe walegat werekma yoknisugun a? Kinoba witluk nilenggen kiyagin a. Wene pano wene yokisiligogi kak, kinendainggen omanggiat kinom dambukogo dogolik, wim ako dogolik obatnerogo abigogi kak, wene eti pasik kinobatnerogo kagako dogono o. 28It amberek nen,
“Wene eti ninaʼit,” yiluk, yisi nggorlegat, kirat kinayuk agidek aʼbetogo mondok pago dogono o. Esigit diluk pago dogogun eti paga, it eti nuk asugun yiluk enggagat kagat lagik, kit ndil kinabigin yiluk enggagat kagat lagik, Allah nenat kagasigin werek o. 29At Allah obabut pano nen, kit kinendainggen Kristus oba panggot duwagaluk arlek kinayonggo ʼbisike ʼbuk. Dek o. At pasik yi aik ndi aik kasi dogowagaluk kinayonggo ʼbisikeat o. 30An alebat, wim ako dogolik inobatnerogo abigogi kak, pano wene ake nobatnerogo kagakonem kinilenggen niyasigibat. Nen, yogondak nabok koligogiat. Eti mende kit ninom dambukogo kagarigogiat o.
Zur Zeit ausgewählt:
Filipi 1: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.