Yakobus 4
4
“Akoni agat oba mende inobabut inikogat dogolik kagarigogi mende eti kinom kunggup o,” yiluk yogisasike wene
1Kit wenemuk akik, ndugi akik, kagarigogi eti, erlo nena paga kagarigogi nogo. Wim abusak warlok dogolik inakla agaga dagiligogo eti kak, kinendainggen nen nalok yi warlok ndi warlok ambaligogi eti pagaat abigogi o. 2Yi mende ndi mende kinakla nen warlok ambaligogi mende ebe korligidek nen, akoni inebe inarigogi. Kinakla nen it akoni amberek inamende warlok ambaligogi mende, ebe korligidek nen uwa mbal diluk nen ndugi akik, wim akik, kagarigogi o. Mende, yi mende ndi mende waganggidek kininggi dek werek eti Allah nggino yogorigogi dek eti pagaat o. 3Nen, omanggi Allah nggino yogorigogi mende, kinenggaerek kinake arlek kinendainggen nen nasinem korlawogoluk nggino yusak dek mendeat nggorlo yogorigogi eti paga, wokisiligogo dek o. 4Kumi nen inagoni inil limarigogi kak, Allah il limagogo kagarigogi! Akoni agat oba mende yoma inobabut inikogat dogolik kagarigogi mende eti kinom kunik werek kalok, Allah kinom wim mbalek negenat werek eti kinonggodek nogo? Kit amberek nen akoni agat oba yoma mende inobabut inikogat dogolik kagarigogi mende eti kinom kunuwogoluk kagarigogi kalok, kinenggaerek nenat Allah kinom wim nggagaligogi o. 5Wene Allah wene paganeat omanggi kolal mbalogo ʼbisi dogolik, men yisuka,
“Kumi inaʼbuwarogo dogolik irli waganek mondok werek eti kak, Allah nen Agurengge ninakla ʼbinanggikemo ninebe ninaʼbuwarogo dogolik, ninirli waganogo paknisek werek,” yiluk kolal mbalogo ʼbisuka eti kit kinakla nen,
“We yugunat yisuka,” yiluk ambaligogi a? Yugunat yisuka dek o. 6Esigit diluk mendeat, Allah nen ninebe ninaʼbuwarogo dogolik, nggokogo yamak niyaligogo o. Esigit diluk kagarigogo eti paga, men yisuka,
“Akoni inenggaerek nen pogorakasinem Allah nen aʼit iyaligogo. Mende, inenggaerek inendainggen sebekogo dogogun kalok inaʼbuwa kiligogo,” (Ams. 3:34)
yiluk Allah wene paga kolal mbalogo ʼbisuka.
7Eti paga, Allah apma kinendainggen sebekogo unggiluk ane kologo dogolik, Iblis ane eti sagalogo togot diyasi dogono o. Togot diyamo, at nen togot dinagiluk lo liginat o. 8Kit Allah oba korokogo lago kalok, at nen kit kinoba korokogon wisiginat o. Kit weyak kagarigogi mende eti kininggi paga korogo togot diyani o. Kinendainggen mbere mende yi, kinakla weyak mende korogo laʼbiyani o. 9Kinakla weyak atluk, di ako, de ako, kagako dogono o. Esigit diluk kagako dogolik, endo arigogi mende eti, de ako dogono o. Nen, kinakla arlenggen kiligogi mende eti, kinakla weyak atluk dogono o. 10Ninewe Endaganggok apma unggiluk kinendainggen sebekogo dogogun kalok, at nen siyat dinagaginat o.
“Kit-kit kinagarlagi kinirugi kinom kinabok mbal-mbal yusak dek,” yiluk yogisasike wene
11Nagarlagi nirugi o. Kit-kit kinabok mbal-mbal yisi dogusak dek o. Kinagarlagi kinirugi amberek inaren mbalkik, wene inoba ʼbigik, kagarigogi kalok, wene Allah nen ninasuk wakike wene etnogoat weyak yiluk yu kagat, yiligogi o. Nen, wene eti weyak yiluk yiligogi kalok, wene eti kinasuk kologo kagarigogi ʼbuk. Kit nen,
“Wene eti weyak. Ebe pano esigit diluk yusak mende yisikemo,” yiluk yu kagat yiligogi o. 12Mende, Allah arligat nen wene ninoba ʼbigik, nggokik, kagarigogo o. At nenat ndil ninakik, weyagat ninakik kagasusak erlok mendeat ogwe, kit amberek nen kinagarlagi kinirugi mende wene inoba ʼbiligogi eti nenaluk. Kit nen esigit diluk kagasusak mende kagarigogi a? Erlok dek o.
“Kubuluk kagat lasusak kinonggodek dogolik, pogorakausak dek,” yiluk yogisasike wene
13Kit amberek nen,
“Yogondak a? Kubuluk a. O werlekmangge lalok nen, tahun omanggiat negen dogolik, yi mende ndi mende onggo mbalkik, sabusigik, kagako dogogin,” yiluk yiligogi eti, wene yi kinasuk kolini! 14Kubulukngge nit wene ninoba esigit diluk kagat lasigin, yiluk kinonggodegat dogolik yiligogi eti! Nit ninebe eti nena mende negen dogoligogi nogo. Oisa il omanggiat dogoluk nen ibat dek arigogo eti kak, ninebe esigit dilugat dogoligogi o. 15Kit nen mot yusak, men ambigi,
“Ninewe Endaganggok akla nen yigit diluk ndigit diluk ambasi kalok, ninilugat dogolik, yi mende ndi mende kagako dogogun,” yiluk yisi dogusak mende, 16kinenggaerek nen pogorakigik, siyadakigik, kagarigogi eti! Esigit diluk pogorakaligogi eti, weyagat o. 17Kit kinakla nen,
“Mot kagasusak, esigit diluk,” yiluk kinilu dogoligat ogwe, ebe kagakidek kalok, kit weyak kagatluk wene kinoba ʼbakaligogi o.
Zur Zeit ausgewählt:
Yakobus 4: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.