मत्ती 13
13
किसान कने ब्यूआ रा उदाहरण
(मरकुस 4:1-9; लूका 8:4-8)
1ये घटना तिस दिना री ताहली जे यीशु घरा ते बाहर दरयावा रे कनारे जाईने उपदेश देणे बैट्ठया। 2कने लोकां री इतणी बड्डी भीड़ तिसले कट्ठी हुईगी, भई सै जाईने इक्की किश्तिया पर चढ़ीग्या, कने सारी भीड़ कनारे पर खढ़ी रैई। 3कने तिने तिन्हांजो उदाहरणां च कई सारी गल्लां गलाईयां, “इक करसाण ब्यू बाहणे निकल़या। 4बाहन्दे बगत किछ ब्यू बाटा रे कण्डे पै कने पंछियें आईने सै चुगी ले। 5किछ ब्यू पत्थरीली धरतिया पर पै, तित्थी तिन्हांजो बौहत मिट्टी नीं मिली कने तिसरिया वजह ते सै इकदम उगीने बाहर निकल़िये। 6पर ताहली जे सूरज निकल़या सै डाल़ू धुप्पे ने झुलसिगे, कने जड़ नीं पकड़ने ते सुकीगे। 7किछ ब्यू झाड़ियां च पै कने झाड़ियें बड्डी हुईने सै डाल़ू दब्बी ले। 8पर किछ ब्यू खरिया धरतिया पर पै, कने खरी फसल ल्याये, फसल जितणी जे बाहीरी थी, तिसते कोई सौ गुणा, साठ गुणा, कने तीह गुणा हुई। 9जो बी मेरी गल्ल सुणां, सै ध्यान देईने सुणो कने समझो।”
उदाहरण-कथां रा मकसद
(मरकुस 4:10-12; लूका 8:9,10)
10यीशुये रे चेलयां तिसले आईने तिसते पुच्छया, “तू लोकां ने उदाहरणां च कजो गल्लां कराँ?” 11तिने जबाब दित्या, तुहांजो परमेशरा रे राज्जा री छुपी रियां गल्लां जो समझणे री अक्कल दित्तिरी, पर तिन्हांजो नीं। 12काँह्भई सै जे मेरिया गल्ला जो ध्याना ने सुणा कने समझां, परमेशर तिसजो होर जादा समझणे रे लायक बणां; पर सै जे मेरिया गल्ला जो ध्याना ने नीं सुणदा कने समझदा तिस सै बी भुल्ली जाणा तिसजो जे सै पैहले ते जाणदा हो। 13हऊँ तिन्हांने उदाहरणां रा इस्तेमाल करदे हुये इस खातर गल्ल कराँ काँह्भई सै मेरियां गल्लां जो देक्खां ये भई हऊँ क्या कराँ, पर सै हकीकत च नीं देखदे, सै सुणां ये भई हऊँ क्या बोलां, पर सै हकीकता च सुणदे नींये कने सै तिन्हां रिया समझा च औन्दा नींआ। 14इस तरिके ने तिन्हां पर यशायाह री ये भविष्यवाणी खरी उतरी :
“ ‘तुहां सुणना कने सुणदयां इ रैहणा,
पर तुहांरिया समझा च किछ बी नीं औणा;
तुहां बस देखदयां इ रैहणा, पर तुहांजो किछ बी नीं सुझणा।
15काँह्भई ये लोक मेरियां गल्लां सुणने रे लायक नींये,
मेरियां गल्लां तिन्हांरे मनां च नीं उतरदियां;
ताकि सै अपणियां आक्खीं ते किछ बी नीं देक्खो,
कने सै कन्नां ते किछ नीं सुणी पाओ या
भई अपणे मना ते कदीं नीं समझो,
कने कदीं मेरेखौ मुड़ीने आओ, कने तिसते जे हऊँ तिन्हांरा छुटकारा करूँ।’ ”
16पर परमेशरे तुहांजो आशीष दित्ति काँह्भई जो किछ मैं कित्या तिसजो तुहें देख्या, कने सै जे मैं गलाया तिसजो तुहें समझया। 17हऊँ तुहांजो सच्च बोलां भई कई सारे भविष्यवक्ता कने धर्मात्मा तिन्हां गल्लां जो जे देखणा चाँह थे, तिन्हांजो तुहें देखी रायें; सै तिन्हांजो नीं देक्खी सक्के; कने तिन्हां गल्लां जो जे सै सुणना चाँह थे, तिन्हांजो तुहें सुणीराँ ये, सै इन्हांजो नीं सुणी सक्के।
ब्यू बाहणे री उदाहरण-कथा रा मतलब
(मरकुस 4:13-20; लूका 8:11-15)
18“हुण तुहें बाहणे औल़े रा उदाहरण सुणा: 19लोक सै जे परमेशरा रे बारे च सुणां यें भई सै कियां लोकां रियां जिन्दगियां पर राज कराँ कने नीं समझदे भई जो किछ तिन्हें सुणया सै तिसा बाटा साई आ तित्थी जे सै किछ दाणे पैईरे, शैतान औआं कने जो किछ तिन्हें सुणीरा हुआं तिसजो भुलाई देआं। 20किछ लोक येढ़े तिन्हांरी बराबरी तिन्हां ब्यूआं ते कित्ती जाई सक्कां इ सै जे पत्थरीली जमीन्ना पर पैया। ये सैए सै जे परमेशरा रा बचन खुशिया ने सुणां ये कने इकदम ग्रहण बी कराँ ये। 21पर वचन तिन्हांरे दिलां री गहराईया तक नीं जान्दा, सै सिर्फ किछ वगता खातर विश्वास कराँ ये। सै तिन्हां बुटयां साई हुआं ये तिन्हांरियां जड़ां जे डुग्गियां नीं हुन्दियां; ताहली जे कोई दुज्जा तिन्हां सौगी बुरा बर्ताव करो या परमेशरा रे बचना पर विश्चास करने रिया वजह ने तिन्हांजो परेशान करो, तां सै लोक परेशान हुईने इकदम बचना पर विश्वास करना छड्डी दें। 22किछ लोक येढ़े तिन्हांरी बराबरी अहें झाड़ियां औल़िया धरतिया ने करी सक्कां ए, ये सै लोक ये तिन्हें जे परमेशरा रा सन्देश सुणया, सै बौहत सारी चिज़ां रा लालच करीने अमीर हुणे री इच्छा कराँ ये, इस खातर सै सिर्फ इन्हां चिज़ां री चिन्ता कराँ ये; इयां सै परमेशरा रे सन्देशा च अड़चन पाएं कने सै तिसरिया इच्छा पर नीं चली पान्दे। 23पर किछ लोक उपजाऊ धरतिया साई हुआं ये तिसच जे किछ ब्यू पैईरे, सै दाणे उगे कने पौध्यां साई बधे कने बौहत सारी फसल पज्जी, ये सै माहणु ये सै जे मेरा बचन सुणां ये कने इसजो समझां ये, कने परमेशरा जो खुश करने औल़े काम्म बौहत जादा कराँ ये।”
जंगली ब्यूआ रा उदाहरण
24यीशुये भीड़ा जो इक होर उदाहरण दित्या। तिने बोल्या, “ताहली जे परमेशरे अप्पूँजो राजे रे रुपा च दसणा शुरु कित्या, सै खेता रे इक्की मालका साई आ तिने जे अपणे दास्सां जो अपणे खेता च खरे ब्यू बाहणे जो भेज्या। 25पर ताहली दास सुत्तीरे थे, तिस खेता रे मालका रा दुश्मण आया कने कणका च जंगली ब्यू बखेरी ने चलिग्या। 26ताहली जे कणका जो कुम्मल़ निकल़े कने तिन्हां पर सिल्लु लगे, तां जंगली दाणे रे डाल़ू बी दिखणे लगे। 27फेरी खेता रे मालका ले आईने तिसरे दास्सें बोल्या, ‘स्वामी जी, तुहें त अपणे खेतां च खरा ब्यू बाहीरा था? फेरी इसच जंगली दाणयां रे डाल़ू कित्ते आये?’ 28फेरी मालके तिन्हांने गलाया, ‘ये किसी दुश्मणा रा काम्म आ।’ तिसरयां दास्सें तिसते पुच्छया, ‘क्या तू चाँह भई अहें जाईने तिन्हांजो पटी दईये?’ 29तिने गलाया, ‘नां, येढ़ा नीं ओ भई तुहें जंगली दाणयां रे डाल़ूआं जो कठेरदे बगत तिन्हां सौगी कणका रे डाल़ूआं जो पट्टीने ली आओ। 30फसला रिया कटाईया तक इन्हां दुईं जो सौगी-सौगी बधणे देआ, कने कटाईया रे बगत हऊँ कटणे औल़यां ने गलांगा भई पैहले जंगली दाणयां रे डाल़ूआं रे पुल्ले बन्हीने तिन्हांजो फुकी दवा, कने कणका जो कठेरीने मेरे पेड़ुये च पाई दवा।’ ”
राईये रे दाणे रा उदाहरण
(मरकुस 4:30-32; लूका 13:18,19)
31यीशुये तिन्हांजो इक होर उदाहरण दित्या : “स्वर्गा रा राज राईया रे छोट्टे जे दाणे रे बराबर आ, तिसजो किसी माहणुये लेईने अपणे खेतां च बाहीत्या। 32सै सारयां ब्यूआं च सब्बींते छोट्टा त हुआं पर ताहली जे बधां तां सारे साग पत्तयां ते बड्डा हुई जां; कने सै येढ़ा डाल़ बणी जां भई अम्बरा रे पंछी आईने तिसरियां डाल़ियां पर शरण लैं।”
मलेड़े रा उदाहरण
(लूका 13:20,21)
33तिने इक होर उदाहरण तिन्हांजो सणवाया : “स्वर्गा रा राज फैल्लीरे मलेड़े साई आ तिसजो किसी जनाने बौहत सारे आट्टे च मलाया कने तदुआं तक सै रखी रखया तदुआं तक जे सै सारे रा सारा आट्टा मलेड़ा नीं बणीग्या।”
उदाहरणां रा इस्तेमाल
(मरकुस 4:33,34)
34ये सारियां गल्लां यीशुये लोकां जो उदाहरण देईने बोल्ली, कने सै तिन्हांने हमेशा उदाहरणा ची गलां था, 35येढ़ा इस खातर था भई सै बचन जे भविष्यवक्ते रे जरिये गलाईरा था, सै पूरा ओ : “मांह उदाहरण देईने बोलणा हऊँ तिन्हां गल्लां जो सै जे संसारा रिया सृष्टिया ते छुपी रियां तिन्हांजो प्रगट करगा।”
जंगली ब्यूआ रे उदाहरणा री व्याख्या
36फेरी यीशु लोकां रिया तिसा भीड़ा जो विदा करीने घरें आया कने तिसरयां चेलयां तिसले आईने बोल्या, “खेता रे जंगली दाणे रा उदाहरण अहांजो समझा।” 37यीशुये तिन्हांजो जबाब दित्या, तिने करसाणे जे खरा ब्यू बाहया सै माहणुये रा पुत्र यनि हऊँ आ। 38कने खेत संसारा रे लोक ये, खरे ब्यू परमेशरा रे राज्जा रे लोक ये, कने जंगली ब्यू शैतान्ना रे लोक ये। 39सै दुश्मण तिने जे जंगली ब्यू बाहे थे, शैतान आ; कने कटाईया रा बगत आ इस संसारा रा अंत कने कटाई करने औल़े स्वर्गदूत ये। 40ठीक तियां इ तियां जे जंगली ब्यूआं जो कट्ठा करीने अग्गी च फुकी दित्या जां, तियां इ सृष्टिया रे अन्त बिच हूणा। 41माहणुये रे पुत्रा यनि मांह अपणे स्वर्गदूत भेजणे, कने तिन्हां तिसरे राज्जा ते सारे पापियां जो कने तिन्हांजो सै जे लोकां जो कुकर्म करने जो मजबूर कराँ ये, 42कट्ठे करीने नरका रिया अग्गी च पाई दित्ते जाणे, तित्थी सिर्फ दान्द किरड़ना कने रोण-पिट्टण इ हूणा। 43तिस वगत धर्मियां अपणे पिता रे राज्जा च सूरजा साई चमकणा। जो बी मेरी गल्ल सुणां, सै ध्यान देईने सुणो कने समझो।
छुपीरे खजाने रा उदाहरण
44परमेशर तिन्हां लोकां पर राज कराँ सै जे खेता च छिपीरे धन-दौलता साई आ, सै किसी माहणुये जो मिलया कने फेरी तिने सै तित्थी गड्डीत्या, कने खुशिया रे मारे अपणा सारा किछ बेच्चीने तिस खेता जो खरीदिल्या।
अनमोल मोतिये रा उदाहरण
45परमेशर तिन्हां लोकां पर राज कराँ सै जे इक येढ़े व्यापारिये साई ये सै जे खरे मोतियां री खोज्जा च हो। 46ताहली जे तिस्सो इक अनमोल मोती मिलया, तां जाईने सै जे किछ तिसले था, तिस्सो बेचीत्या कने मोती खरीदिल्या।
मच्छी पकड़ने रा जाल़
47स्वर्गा रा राज मच्छी पकड़ने खातर नदिया च पाईरे इक्की जाल़ा साई आ, तिसच कई किस्मा री मच्छियां पकड़ोईयां। 48ताहली जे सै जाल़ पूरा भरीग्या, तां तिस्सो किनारे जो खिंजील्या, कने बैठीने खरी-खरी मच्छियां छान्टीने टोकरियां च भरी लियां कने बेकार मच्छियां सट्टीतियां। 49सृष्टिया रे अन्त च येढ़ा इ हूणा। स्वर्गदूतां आईने पापियां जो धर्मियां चते छान्टीने लग करना, 50कने पापियां जो नरका रिया अग्गी च पाई देणा; तित्थी तिन्हां रोणा कने दान्द किरड़ने।
पुराणी कने नौंईं शिक्षा रा महत्व
51यीशुये अपणयां चेलयां ते पुच्छया, “क्या तुहें इन्हां सारियां गल्लां जो समझे?” तिन्हे जबाब दित्या, “हाँ।” 52यीशुये तिन्हांने गलाया, “देक्खा, इस खातर हरेक यहूदी शास्त्री सै जे परमेशरा रे राज्जा रा चेला बणीरा, इक येढ़े घरा रे मुखिये साई आ, सै जे अपणे भण्डारा ते नौंईयां कने पुराणियां चिज़ां जो बाहर कड्डां।”
नासरत च यीशुये रा बेज्जति
(मरकुस 6:1-6; लूका 4:16-30)
53ताहली जे यीशु ये सारे उदाहरण देई चुक्कया, तां ऊत्थीते चलिग्या। 54कने अपणे देशा च आईग्या, फेरी तिने यहूदियां रे यहूदी सभा घरा च उपदेश देणा शुरु करित्या; इसते हर कोई हैरान हुईने बोलणे लगया, “इस्सो येढ़ि सूझ-बूझ कने चमत्कारी शक्ति किति ते मिली? 55क्या ये तिस लकड़िया रे मिस्त्रीये राई मुण्डु निआं? कने क्या इसरिया मौआ रा नौं मरियम कने इसरे भाईयां रे नौं याकूब, यूसुफ, शमौन कने यहूदा नींये? 56कने क्या इस रियां सारी बैहणीं अहांरे बिच नीं रैहन्दियां? फेरी इस्सो ये सारा किछ किति ते मिलया?” 57इस तरिके ने तिन्हे तिसजो स्वीकार नीं कित्या; पर यीशुये तिन्हाने गलाया, “भविष्यवक्ते रा अपणे गाँवां कने परिवारा जो छड्डिने सारे आदर कराँ ये।” 58इस खातर तिने तित्थी तिन्हांरे अविश्वासा रिया वजह ने जादा चमत्कारा रे काम्म नीं कित्ते।
Zur Zeit ausgewählt:
मत्ती 13: KFSNT
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
