मत्ती 10
10
खुशखबरिया रा प्रचार करने खातर चेलयां रा भेजणा
(मरकुस 3:13-19; लूका 6:12-16)
1इस खातर यीशुये अपणे बारा चेलयां जो अप्पूँ ले सद्दीने, तिन्हांजो बुरीआत्मा जो बाहर कडणे कने कई किस्मा रे रोगां कने दुख तकलीफां जो दूर करने रा अधिकार दित्या। 2इन्हां बारा प्रेरितां रे नौं थे : पैहला शमौन, सै जे पतरसा रे नौआं ते जाणया गया, कने तिसरा भाई अन्द्रियास, जब्दिये रा पुत्र याकूब कने तिसरा भाई यूहन्ना। 3फिलिप्पुस, बरतुल्मै, थोमा, टैक्स लेणे औल़ा मत्ती, हलफई रा पुत्र याकूब कने तद्दै। 4शमौन कनानी, कने यहूदा इस्करियोति तिने जे यीशुये जो धोखे ने पकड़वाया था।
बारा प्रेरितां रे सेवा रे काम्म
(मरकुस 6:7-13; लूका 9:1-6; 10:4-12)
5यीशुये इन्हां बाराँ चेलयां जो कई लाकयां च अपणा सन्देश सुनाणे खातर भेजणे ते पैहले ये हुक्म दित्या : भई अन्यजातियां रे लाके च नीं जायों, कने सामरियां रे किसी नगरा च दाखल नीं हुयां। 6पर इस्राएलियां लेई जायों काँह्भई सै तिन्हां भेड्डां साई ये सै जे अपणे चरवाहे ते दूर हुईगरे। 7कने तिन्हांजो ये उपदेश देयों भई परमेशर अहां सब्बीं लोकां पर राज करने जो बड़े जल्दी आई कराँ। 8सै बमार लोकां जो ठीक करो, मूईरयां जो जिन्दगी देओ, कोढ़ियां जो चंगा करो, कने बुरीआत्मां जो कड्डो। किसी ते सेवा रे बदले च पैसा नीं लेणा काँह्भई परमेशरे तुहांरी सहायता रे बदले च किछ नीं लेईरा। 9अपणिया जेबा च न त सोना, न त चान्दी, न ताँबा रखयों; 10रस्ते खातर न कोई झोल़ा रक्खयों, कोई फालतू कमीज, चप्पल़ कने सोट्ठी मत रखा, काँह्भई मजदूरा जो तिसरी रोटी मिलणी चाहिन्दी। 11तुहें ताहली जे कदीं किसी नगरा या गाँवां च जाओ, तां ये पता करा भई तित्थी रुकणे जो विश्वास लैक कुण आ? कने तदुआं तक जे तित्थी ते आई नीं जाओ, तदुआं तक तिस इ घरा च रुकीरे रौआ। 12कने घरा च प्रवेश करदे हुये तिन्हांजो आशीष देआं। 13जे तिस घरा रे लोक लायक हुंगे तां तुहांरा आशीर्वाद तिन्हां रिया सौगी-सौगी हूणा, पर जे सै इसरे लायक नीं हुंगे तां तुहांरा आशीर्वाद तुहांले बापस आई जाणा। 14कने जे कोई तुहांरा स्वागत नीं करो या तुहांरी गल्ल नीं सुणो, तां तिस घरा या गाँवां ते निकल़दे हुये अपणे पैराँ रिया धूड़ी जो तित्थी झाड़ी देआं। 15हऊँ तुहांजो सच्च बोलां, भई ताहली जे न्याय हूणा, तिस दिन तिस गाँवां री दशा ते सदोम कने अमोरा रे नगराँ री हालत जादा सैहणे लायक हूणी।
अपणयां चेलयां जो यीशुये री चेतावनी
(मरकुस 13:9-13; लूका 21:12-17)
16खबरदार! हऊँ तुहांजो असहाय भेड्डां साई लोकां रे बिच भेज्जां सै जे भेड़िये साई खतरनाक ये। इस खातर सर्पां साई चलाक कने समझदारिया ने काम्म करा, कने कबूतरां साई भोल़े-भाल़े कने खरयां गुणां जो परगट करा। 17पर धार्मिक अगुवेयां ते चौकस हुईने रौआ, काँह्भई तिन्हां तुहांजो धोखे च बन्दी बणाईने यहूदी पंचैतां रे हवाले करना, कने तिन्हांरे सभा घरा च तुहां पर कोड़े बरसाणे। 18तुहें मांह पर विश्वास करने रिया वजह ने राजपालां कने राजयां रे सामणे पेश कित्ते जाणे, काँह्भई तुहें मेरे चेले; तुहांजो मौका दित्या जाणा भई तुहें तिन्हांजो कने अन्यजातियां जो मेरे बारे च गवाही देओ। 19ताहली जे तिन्हां तुहांजो पकड़वाणा तां इसा गल्ला री चिन्ता नीं करयों भई तुहां कियां बोलणा कने क्या बोलणा; काँह्भई जो किछ तुहांजो बोलणा हुँगा सै तिस वगत तुहांजो दस्सी दित्या जाणा। 20याद रखा बोलणे औल़े तुहें नींये, पर पवित्र आत्मे तुहांजो गलाणे खातर बोलणा।
21तुहांजो अविश्वासी लोकां पकड़ीने हाकिमां ले मारने जो सौंपणा, काँह्भई तुहें माह पर विश्वास कराँ ये, उदाहरणा रे तौरा पर भाईये अपणे भाई पकड़वाई ने हाकिमां ते मौती री सजा दवाणी, मौ-बुढ़यां अपणयां बच्चयां जो पकड़वाणा कने बच्चयां तिन्हांरे खलाफ हुई जाणा; तिन्हां सै मरवाई देणे। 22माह पर विश्वास करने रिया बजह ने कईयां लोकां तुहांते बैर रखणा, पर सै जे आखिर तक माह पर विश्वास करदा रैहन्गा तिसजो बचाया जाणा। 23ताहली जे सै तुहांजो इक्की नगरा च सताणे लगो, तां दुज्जे नगरा जो चली जायों। हऊँ तुहांजो सच्च बोलां भई तुहें माहणुये रे पुत्रा रे औणे ते पैहले इस्राएल रे सारे नगराँ चियें गये बी नीं हुणे।
24चेला अपणे गुरुये ते बड़ा खास नीं हुन्दा कने नांई कोई दास अपणे मालका ते बड़ा खास हुआं। 25चेले जो गुरुये रे, कने दास्सा जो अपणे स्वामिये रे बराबर हुणे ची सन्तोख करना चाहिन्दा; तां जे सै मिन्जो यनि घरा रे मालका जोई शैतान बोलां ये, तां तुहें तिन्हांते केढ़े व्यवहारा री आशा रक्खां ये?
परमेशरा ते डरा, लोकां ते नीं?
(लूका 12:2-7)
26“इस खातर तिन्हां लोकां ते मत डरा, सै जे तुहांजो धमकी दें। सै वगत आया रां ताहली जे सब किछ सामणे आई जाणा; सै नीं चाहन्दा भई तिसरी सच्चाई छुपीरी रौ, सै जे किछ छुपीरा सब सामणे ल्यान्दया जाणा। 27सै गल्लां जे हऊँ तुहांजो गुप्त मंझ बोलां, तिन्हौं सब्बीं जो सुणावा; कने सै जे हऊँ तुहांरयां कन्नां च हौल़यां-हौल़यां बोलां तिन्हांजो ऊच्चिया अवाज़ा च सुणावा। 28तिन्हां लोकां ते मता डरदे सै जे तुहांरे शरीरा जो खत्म करी सक्कां ये, पर तुहांरिया आत्मा जो नीं मारी सकदे, बस तिस परमेशरा ते डरा सै जे तुहांरे शरीरा जो कने तुहांरिया आत्मा जो नरका च पाईने खत्म करी सक्कां। 29चिड़ियां रे बारे च सोच्चा, इन्हांरी कीमत इतणी घट इ भई इक्की पैसे च दो खरीदी जाई सक्कां इयां, फेरी बी परमेशरा रिया मर्जिया बगैर तिन्हां बिच्चा ते इक बी नीं मरी सकदी, काँह्भई सै सब किछ जाणाँ। 30परमेशर तुहांरे जीवना री हरेक गल्ला री परवाह करां। सै ये बी जाणां भई तुहांरे सिरा पर कितणे बाल़ ये। 31इस खातर डरदे मता; सै तुहांजो बौहत जादा चिड़ियां ते बधीने मन्नां।”
यीशुये पर विश्वास
(लूका 12:8,9)
32“सै जे कोई माहणुआं रे सामणे बिणा डरे ये मन्नी लो भई हऊँ तेरा चेला, तां हऊँ बी तिस्सो स्वर्गा च रैहणे औल़े अहांरे पिता रे सामणे अपणा चेला मन्नी लेंगा। 33पर सै जे कोई माहणुआं रे सामणे मेरा चेला हुईने मेरा इन्कार करगा, तां माह बी तिसरा स्वर्गीय पिता रे सामणे इन्कार करना भई सै मेरा चेला नींआ।”
यीशुये रे औणे रा नतीजा
(लूका 12:51-53; 14:26-27)
34“ये नीं सोच्चा भई हऊँ धरतिया रे लोकां जो शान्ति देणे आईरा; हऊँ शान्ति देणे नीं, पर लोकां च झगड़े करवाणे आईरा। 35हऊँ त आया भई :
“ ‘बेटे जो तिसरे पिता ते,
कने कुड़िया जो तिसारिया मौआ ते,
कने बहुआ जो तिसारिया सस्सा ते लग करी दूँ;
36माहणुये रे बैरी तिसरे अपणे घरा रेई लोक हुणे।’
37“सै जे अपणे माता-पिता जो मेरते जादा प्यार कराँ, सै मेरा चेला बणने रे लायक नींये; कने सै जे अपणे बेटे या बेटिया जो मेरते जादा प्यार कराँ, सै मेरा चेला बणने रे लायक निआं; 38जे कोई मेरा चेला होणे रे नाते दुख सैहणे रे खातर कने मरने रे खातर बी त्यार नींये, तां सै मेरा चेला बणने रे लायक नींआ। 39सै जे माहणु अपणा प्राण बचाणे री कोशिश कराँ, तिसजो अनन्त जीवन नीं मिलणा; कने सै जे मेरे खातर अपणा प्राण देआं, तिस प्रभुये सौगी अनन्त जीवन पाणा।”
ईनाम
(मरकुस 9:41)
40“सै जे तुहांजो ग्रहण कराँ, सै मिन्जो ग्रहण कराँ; कने सै जे मिन्जो ग्रहण कराँ, सै मेरे भेजणे औल़े जो ग्रहण कराँ। 41सै जे भविष्यवक्ते जो भविष्यवक्ता जाणीने ग्रहण करो, तां परमेशर भविष्यवक्ते जो सै जे ईनाम देआं तेढ़ा इ ईनाम तिस्सो देणा; कने सै जे धर्मिये जो धर्मी जाणीने ग्रहण करो, तां परमेशर धर्मिये जो सै जे ईनाम देआं तेढ़ा इ ईनाम तिस्सो देणा। 42कने जे कोई मेरे इन्हां भोल़े-भाल़े चेलयां चा ते किसी इक्की जो बी इस खातर इक गलास ठन्डे पाणिये रा देयो भई सै मेरा चेला, तां हऊँ तुहांजो सच्च बोलां भई तिस्सो इसरा ईनाम जरूर मिलणा।”
Zur Zeit ausgewählt:
मत्ती 10: KFSNT
Markierung
Teilen
Vergleichen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
This work is licensed under Creative Commons Attribution-ShareAlike 4.0 License.
