2Timotius 4
4
1-2At Kristus Yesus ebe yabunggane agat oba selekmaat witluk nen, akoni ninebe niniluk werek mende inom, watlaguka mende inom, taʼbokogonat wene ninoba ʼbigik, nggokik, kagasigin o. Kagako dogoluk, yi akoni ndi akoni taʼbokogonat apma ʼbiyalok, at ebe nggok dogogin eti paga, an nen, ninombae Allah inom, Yesus inom, imbisak inil oba, kat nen ebe wene akoni yogisasi dogonok nen yiluk nane obatnerogo kasuk warogo yokisik. Akoni pano wene yogisasinem kolusak warlok mende inom, inaʼit mende inom, koluwagaluk wene eti kobatnerogo yogisasi dogono o. Kakla mbuk agidek yanggul isasi dogolik, weyak kagakonem kane ʼbukakogo yogisigik, inasuk wakik, inendainggen ago warogo yogisigik, kagako dogono o. 3Yabunggane, it akoni nen ebe wene inasuk panorogo kolkidek dogolik, we wene inasuk kolu warlok nen, yanggul isasi dogowagaluk it amberek inebe dogalegat inayonggo ʼbiluk, nandorinabugun. 4It eti ebe wene eti yisinem inasuk labet diluk, wene siyonggane mbileligogi wene eti mbilelkonemat, inasuk ʼbalokogo kolko dogogun o. 5It esigit diluk kagako nggorlegat, kat yi mende ndi mende ake, kobabut kwalek dogolik, koba yi aik ndi aik kasi dogolik, kobakanini kambuk yiluk dogono o. Pano wene yanggul isalik liligogo eti mende nggogot diluk Allah nen,
“Esigit diluk yamagiyasi dogono o,” yiluk, kayonggo ʼbisike mende eti omanggi togot digidegat motogo kagako dogono o. 6Akoni nen an nebe Allah ake namep wulabogo nasugun oba arat panggok yi waga o. Esigit diluk nasumo, an nebe nombae oba lausak ndak-ndagat agama werek o. 7Ta ae aʼbusuk, ta ae aʼbusuk liligogi kak, an nendainggen Allah oba panggot diluk mondok dogolik, at ake nobatnerogonat pano kagarik wago lagarik nen, kurli paga arat kagat lasi waga o. 8Akoni inae walkasinem, inae aʼbusuk asugun mende onggo pano mende wogisiligogi kak, an nebe arat lagonem, ninewe Endaganggok nen wene ninoba ʼbigik, nggokik, motogonat kagasigin etinem, at nen,
“Kat morat pano kagako laganma,” yiluk, onggo nggare-nggare mendago negen omanggi woknisigin werek o. Mende, an narligat woknisigin ʼbuk. It amberek inakla nen,
“Yesus witnek o,” yiluk, warlok nen anggorlem dogoligogi mende taʼbokogonat ninom woknisaginat o.
At Paulus nen, “Timotius, noba witno,” yiluk yogokike wene
9-11At Demas etnogo agat oba mende yoma akla warlok nen, an togot daniluk o Tesalonika lagama o. Nen, at Kreskes, o Galatia lagik, Titus o Dalmatia lagik, kagakama at Lukas arligat nimbisak werek eti paga, kat ibat noba witnok nen, kobatnerogo walkasi dogono o. Esigit diluk walkasi dogoluk nen wisigiluk kalok, Markus etnogo obabut an Allah ake kagakonem pano yamak niyausak mende werek eti paga, ebe waganik-waganik noba witno o. 12Nen, at Tikikus etnogo, o Efesus lowagaluk laʼbigima o. 13Kat wago dogolik nen, su sogi mende sikmangge yirigogo mende etnaga inom, wene kolal mbalek amberek yomenaga, waganggo dogolik, ebe nggok kak, domba owado nggarek mende paga wene kolal mbalek etnaga inom, o Troas at Karpus aguma etoma ʼbiluk wagima yomenaga taʼbokogonat wolok witno. 14Nen, at Aleksander tembaga mende andugun negen kagarigogo mende etnogo nen, an nggokogonat weyagat nakemo werek. Mende, at ninewe Endaganggok nen at kagake eti ndak-ndagat wene oba ʼbigin werek o. 15At eti ebe wene nit nen yanggul isasilago mende ninane sagalogo togot diyalok kagako lagama eti paga, kat kobabut kwalogo dogono o.
16Akoni nen wene noba ʼbiluk, nendema alebagik waganggonem, an nen,
“An noba ʼbukmo o,” yiluk wene noba nggorasinem, it taʼbokogonat an neragalilu omanggi yamak niyau degat togot daniluk dukega eti pasik, Allah nen wene inoba ʼbigidek dogowak o, yiluk sembayan yiligogo. 17Esigit dilugat mende, an nen ebe wene dikogo yogisasinem, it sikmangge mende inebe taʼbokogonat inasuk koluwagaluk, ninewe Endaganggok an neragalilu dogolik, nobatnet nakesik, singa kelo yengge negen anini weyak mende etnogo ambema werekma ndil nabu kak, nasusak mende ndil nake o. 18Esigit diluk ndil nakesik nen, yabunggane akoni nen yi weyak ndi weyak kagat nabuwogoluk kagakonem, at nenat ndil nako dogoluk nen, ndilogo woknarek mbogot oba, at apma dogogunmo etoma unggigin eti pasik, at pogorako mondok doguwok, yiluk,
“Amin,” yigi o.
Wene ilugun oba arat keyagi warinakike wene
19Kwe Priskila inom, agun Akwila inom, at Onesiforus aʼburi inebe taʼbokogonat inom,
“Paulus nen keyagi watkinake,” yiluk yogisano. 20At Erastus etnogo o Korintus puk aga o. Nen, at Trofimus etnogo oba u warek nen, o Miletus ʼbiluk wagi o. 21Kat, o miyo nasinem sogi weyak arigogo etnogo awan wagidek werek nggorlek, ya pagaat ibat wisigiluk kobatnerogo walkasi dogon o. At Ebulus inom, Pudes inom, Linus inom, kwe Klaudia inom, ninagarlagi ninirugi Allah aʼburi mende amberek taʼbokogonat nen keyagi watkaka o. 22Ninewe Endaganggok kendainggenma kanggorlem dogolik, at obabut pano etnogo nen, kinebe taʼbokogonat pakisek dogowak o.
Zur Zeit ausgewählt:
2Timotius 4: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
