1Petrus 2
2
“Yesus ebe nggit o kerlaga ʼbiligogi eti kak o,” yiluk yogisasike wene
1Eti paga, kit weyak kagako lagap mende eti mondok togot diyalok dogono o. Akoni amberek nuket diyigik, kinendainggen mbere kagakik, uwa mbalkik, kinenggalat akoni amberek inabok weyak mbalkik, kagarigogi eti togot diyasi dogono o.
2-3Yi mende ndi mende induk walkalok, pano yiligogi eti kak,
ninewe Endaganggok obabut pano kegep
eti paga, elege ngget endago mende irlak abu nen nasi mondok werek eti kak, wene pano wene kinendainggen eti paga korle asumo panot kinabuwagaluk, wene etiat kit warlokogo waganggo mondok dogono o. 4At ebe nggit negen iluk werek mende yiluk, oba witno. Akoni nen,
“Nggit eti weyak,” yiluk togot diyasuka mende, Allah nen,
“Nggit yi mondok pano mendeat,” yiluk mikogo ʼbisike. 5Esigit diluk ʼbisikemo, kit kinebe nggit iluk dogoligogo eti mende negen dogolik, at oba witno o. At oba wagonem, Allah nen at enggaerek ago palogo ʼbinaguwak. At ago palekma, kinebe Allah indewerek Yesus Kristus kinom kunik dogolik, Allah ake akla arlenggentogo anggo wako dogu kak, kinendainggen wogoko dogono o. 6Eti mende pasik Allah nen men yisike,
“An nen, nggit pano mondok mende mikogo o Sion yoma o kerlaga omanggi warogo ʼbigi yi kani. Kit akoni kinebe dombok kinendainggen at oba panggot diluk dogogun kalok, kinenggarli kugun dek o,” (Yes. 28:16)
yiluk yisikemo kolal mbalogo ʼbisuka o. 7Kit kinendainggen at oba panggot diluk werek mende nen,
“At pano mondok,” yiluk didiligogi o. Mende, it amberek inendainggen at oba panggot digidek mende inake arlek, men yisike,
“It ap tukang o nggit mende palko dogolik,
Nggit yi weyak, yiluk togot diyega mende eti kerlaga kagat lagama o,” (Mzm. 118:22)
yiluk yisike. 8Nen, omanggi men yisike,
“Akoni nggit eti paga iniyok aʼbit dikogo waralalok wi lasi lago dogogun o,” (Yes. 8:14-15)
yiluk yisike. Esigit diluk wi lasi lago dogogun eti, it nen pano wene eti,
“Eberogonat,” yiluk didugun dek eti paga, Allah nen akla ambasike kagat, wariligogi o.
9Mende, it arlek,
“At Allah nen pano kagat ninabigogo,” yiluk abok yogisilik lowagaluk, kinebe o amummo werekma, at ebe elalinat liya mondok werekma oba wisuwagaluk kinayonggo ʼbisikesik, kit at aʼburi asuwagaluk mikinakik, at ebe indewerek nggokndek dogowagaluk mendinagagik, kinunggulowak endaga at enggaerek unggulowak endaga mende salogo ʼbinagagik,
“Nenggaerek naʼburi,” (Kel. 19:5-6; Yes. 43:20-21; Ul. 4:20; 7:6; 14:2)
yiluk kinebe wokinakik, kagakike o.
10Kit alebat, Allah kinom kunik welagidek mende,
yogondak kinebe Allah aʼburi agap o. Nen, alebat, kit nen,
“Allah ninebe ninaʼbuwa werek,” yiluk kinonggodek welagagip mende, yogondak,
“Ninebe Allah ninaʼbuwa nen wokninakikemo, werek o,” (Hosea 2:23=TB 2:22)
yiluk kinilu agap o.
“Kinobabut Allah anduwanengge dogolik, Esigit diluk kagako dogono o,” yiluk yogisasike wene
11Nagarlagi nirugi o. Kinebe kinaʼbuwa o. Kit kinebe ap kuso akoni inaguma laʼbinagumo lalok, etoma dogolik, yi mende ndi mende kinakla nen nggagalogo dagi witluk, kinendainggen nen nasinem warlok ambaligogi mende eti, sili mende nen inarigogi eti kak kinebe weyagat kinabigiluk, kinakla nen nggagalogo dagi wirigogo mende eti togot diyasi dogobagik nen yiluk yokisaligogo o. 12It akoni sikmangge mende Allah inonggodek mende kinom dogolik, it nen, kit weyak karigogi mende salek,
“It weyak kagarigogi o,” yiluk kinabok weyak yisi dogoligat, kit kinobabut pano kagakonem inilenggen kiyasi dogoluk nen, akoni nen at Allah ebe yabunggane wagonem pogorasuwagaluk kit kinobabut motogo kagako dogono o.
13-15At Allah nen, kit men kagako dogowagaluk akla ambasike. Akoni inendainggen dek mende nen wene inonggodek dogolik yiligogi eti inenggarli atluk inane dek asuwagaluk, kit kinobabut pano kagako dogowagaluk akla ambasike eti paga, ninewe Endaganggok ake akoni nen it pemerintah mende nggok dogowagaluk mendiyasuka mende eti inebe taʼbokogonat inapma unggiluk inane kologo kagako dogono o. Esigit diluk kagako dogolik, Kaisar endaganggok pemerintah mende inewe nggok eti inom, at nen it gubernur agarlagi inom akoni weyak kagakonem wene inoba ʼbigik, pano kagakonem pogorinakik, kagako dogowagaluk inayonggo ʼbiluk laʼbiya wirigogo mende eti inom, inane kologo kagako dogono o. 16Esigit diluk dogolik, kit nen,
“Nit weyak mende apma werekma, Allah nen kerle piyalogo ninasokneat ʼbinanggikemo werek o,” yiluk, weyak omanggi limago kagako dogogup. At te, kinobabut Allah anduwanengge dogolik kagasusak mende motogonat kagako dogono o. 17Akoni taʼbokogonat inalon palko dogono o. Esigit diluk yogisasi dogolik, kinagarlagi kinirugi inom Allah aʼburi mende kinendainggen kunik dogono o. Dogolik, Allah ebe kinayukogo welagik, nen, Kaisar endaganggok pemerintah mende inewe nggok eti alon palkik kagako dogono o.
“Kit nen Kristus obabut waganusak,” yiluk yogisasike wene
18Kit amberek, kineugi inanduwanengge werek mende eti it inapma dogolik, inobabut pano enago mende arlek inake kinayukogo inane kologo kagako dogusak ʼbuk. At te, inobabut nggorlo mende inomat kinayukogo inane kologo kagako dogono o. 19Kit nen weyak omanggi kagakidekmaat, kineugi nen yi aik ndi aik kagat kinako nggorlek, kinakla nen,
“Allah akla warlok mende kagasusak,” yiluk didiluk, kinendainggen sebekogo kinobakanini kambuk yiluk dogogun kalok, at nen panot kinabigin o. 20Mendeat, kit nen weyak kagasugun oba, onggo ndugi kinako nggorlek, kinendainggen sebekogo kinobakanini kambuk yiluk dogogun kalok, pogot kinabusak nogo? Dek o. Kinobabut oba yusak o. Mende, pano kagakonem, yi aik ndi aik kagat kinako nggorlegat, kinendainggen sebekogo kinobakanini kambuk yiluk dogogun kalok, Allah obabut pano nen panot kinabiginat o. 21At Kristus ebe kit kinake yi aik ndi aik kilik kilik watlagike eti paga, kit men, at obabut waganogo yi aik ndi aik kowagaluk Allah nen kinayonggo ʼbisike o. 22At nen,
“Weyak omanggi kagakidegat. Nen, enggalat yisinem, akoni amberek inasuk kolkidegat o.” (Yes. 53:9)
23Akoni nen inane aik dagok weyak yogoko nggorlegat, at nen onggo ane aik dagok yogisigidegat. It nen yi aik ndi aik kagako nggorlegat, at nen,
“An yabunggane onggo omanggi kinasigin,” yiluk yogisasi lagike degat. At te,
“Allah nen wene inoba ʼbigik, nggokik, motogo kagasigin mende werek o,” yiluk, at inggi paga ʼbiluk, ane onggo yigidek puk ago lagike. 24Nit ninobabut weyak kagako lagagu mende eti akoni watlatluk yi mende ndi mende kagarigogi dek eti kak, nit weyak mende togot diyalok, niniluk dogolik Allah akla warlok mende kagako dogowagaluk, nit weyak kagako lagagu mende nggorogo, at Kristus oba ʼbakasikemo, ebe o paga mendiluk wakuka o. At ebe liʼbik-laʼbakogo wakuka eti paga, kit panot kinakike o. 25Kit alebat, domba kolak nuk asi liligogi eti kak, nuk asi lago lagagip mende, yogondak at Allah nen, ap kinebe pakisek dogolik kinanggorlem werek mende oba kiniyogoba wokisek ʼbinagi wagama werek o.
Zur Zeit ausgewählt:
1Petrus 2: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
