Chakruok Weche Motelo
Weche Motelo
Nyingni mar Chakruok wuok e dho jo-Yunani. Ma en kitabu mar chakruok mar gik moko, nikech owuoyo kuom chakruok piny duto, chakruok mar dhano kod chakruok mar jo-Israel.
Chakruok sula 1–11 wuoyo kuom chwech duto kod ji duto mochopo nyaka kinde mar Ibrahim. Gik moko duto mane Nyasaye ochweyo ne ber, makmana ji ariyo mane okuong chwe, Adam kod Hawa, ema ne ok omiyo Nyasaye luor, ma gikelo richo e piny. Ji nobedo joricho ahinya mano nomiyo Nyasaye ooro ataro mar pi mondo oneg ji duto makmana ngʼato moro ma nyinge Nowa kod joode ema notony. Nowa kod joode nolamo Nyasaye, omiyo Nyasaye nowachonegi mondo giger yie mangʼongo kendo malach mondo gin kaachiel gi le manok kod winy otony ni ataro maduongʼ mar pi. Bangʼ ka ataro mar pi noserumo, ji nomedo landore e piny, kendo ji mangʼeny noweyo lamo Nyasaye.
Chakre sula 12–50, otingʼo sigand Abram kod joge. Nyasaye noyierogi mondo gibed chakruok mar joge mogeno. Nyasaye noloko nying Abram obedo Ibrahim, kendo noloko nying Sarai, chi Abram, obedo Sara. Ibrahim kod Sara chiege, ne onge nyithindo, to Nyasaye nosingorenigi ni gibiro yudo nyathi kendo ni nyikwagi e kinde mabiro nobed gi pinygi owuon kendo ginibed gweth ni pinje duto.
Ibrahim kod Sara nodar modhi Kanaan, ma en piny ma Nyasaye nosesingore ni nomi nyikwagi. Ibrahim kod Sara nonywolo wuowi, miluongo ni Isaka, kane gisebedo joma oti. Bangʼe Isaka nonywolo yawuowi ariyo, Jakobo kod Esau. E giko mar kitabuni wayudo ni Jakobo nonywolo yawuowi apar gariyo kendo anywolagi odak e piny Misri. Josef, ma en achiel kuom owetegi, nobedo jatelo maduongʼ e piny Misri. To Josef nongʼeyo ni chiengʼ moro achiel Nyasaye biro chopo singruok mane owacho ni joge. Ma e singruogno:
Eka Josef nowacho ne owetene niya, “Koro achiegni tho. To Nyasaye biro resou kendo golou e pinyni mi oteru e piny mane osingore ka okwongʼore ne Ibrahim, Isaka kod Jakobo.”
(50:24)
Jandiko
Musa
Kar Ndiko
Mesopotamia
Kinde Mag Ndiko
Higa mar 1450–1410 kapok onywol Kristo
Weche Manie Kitabuni
Sigand Chwech (1:1–2:25)
Chakruok mar richo kod nyikwa Adam kapok ataro mar pi obedo (3:1–5:32)
Nowa kod ataro mar pi (6:1–9:29)
Nyikwa Nowa kod kar ngʼicho motingʼore gi malo mar Babel (10:1–11:32)
Ngima mar Abram (12:1–25:18)
Isaka kod joode (25:19–26:35)
Jakobo kod nyithinde (27:1–36:43)
Ngima mar Josef (37:1–50:26).
Zur Zeit ausgewählt:
Chakruok Weche Motelo: MLM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Muma Maler Mar Nyasaye, Motingʼo Loko Manyien™
Weg Loko © 1980, 2002, 2003, 2020 otim gi Biblica, Inc.
MItiyo kode gi thuolo moa kuom Biblica, Inc. Biblica, Inc. nigi ratiro duto e piny mangima.
Holy Bible, New Luo Translation™
Copyright © 1980, 2002, 2003, 2020 by Biblica, Inc.
Used with permission. All rights reserved worldwide.