Ibrani 13
13
Allah akla arlenggentogo kagako dogusak wene
1Nagarlagi nirugi o. Allah aʼburi kinebe omanggiat mende negen naʼbuwa-kaʼbuwarogo kagarigogi eti, esigit diluk kinom kunigat kagako dogono o. 2It akoni amberek nen, malaikat mende inebe ap kuso salek inonggodegat woginakukasik inaogi iyakuka eti paga, ap kuso kinoba wago kalok, kinobakanini togot diyigidek woginako dogono o. 3It amberek ininggi kerle warek werekma, kinakla nen,
“Nit nen, ninomat nininggi kerle warek negen werek o,” yiluk it inoba ebekik, it amberek yi weyak ndi weyak kagarinakonem, kit kinakla nen,
“Nit nen, agat oba yoma awan werekma esigit dilugat kagat ninabusagat o,” yiluk, it inoba ebekik, kagako dogono o. 4Ap inom, kumi inom, inobabut yugunat kagarinabik liligogi mende inom, ap inagugi mende yogot kagarigogi mende inom, it yabunggane Allah nen wene inoba ʼbiluk weyagarinabigin eti paga, ap nen kumi yiginabigogi eti, akoni taʼbokogonat nen nggogot diluk, yugunat paginakidek kumi ap waganek mende dombok inom pano noge yisi dogusak o. 5Allah nen ninebe dombok pasigat yisi dogolik,
“An nen kat ninggi pesokogo togot dagagik, kebe kasokneat ʼbagagik, kagasigin dek o,” (Ul. 31:6, 8; Jos. 1:5)
yiluk yisike eti paga, kit uang kinendainggen kunik mondok dogogup o. At te ʼbugurlagat werek eti, kit kinakla nen,
“Yi erlok werek,” yiluk ambausak o. 6Esigit diluk ambasi dogolik, kinakla nen,
Allah nen,
“Ninggi pesokogo togot dagagin dek o,”
yisike eti paga, ninendainggen kambukogo dogolik men yisi dogusak,
“Nombae Endaganggok an yamak niyaligogo mende. Eti paga, akoni nen an ninggit diluk kagat nabusak. An nayuk dek o,” (Mzm. 118:6)
yiluk yisi dogusak o.
7Kineugi alebat kinanggorlem welaguka mende nen, Allah wene yokisasuka mende eti, inoba eberek dogono o. It inendainggen Allah oba panggot diluk, inebe iniluk dogolik inom, watlasusak oba inom, kagako laguka mende didiluk, kit it inobabut waganogo kinendainggen Allah oba panggot diluk dogono o. 8At Yesus Kristus eti ebe o paganeat inom, yogondak ya inom, ikok mondok werek eti kak, yabunggane esigit dilugat ikok mondok dogogin o. 9Esigit dilugat dogogin eti paga, it akoni amberek nen yi wene ndi wene ninat mende paga nuket dinagunogo. Nen, it akoni alebat niligogi mende pasik nggogot diluk kagako laguka eti paga pano agidekma, ninendainggen eti paga korle asusak erlok dek. At te, Allah obabut pano nen woknisaligogo eti paga ninendainggen pano korle asusak o. 10Allah ago su mende palekma it ap Allah indewerek Yahudi mende nen sapi kambing Allah ake warogo nggit mberlago paga ʼbisi laguka eti kak, nit nen Allah ake ʼbiyaligogi mende eti, it ap eti nen nausak erlok dek o. 11O etoma it ap Allah indewerek inewe nggok nen it taʼbokogonat weyak kagako laguka mende Allah nen sagalogo deget duwagaluk, sapi kambing warogo amep wolok o ngganggok mbalek Allah enggaerek aguma negen eti unggisi lagike mende, sapi kambing ebeat, leget sikmangge kali kuni dukisi laguka. 12Esigit diluk kagako laguka eti paga, at Yesus enggaerek amep oba aʼburi weyak kagarigogi mende korogo inebe Allah ake ʼbiyagaluk leget ʼbak leget ambe mbalek abel sikmangge watlagike. 13-14Esigit diluk watlagike eti paga, nit agat oba yoma mondok dogusak dek. Nit yabunggane o mondok dogogun mende kweyarigogi eti paga, at Yesus akoni nen inane aik dagok, mbaik dagok dalko laguka kak, nit esigit dilugat yoknisasi nggorlek, at oba leget abel sikmangge dukisi doguwok o. 15Eti paga, at Yesus ninom kunik dogolik, nit nen,
“Allah nombae,” yiluk sapi kambing warogo at ake wogoko dogu kak, kibitngge-yogongge ninambe paga nen Allah endaga nggokogo pogorako mondok doguwok o. 16Esigit diluk yisi dogolik, akoni amberek pano kagarinakik, yamagiyigik, kagako doguwok. Esigit diluk kagako dogusak eti, Allah akla arlenggen asuwagaluk, sapi kambing wareko dogu kagatma, obarlikmat dusak mondok dek o.
17Kit kineugi inakla nen,
“Yabunggane Allah nen,
It inendainggen pasik ninggit diluk kagako lagasip, yiluk yoknisasinem, nit nen ninoba dombogat onggo yogosugun kigi,” yiluk, panorogo kinanggorlem mondok werek eti paga, it inapma soma yiluk inane kologo kagako dogono o. Esigit diluk kagako dogogun kalok, it inakla arlenggentogo, kit kinake kagako dogogun o. Mende, kit nen it inane kologo dogogun dek kalok, it inakla weyak dogolik, kit kinake wirlikogonat kagako dogusak o.
18Nit yi mende ndi mende pasik pano dombok kagako doguwogoluk, ambasi dogolik, ninakla nen,
“Nit wene ninoba dek. Ninakla selek,” yiluk ambaligogi eti paga, nit ninake sembayan yisi dogono o. 19Yisi dogolik, ebe nggok, an nebe Allah nen ibat-ibat kit kinoba niyogoba laʼbani wisuwagaluk sembayan yisi dogobagik nen yiluk yokisigi o.
Allah nen panorinabuwagaluk sembayan yisike wene
20Ninombae Allah dambulogo ʼbinanigogo mende etnogo nen, ninewe Endaganggok Yesus watlagikesikmo nen ebe ilugut disike. At ebe amep wulabogo wakuka eti paga, Allah nen nit ninom kunuwogoluk wene mondok dogogin mende warogo wokninakikesik, nit taʼbokogonat Yesus nen anggo domba negen ninanggorlem dogowagaluk ebe nggogat mendisike o. 21Kit Allah akla warlok ambaligogo mendeat pano kagasubagik nen, yi mende ndi mende pano mende taʼbokogonat wokisawak. Esigit diluk wokisasinem, nit ninom taʼbokogonat nen Allah akla arlenggentogo kagako dogowagaluk, ninobabut at nen woknisagin eti ebe, Yesus Kristus nen woknisawak o. At Kristus etiat pogorako mondok doguwok o. Ebeat asuwak yu kak,
“Amin,” yigi o.
Wene ilugun oba arat yogisasike wene
22Nagarlagi nirugi o. Wene ʼberoat kinasuk warogo kolal mbalogo kinoba laʼbi wagi yi, kinaʼit agidek kinasuk kologo dogono o. 23Nen, ninagot Timotius etnogo, ebe arat kerle piyalogo wula ʼbegama nen kinilurogo dogobagik nen yiluk yokisigi o. Nen, at ebe ibat-ibat an noba wago kalok, an yabunggane kit kinoba ʼbikiya wago dogolik nimbisak wisugun o. 24Kit nen, it ap kineugi kit kinanggorlem werek mende inom, Allah aʼburi inom, inebe taʼbokogonat,
“At nen keyagi watkinake,” yiluk yogisano o. Nen ninagarlagi ninirugi o Italia werek mende nen keyagi watkinakaat o. 25Nagarlagi nirugi o. Allah obabut pano etnogo nen kit taʼbokogonat kinanggorlem dogowak o.
Zur Zeit ausgewählt:
Ibrani 13: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.