ROMA 11
11
Allah fakamaman ḇyedi faro er Israel
11:1-12
1 #
Flp. 3:5
Yaḇe yafuken: Inja Allah mankundi isawen kawasa ḇyesya kwarke? Roḇa kaku ḇeri! Snar aya ḇardi snon oso ro Israel, Abraham kpu ḇyesi, ma ro keret Benyamin. 2Roḇa! Allah isawen kawasa kyinfir kwar ro randakyansyaḇa. Naek srar mkofawi kwar rosai ḇefas ro Refo fa ḇekur Elia, rofyor ḇyuk safsof ro kawasa Israel faro Allah. Elia ikofen, 3#1Raj. 19:10“Manseren, snonkakusya smun nabi-nabi bansi ma simkok rokef ḇekun farsarser faro awna. Yemir monda yakenem ma simarisen siḇe smun aya.” 4#1Raj. 19:18Rosai Allah kyarem faro Elia? Allah kyarem, “Yafaduru snon syaran rifik faro mankundaya kwar. Ma saksyom faro karwar Baal ḇaim.” 5Rarirya kako ro baboine: Allah kyinfir rarwas kasun oso kwar rofandu snonkakusya snar fakamaman ḇyedi. 6Allah kyinfirsi ḇyeknam ro fakamaman ḇyedi mboi ḇyeknam ro fararur senaḇa. Snar rofyor Allah kankinfir ḇyedi ḇyeknam ro snonkakusya fararur sena, nari Allah fakamaman ḇyedi fakamaman ḇekaku risyaḇa.
7Inja, rariso? Kawasa Israelsya sisma rosai ssewaryaḇa. Ḇesmasya isoine rarwas kasun monda Allah kyinfir kwarsya. Ḇesesyakam siḇrusna npakrek faro Allah fararyor ḇyedi. 8#Ul. 29:4; Yes. 29:10Snar ro Refoya sfas radine, “Allah ifrur sne ma swaruser sena fa nedip; ma isof fafisu ine simkasna nmamba ma knaram sena namnafba.” 9#Mzm. 69:23-24Daud ikofen kako ḇo doḇo,
“Iḇye munara sena nedenem faro mankunsi,
ma neder, moḇ sisapi fa semompraf!
10Iḇyekada mamam sena npampan insa smam awer;
ma iḇyekada sikrusna nayar isof fyoro-fyoro.”
11Yafuken wer: Fafisu kawasa Yahudi sisapiya, inja rarirya insa semomprafke? Roḇaḇeri! Ḇape snar sasar sena, mboi er ḇesesya sisma aski, isof Yahudisya sikram masasor faro er ḇesesya. 12Snar er Yahudi sḇesasar ma siso Allah marisen ḇyenaḇa, inja Allah ḇyeḇok er-er ḇesesya. Isyadi wer rofyor ḇaḇeoser kuker Yahudi iḇye kaḇer wer kuker Allah; nari Allah ḇaḇeḇok ḇyuk faro er-er ansi iba syadi wer!
Er ḇese ḇeyakḇe Yahudiḇasya saksma koreri
11:13-24
13Ḇape knikine iḇye yakofen faro naek srar ḇeyakḇe Yahudiḇasya! Fyoro kwar ine, yafararurḇe manwawan faro er-er ḇeyakḇe Yahudiḇasya, snar yaḇe manmin fafaya fararur ayediḇa. 14Yakyar kaku nari yafrur masasor mankundaya er ayedi, insa kuker nyan ine ono rofandusi saksma koreri. 15Snar Allah pyampumsi ro ḇandi, isof ro ḇaḇeoser rofandu supswan ine kuker Allah iḇye kaḇer wer; isyadi wer rofyor Allah nyasi! Mnuk ine imnis raris snonkaku ḇemar ma ḇekenem wer!
16Rofyor mamami mnuk ḇeponya ḇyeḇeḇuk faro Allah kwar, rarirya mamami ḇesiperya ḇyeḇeḇuk kam faro Allah kako. Ma rofyor ai raresna Allah nyana, snaw-snaw ḇyena Allah nyana kako. 17Snaw ono ro zaitun knam – isoine kawasa Yahudi –sḇeḇekaruk kwar. Ma ro naur snaw skaruk anna, sḇeknof zaitun snaw ḇesurku, isoine naek srar ḇeyakḇe Yahudiḇasya. Naek srar mkoḇe ḇeknof ro dia insa mkakan roi ḇeḇor ḇeḇye ro kankenem Rur kawasa Yahudisya. 18Inja naek srar mkomamkyof awer kawasa skaruk kwar imnis ai snau ansya. Naek srar mkoswarepen, snar ai snawsi mko monda. Ma snawya iḇeḇuk nanan faro raresnaḇa, mboi rares naiso ḇeḇuk nanan faro snawnanya.
19Ḇape naek nari wakofen, “Mboi, ḇape snaw-snaw anna neḇekaruk insa yaḇe ḇeknof ro knamya!” 20Kaku ḇeri. Ḇape sisawensi snar sikyarḇa, mboi naek srar mkokada snamko snar kakyar mkoḇena. Inja naek srar mkomarares awer mko snar mnuk ine; iḇyekada naek srar mkomkak. 21Snar rofyor Allah iswar kawasa Yahudisyaḇa ma isawensi imnis snaw ḇekaku ani, naek srar mko kyar awer nari iswar mko ma isawen mkoba. 22Inja rodine komam Allah ḇaḇye ḇyedi ma Allah ḇaḇepakakrek ḇyedi. Fyasna pakakrek ḇyedi faro kawasa ḇesasar, ḇape iḇye faro naek srar mko – rofyor naek srar mkokenem faswef ro ḇaḇye ḇyedi. Mboi roḇaido, naek srar mko kako nari sisawen mko. 23Ma faro kawasa Yahudi ansi, rofyor simnai ro kakyarḇa sena, nari seḇena kaḇer wer; snar Allah ipok fa nyakaḇersi wer. 24Naek srar ḇeyakḇe knam ro er Yahudiḇa mkomnis zaitun snaw ḇesurku. Inja, rofyor naek srar, mkosampum rari mkoḇena, nari mkoḇe ḇeknof ro zaitun knam ḇekakuya, rosai wer kuker kawasa Yahudi sḇukmnis kuker snaw ro zaitun knam ḇekakuya. Ikada ipyan syadi fa Allah dun kaḇersi faro zaitun knam sedi wer.
Allah saswar ḇyedi faro kawasa ḇeḇor kam
11:25-32
25Naek srar! Yakyar naek srar mkokara awer ḇo mkoḇo mkofawi roi ḇeborkam kwar. Snar Allah imarisen roi oso, ḇape snonkakusya sifawi i ḇaim. Ma yamarisen insa naek srar mkofawi i; isoine: Ono ro kawasa Yahudi siḇrusna npakrek, ḇape fararur ḇeradine nari nambran rao isof dandonek kawasa ḇeyakḇe Yahudiḇa ḇerama faro Allah simnis resari. 26#Yes. 59:20 Raimnai kawasa Yahudisya nari sisma koreri. Snar ro Refo sfas radine,
“Wairek Manfaspar beyun koreriya nari ryama ro Sion;
i nari ḇepyos ḇarḇor ḇeborkam ro Yakub kpu ḇyesi.
27 #
Yer. 31:33-34
Nari yafesepen si kuker asas ine
rofyor yaḇe yapyos sasar sena.”
28Snar kawasa Yahudi simewer sakna Ankankinem Ḇeḇye ro Allah, rarirya sembroḇ Allah; ma kuker nyan ḇeradine, ḇyuk fainda faro naek srar ḇeyakḇe Yahudiḇasya. Ḇape snar Allah kyinfirsi kwar, inja Allah iswar faswefsi snar up sesi. 29Snar rofyor Allah kyinfir snonkaku ma ḇyeḇoksi, Allah iyer kaḇer rosai ifrur kwar naḇa. 30Fyor iwara naek srar mkoḇesyowi Allahḇa. Ḇape baboine Allah fyasna mboi naek srar mkosma ḇaḇemkei ro sasar, snar kawasa Yahudi sesyowiḇa. 31Rarirya kako faro kawasa Yahudi ansi. Fafisu ine sesyowi Allahḇa, insa naek srar sfasnaḇadir mkoḇe mkei ro sasar na. Ḇape nari si kako sfasnaḇadir si ḇesma ḇaḇemkei ro sasar na. 32Snar Allah myam monda ḇo papoik ḇaḇeuserḇaya nya kawasa ḇeborkam, insa fyasna saswar ḇyedi farosi kam.
33 #
Yes. 55:8
Kaku ḇeri Allah arasa ḇyena naba! Kaku ḇeri fawawinananem ḇyena naba! Manseiso nari ḇekukeḇ rosai dawos namuk na? Manseiso nari befawi nyan byuk fararurya?
34 #
Yes. 40:13
Ro Refo sfas radine,
“Manseiso ḇefawi Manseren swaruser ḇyena?
Manseiso nari ḇeḇuk ananun faroi?
35Manseiso bebuk kwar roi oso faro Manseren
isof iḇe dor munsu ro na?”
36 #
1 Kor. 8:6
Allah ḇefrur roi ḇeḇor nakam. Nakam neknam ro Allah ma Allah i ḇenananya. Sanandik faro Allah isof fyoro-fyoro! Amin.
Zur Zeit ausgewählt:
ROMA 11: LAIBHW
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
