1Petrus 5
5
“Allah aʼburi yigit diluk inanggorlem dogono o,” yiluk yogisasike wene
1Kit Allah aʼburi inanggorlem dogoligogi eti kak, an esigit dilugat inanggorlem dogoligogo mende nen kinasuk omanggi wasik. At Kristus oba yi aik ndi aik kilik kilik watlagike eti an nilenggen kasigi. Nen, yabunggane Allah nen ebe winamerogo laʼbi wisigin eti wagonem, akoni nen pogorasugun eti an ninom pogot ninabugunat o. An nane enagogo kinasuk wasik. 2Allah nen,
“An naʼburi domba nomolek negen esigit diluk inanggorlem dogono,” yiluk kinayonggo ʼbisike kagat, inanggorlem dogono o. Inanggorlem dogolik, kinenggaerek kinaʼit werek nggorlegat, akoni amberek nen, inane obatnerogo yokisasinem inanggorlem welagik, nen, kinakla nen,
“Onggo omanggi woknisuwak,” yiluk ambasi dogolik inanggorlem welagik, kagako dogogup o. At te, kinakla arlenggen togo inanggorlem dogono o. 3Allah aʼburi inanggorlem dogowagaluk sumbusogo wokisasike eti inanggorlem dogolik, kinebe nggok negen dogolik, mep dagik-dagokogo kagarinako dogogup. At te, Kit pano kagakonem inilenggen kiyalok kinobabut waganogo kagako dogowagaluk, pano kagako dogono o. 4Esigit diluk kagako werekma, Ninewe Nggok andomba indewerek etnogo witluk nen,
“Pano mondok kagako lagapma,” yiluk ta ae aʼbusuk ta ae aʼbusuk lagonem, onggo nggare-nggare mendago yiʼbiyiligogi eti kak, onggo pogorako mondok dogogun mende wokisagin o.
5Nen eti kagat, kit ap elege nagoromi. It amberek nen Allah wene paga men yisuka,
“Akoni inenggaerek nen pogorakasinem Allah nen aʼit iyaligogo. Mende, inenggaerek inendainggen sebekogo dogogun kalok inaʼbuwa kiligogo,” (Ams. 3:34)
yiluk kolal mbalogo ʼbisukama werek eti paga, kit nen inarluwendek inapma unggiluk inane kologo kagako dogono o. Esigit diluk kagako dogolik, kit taʼbokogonat nen, kinenggaerek nen pogorakigidek inapma dogolik, kit amberek nen it amberek inanduwanengge welagik, it nen kit kinanduwanengge welagik, kagako dogolik yamak-yamak kagako dogono o. 6Esigit diluk, Allah nen yabunggane mendinaguwagaluk, yogondak ya kinenggaerek nen pogorakigidek, at inggi obatne werek mende apma unggiluk kinendainggen sebekogo kagako dogono o. 7Allah kinebe kinaʼbuwa eti paga, kit yi mende ndi mende pasik kinakla wene munini uwan ʼbero eberigogi eti togot diyalok, kinendainggen at oba panggot diluk dogono o.
8At Iblis, kinasili mende etnogo nen, singa yengge kelo anini weyak mende yi mende ndi mende kambokogo nagaluk ane ngge agan kweyarik liligogo eti kak,
“Ta kak weyagat digin,” yiluk kweyakinabik liligogo eti kinobabut kwalogo kinilenggen panorogo dogono o. 9Esigit diluk dogolik, kinakla nen,
“Ninagarlagi ninirugi o yi ai ndi ai agat oba inebe taʼbokogonat yi aik ndi aik kiligogi kagat, kiligogi o,” yiluk, at Iblis wagonem, ane kolkidek togot diyalok kinendainggen Allah oba panggot diluk kinobatnerogo mendek dogono o. 10Werekma, at Allah ebe pogorako mondok dogogun eti kak, kit Kristus kinom kunik werekma kinomat pogot kinako dogowagaluk kinayonggo ʼbisikemo, yogondak ya ʼbugurlagat kinoba yi aik ndi aik kasi dogoluk, yabunggane, at obabut pano mondok etnogo nen, kinendainggen awan mende ʼbogokogo kagat kinakik, korlet kinakik, kinobatnet kinakik, kambugut kinakik, kagasigin o. 11Yi mende ndi mende taʼbokogonat at arligat inde dogolik pago mondok dogowak, yiluk,
“Amin,” yigi o.
Wene ilugun oba keyagi warinakike wene
12An nen wene ʼberoat eti kinasuk warogo kinoba laʼbi wisigiluk, kolal mbaluwagaluk an nagot Allah aʼbut Silas obabut kumbulik kigirik nen, ayonggo ʼbigima mbalkemo kinoba laʼbi wagi o. Allah obabut pano nen kagat ninabigogo mende ebe yiat yiluk, an nilu dogolik eberogonat yokisigi o. Eti paga, kinendainggen eti paga panggot diluk dogolik, kinobatnerogo mendek dogono o, yiluk wene kolal mbalogo kinoba laʼbi wagi o. 13Kinagarlagi kinirugi Allah aʼburi at nen mikinakike mende o Babilon yoma dogoligogi mende nen keyagi watkinakik, naʼbut Markus nen keyagi watkinakik, yega o. 14Nen, kit-kit, naʼbuwa-kaʼbuwarogo keyagi kinambe sarluk wat-wat yilik lani o. Allah nen kit Kristus kinom kunik mende kinebe taʼbokogonat kinendainggen kambukogo pakisek dogowak o.
Zur Zeit ausgewählt:
1Petrus 5: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.