1Yohanes 1
1
Ebe wene nen ninilugut ninabigogo wene
1Wene kolal mbalogo kinoba laʼbi wago eti ebe, ebe wene ninilugut ninabigogo mende ebe-alep erlo paga nen dogoligogo mende. Wene eti, nit arat ninasuk kolkik, ninilenggen dombok kigik, ʼbirogo welagik, nininggi pakigik, kagakugu mende etnogoat o. 2Nen, at iluk mondok dogoligogo mende eti ebe ombae imbisak iluk mondok welagikesik nen, ombae nen nit ninilenggen kowagaluk selekmat disikemo ninilenggen kasugusik nenat abok yokisaligogi o. 3Ebe nit ninilenggen kigik, ninasuk kolkik, kagakugu mende eti ninombae Allah aʼbut Yesus Kristus imbisak ninom kunik werek eti kak, kit nit ninom pano kunik doguwogoluk yokisaligogi o. 4Nen, wene yi pasik ninakla arlenggen kiligogi mende eti, yabunggane ninakla nggokogo eberogonat arlenggen kuwogoluk kolal mbalogo kinoba laʼbi wago o.
“Allah aʼbut nen, Allah ebe, liya etiat o, yiluk yoknisasike,” yiluk yogisasike wene
5Allah aʼbut nen yoknisasi dogolik,
“Allah ebe, liya etiatma, o amum at oba dogoligogo mondok dek o,” yiluk yoknisasike mende, nit ninasuk arat kolkugu mende yokisaligogo o. 6Nen, nit ninane paga nen,
“At ninom kunik werek,” yiluk yisi dogolik, o amummo dogolik inobabut kagarigogi mende eti kagarigogi kalok, ebeat mende kagakidek ninenggalat yiligogi o. 7Esigit diluk mende, Allah ebe liya paga werek eti kak, nit men, liya paga dogolik, pano kagarigogi kalok, nit-nit nagarlak-kagarlak ninom kunik werekma, nit weyak kagakonem at aʼbut Yesus amep paga kotninako mondok dogoligogo mende o. 8Esigit dilugat mende, nit nen yisi dogolik,
“Nit weyak omanggi kagakidek,” yiluk yiligogi kalok, ninenggalat ninenggaerek nuket dakaligogi eti paga, ebe wene ninakla mondok dek o. 9Mende, nit weyak kagarigogi mende selekma ʼbukakogo yugun kalok, at Allah obabut motogo mondok kagako dogolik, abok yoknisaligogo kagat, kagarigogoma, at nen nit weyak kagarigogi mende sagalogo togot diyalok, weyak kagasuwogoluk ninakla eberigogi mende kotninabigogo o. 10Esigit diluk mende, nit nen,
“Weyak omanggi kagakidek werek,” yiluk yiligogi kalok, nit nen,
“Allah enggalat yiligogo,” yiluk yu kagat yiligogi eti paga, Allah wene nit ninakla mondok dek o.
Zur Zeit ausgewählt:
1Yohanes 1: DNA
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.