1Timotius 4
4
“Akoni amberek nen wene nggorlo wene inenggalat kinakla nggagali wisugun etnaga,” yiluk yogokike wene
1Allah Agurengge nen wene ʼbukakogonat yoknisasi dogolik,
“O ilugun oba, akoni amberek Allah wene eberogonat yiluk ambiligogi mende nen, wene eti
Ninaʼit, yiluk togot diyalok nen, Iblis agoromi kugi inobabut weyak nuket diyiligogi mende inapma unggiluk, wene it nen yanggul isiligogi wene eti paʼbiluk kagako dogogun. 2Kagako dogolik, akoni ininggi senap atlukmo, nena mende pakaʼbuk yiluk yiligogi eti kak, it eti inakla nggoʼbot atluk nen,
Yi weyak kagakoma kigi. Yi pano kagakoma kigi, yiluk ambigidek yugunat kagako dogogun. Esigit diluk kagako dogolik, inenggalat dal-nggwaltogo kagarinako dogogun o. 3It nen wene yisi dogolik,
Kumi woginabusak mondok dek, yigik,
Yi mende ndi mende niligogi mende eti omanggi yi mende wusa. Nasi dogusak dek, yigik, yisi dogogun,” yiluk, Allah Agurengge nen yoknisasike ndak-ndagat yiligogi o.
Mende, niligogo mende eti Allah nen nit ninendainggen at oba panggot diluk dogolik, ebe wene eti didogo kalok, keyagi warogo nasi dogowagaluk winamet disike mende pasigat yiligogi o. 4-5Yi mende ndi mende Allah nen winamet disike mende eti pano arlek o. Sembayan yisinem Allah wene eti paga panot diligogo yiluk,
“Yi weyak mende,” yiluk togot digidegat, Allah keyagi warogo nasi dogusak arlek.
“Kat Kristus Yesus anduwanengge dogolik motogo kagako dogono,” yiluk yogokike wene
6Wene pano wene ninendainggen Allah oba panggot diligogi mende etnogo yanggulkoko lagagumo, kat nen waganggigindik motogo kagarigogon eti paga kendainggen korle ago dogolik, wene yogondak yokigi eti, ninagarlagi ninirugi Allah aʼburi mende amberek yanggul isasi dogono o. Esigit diluk yanggul isasi dogogin kalok, kat Kristus Yesus anduwanengge dogolik, at ake panorogo kagako dogogin o. 7Akoni nen wene siyonggane ebe wene dek mendeat, yugunat inenggalat mbileligogi mende eti, togot diyasi dogono o. Togot diyalok, Allah apma dogolik kagarigogo mende etiat kobatnerogo yanggulasi dogono o. 8Akoni inebe inake mep aborlok yuwagaluk kagarigogi eti yogondak ya elalma ake ʼbugurlagat pano negen kagarigogi o. Mende, ninendainggen ake Allah apma dogolik, at eyabu kagako dogumo, at Allah nen,
“Yogondak kiniluk werek mende ake inom, yabunggane kiniluk mondok dogogun mende ake inom, pano mondok kagat lasigin o,” yiluk, abok yoknisasike eti eberogonat. 9Eti paga, wene eti eberogonat ninendainggenma dikogo waganusak o. 10Allah ebe, yi akoni ndi akoni taʼbokogonat ndil ninabigogo mende werek mende, nggok kak, nit ninendainggen at oba panggot diligogi mende ndil ninabigogo eti paga, ninendainggen at iluk mondok dogoligogo mende oba panggot diluk, at ake ninaʼit agidegat, ninobatnerogo kagarigogi o.
11Wene eti taʼbokogonat akoni motogo kagako dogowagaluk, yogisigik, inasuk wakik, kagako dogono o. 12Kat kebe elege awan werek eti paga, it akoni amberek nen inakla kai dagusak dek o. Mende, kebe elegeat dogolik, akoni amberek inendainggen Allah oba panggot diluk werek mende nen, kat kobabut waganuwagaluk, kane motogo yogisigik, kobabut motogo kagakik, akoni inaʼbuwa kigik, kendainggen Kristus oba panggot diluk welagik, weyak kagakidek kilaga iyokogo welagik, kagako dogono o. 13An nebe awan wagidek werek nggorlek, Allah wene kolal mbalek etiat it amberek inasuk koluwak nen, endaga wenakik, inasuk wakik, yanggul isigik, kagako dogono o. 14Kat kake paganeat it ap Allah aʼburi inanggorlem dogoligogi mende nen ininggi kunggulowak sebelko nggorlek, it ap Allah wene yogisiligogi mende nen men yisuka o.
“Kat yabunggane esigit diluk kagako dogono o,” yiluk, yokikuka ndak-ndagat, Allah obabut pano nen eyabu kagako dogowagaluk Agurengge nen ninobabut dombok woknisiligogo etnogo kat wokikike mende eti paga kagakidek kobakanini togot diyagup o. 15It akoni taʼbokogonat nen kat karen mbalko dogolik,
“At Timotius alebagik pano kagako lagasik nen yogondak pano mondogat kagarigogo,” yiluk enggagat didaguwagaluk, wene yokigi mende eti taʼbokogonat kendainggenma ʼbiluk kagako mondok dogono o. 16Esigit diluk kagako dogolik, kenggaerek kake inom, it akoni amberek yanggul isaligogon mende inake inom, kobabut kwalogo dogono o. Kobabut kwalogo dogolik, kakla mbuk agidek, eti mendeat kagako mondok dogono o. Esigit diluk kagako dogogin kalok, kenggaerek nen kebe ndiligik, akoni amberek kane koligogi mende inebe ndil inakik, kagasigin o.
Zur Zeit ausgewählt:
1Timotius 4: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.