मरकुस 13

मन्दरा रे बिनाशा री भविष्यवाणी

(मत्ती 24:1-2; लूका 21:5-6)

1ताहली जे यीशु कने तिसरे चेले तिस मन्दरा चते निकल़या राँ थे, तां तिसरे चेलयां चते इक्की तिसने गलाया, “गुरू जी, देख! केड्डे बड्डे पत्थर कने कितणे सुन्दर मकान ये!” 2यीशुये तिसने गलाया, “तुहें इसा इमारता जो सिधा येत्थी खढ़िरा देखी रायें! ये सब किछ नाश हुई जाणा।”

संकट कने कल़ेश

(मत्ती 24:3-14; लूका 21:7-19)

3तंजे यीशु मन्दरा रे सामणे जैतून्ना पहाड़ा पर बैठिरा था, तां पतरस, याकूब, यूहन्ना कने अन्द्रियासे लग जाईने तिसते पुच्छया, 4“अहौं दस्स भई ये गल्लां काहलूं हुणियां? कने तंजे ये सारियां गल्लां पूरियां हुणे औणियां हुंगियां तिस वगता रा क्या नशाण हूणा?” 5यीशु तिन्हाने बोलणे लगया : “ध्यान रौ भई कोई तुहांजो धोखा नीं देओ। 6कईयां लोकां औणा कने बोलणा भई मैं तिन्हांजो भेज्जिरा, ‘हऊँ मसीह आ,’ कने तिन्हां कई लोकां जो भरमाणा। 7कने तंजे तुहें लड़ाईयां, कने लड़ाईयां री चर्चा सुणो, तां घबरान्दे देखां; काँह्भई इन्हांरा हूणा जरूरी आ, पर तिस वगत संसारा रा अन्त नीं हूणा। 8काँह्भई इक्की जातिया दुज्जिया जातिया पर, कने राज पर राज चढ़ाई करनी। बौहत सारी जगहां च हिलण हुणे, कने नकाल़ पौणे। लोकां री पीड़ त जनाना रे बच्चा पैदा करने री पैहली पीड़ा रिया शुरुआता साई हूणी।”

9“पर तुहें अपणे बारे च त्यार हुई जावा; काँह्भई लोकां तुहांजो महासभा रे हवाले करना कने तुहांजो यहूदी सभा घराँ च मारया-कुट्टया जाणा, कने मेरिया वजह ते तुहें राजपालां कने राजयां रे सामणे खड़े कित्ते जाणे, ताकि तुहें मेरे खातर गवाही देओ। 10पर ये जरूरी आ भई संसारा रा अंत होणे ते पैहले मेरे बारे च खुशखबरी सब्बीं देशां च प्रचार कित्ती जाओ। 11ताहली जे तुहांजो गिरफ्तार करील्या जाओ कने अदालता च लेई जाया जाओ, तां पैहले ते चिन्ता देखां करदे, भई अहां क्या बोलणा। पर सै जे किछ तुहांजो तिस वगत दस्या जाणा, सैई बोलणा; काँह्भई बोलणे औल़े तुहें नींये, पर पवित्र आत्मा।”

12“तिस वगत लोकां अपणे विश्वासी भाई-भैणां जो मारने रे खातर पकड़वाणा, तियां इ माता पिता अपणे बच्चयां ने करना कने बच्चयां अपणे माता-पिता रे खिलाफ हुईने तिन्हांजो मरवाणे खातर बैरियां रे हत्था च सौंपणा। 13कने माह पर विश्वास करने रिया वजह ते बौहत सारयां लोकां तुहांजो नफरत करनी; पर सै जे सताव रे आखिरी दिनां तक मेरे विश्वासा च बणीरा रैहन्गा, सै बचाया जाणा।”

महांसंकट-काल

(मत्ती 24:15-28; लूका 21:20-24)

14“पढ़ने औल़ा समझी लो : इक दिन ताहली जे तुहें तिस ज्वाड़ने औल़ी गन्दी चीज़ा जो मन्दरा च खढ़ी रिया जो देखगे, तित्थी जे तिसा चीज़ा रा रैहणा ठीक नींआ, कने तिसरिया वजह ते जे मन्दर उजाड़ बणी जां। तां सै जे यहूदिया प्रदेशा च ओ सै पहाड़ा पर नट्ठी जायों।#13:14 दानि. 9:27, दानि. 12:11 15सै जे छत्ता पर हो, सै अपणे घरा ते किछ बी लेणे जो नीं उतरो कने नां अन्दरा जो जाओ; सै येढ़ा करीने अपणा वगत नीं गवाये। 16कने सै जे खेता च हो, सै अपणा कपड़ा लेणे खातर पिछे जो नीं हटो। 17तिन्हां दिनां च सै जे भारहत्थी कने दुध प्याणे औल़ी हुंगी, तिन्हांरे खातर कितना दर्दनाक हूणा। 18कने प्राथना करया करा भई ये ठण्ठा च नीं हो! 19काँह्भई सै दिन येढ़े कष्टा रे हुणे भई सृष्टिया रिया शुरुआता ते, सै जे परमेशरे रचीरी, हूणा तकौ नांत हुये कने नां फेरी कदीं हुणे। 20जे प्रभु तिन्हां दुखां रे दिनां जो घटाणे रा फैसला नीं करदा हुन्दा, तां हरेक माहणु मरी जान्दा; पर तिने तिन्हां चुणिरयां रिया वजह ते, तिन्हां दिनां जो घटाणे रा फैसला कित्या। 21तिस वगत जे कोई तुहांजो बोल्लो, ‘देक्खा, मसीह येत्थी आ!’ या ‘देक्खा, ऊत्थी आ!’ तां तिन्हांरा विश्वास नीं करयां; 22काँह्भई झूट्ठे मसीह झूट्ठे भविष्यवक्ता औणे, कने नशाण कने हैरानिया रे काम्म दस्से जाणे भई जे हुई सक्को, तां परमेशरा रे चुणी रयां जो बी भरमाई दो। 23पर तुहें खबरदार हुईने रौआ, देक्खा, मैं तुहांजो सब गल्लां पैहले तेई दस्सी तियां।

माहणुये रे पुत्रा रा दुबारा औणा

(मत्ती 24:29-31; लूका 21:25-28)

24“तिन्हां दिना च तिस दुखा ते बाद सूरज अन्धेरा हुई जाणा, कने चन्द्रमे लोय नीं देणी; 25कने अम्बरा ते तारे पौणे लगणे; कने अम्बरा री शक्तिशाली चीजां#13:25 शक्तिशाली चीजां यनिके शैतान कने बुरी आत्मायें (इफि. 2:2, प्रका. 6:13, यशा. 34:4) जो तिन्हां रिया जगह ते हिलाया जाणा।”

26“तां तिस वगत लोकां माहणुये रे पुत्रा यनि मिन्जो बड्डिया सामर्था कने महिमा सौगी बदल़ां च औन्दे देखणा। 27कने तिस अपणे स्वर्गदूतां जो भेज्जीने धरतिया रियां सारियां जगहां ते यनि अम्बरा रे इस कोणे ते तिस कुणे तक चऊँ पासयां ते, अपणे चुणी रेयां लोकां जो कट्ठा करना।

अंजीरा रे डाल़ा रा उदाहरण

(मत्ती 24:32-35; लूका 21:29-33)

28“अंजीरा रे डाल़ा ते ये उदाहरण सिक्खा : तंजे तिसरियां डाल़ियां नरम हुई जाईयां, कने पत्ते निकल़णे लगां ये; तां तुहें पता लाई लैं भई गर्मिया रा बगत नेड़े आ। 29इयां इ तंजे तुहें इन्हां गल्लां जो हुन्दे हुये देक्खो, तां जाणी लौआ भई मेरे वापिस औणे रा वगत नेड़े आ, तियां जे हऊँ पैहले तेई स्वर्गा रे दरवाजे पर त्यार खढ़िरा। 30हऊँ तुहांजो सच बोलां भई तदुआं तका जे ये सब गल्लां नीं हुई जाणियां, तदुआं तक इसा पीढ़िया रे लोकां नीं मरना। 31अम्बरा कने धरती खत्म हुई जाणे, पर मैं सै जे बोलित्या, सै पूरा हुईने इ रैहणा।

त्यार रौआ

(मत्ती 24:36-44)

32“मेरे औणे रे तिस असली वगता जो कोई नीं जाणदा। नां स्वर्गा रे दूत कने नां हऊँ परमेशरा रा पुत्र जाणाँ; पर सिर्फ मेरा पिता जाणाँ। 33इस खातर त्यार रौआ! हमेशा सम्भल़ी ने रौआ! काँह्भई तुहें नीं जाणदे भई सै वगत काहलूं औणा। 34ये तिस माहणुये साई आ, सै जे अपणे घरा ते दूर किति यात्रा पर जाया रा था, जाणे ते पैहले सै अपणे दास्सां ने बोलां भई घरा रा सारा प्रवन्ध तुहांजो करना चाहिन्दा। सै हर इक्की जो दस्सां भई तिस्सो क्या करना चाहिन्दा। फेरी सै द्वारपाला जो अपणिया वापसिया रे खातर त्यार रैहणे जो बोलां।”

35यीशुये अपणे चेलयां ने बोल्या, “इस खातर त्यार रौआ; काँह्भई तुहें नीं जाणदे भई घरा रे मालका यनि मांह किस वगत आई जाणा, संझा जो, अधिया राति जो, कुकड़ा रे झांग देणे रे वगत या भ्यागा। 36येढ़ा नीं हो भई ताहली जे मांह अचानक औणा, तां हऊँ तुहांजो त्यार नीं पाऊँ। 37कने सै जे हऊँ तुहांजो बोलां, सैई सब्बीं ने बोलां : ‘सदा त्यार रौआ!’”

Zur Zeit ausgewählt:

मरकुस 13: KFSNT

Markierung

Vergleichen

Kopieren