2 Amadapụ 6
6
Kumbu-sịḅị Mẹ Ḍọkị paka-ḅo Ḅara Mẹ
1Gbọrụ sakị ḅụ Ịlayịsa ḍikiḍikiarị ịkịankoroapụ ma nwẹnị ọ̀ ḅẹẹ, “Wa sime tẹ ị́ wa ḍikiḍikiarị anga mẹ wamịna aḅụụ ịrụ ḅakam 2Yee wa Jodanị mu tẹ wamịna aḅụụ gbọrụḅọ-gbọrụḅọ anịanga sịn gbọrụ ḅiri gbọrụ ḅiri pẹlẹ ḅo tẹ arị kẹ gbọrụ anga ḅụ warị nama tẹ anịanga anga.”
Ịlayịsa nwẹnị pakịrị, “Ó muu.”
3Ịna ḅụụ ḅẹ gbọrụḅọ nwẹnị ḅẹẹ, “Sisi ị́ afịrịmẹnjịapụ ma na sọ tẹ muu.” Ọ̀ nwẹnị pakịrị “À mu ḅa.” 4Anieḅụ ọ̀ nwẹnị inina mu. Ịn ḅo Jodanị mẹ la tẹso, ịn nwẹnị opu asịn pẹlẹ-pẹlẹ-gbin. 5Kụma ini ḅẹ gbọrụḅọ gbọrụ opu sịn pẹlẹarị ogbo, ò kumbu mẹ sịḅị nwẹnị pịọnị minji mẹ ḅio siin-koro; tẹ ọ̀ nwẹnị oloku pakama, “yei, ị̀ sịḅịdaḅọ! Arị anị ḅii ḅom-o.”
6Anịtẹso Ịlayịsa nwẹnị gbela, “Anị tọ-anga koro?” Ori anị koro anga mẹ kẹ ò ḍie tẹso, ọ̀ nwẹnị gbọrụ kala sịn ikiḅa pẹlẹ ọkị tẹ kẹ anịanga ḅụ gbin su, tẹ mịẹtẹ ikulele mẹ nwẹnị foin paka. 7Ọ̀ nwẹnị ḅẹẹ, “Anị saakị ọkị” Anieḅụ ọ̀ nwẹnị ọ̀ ḅara sụn-pakama tẹ anị saakị ọkị.
Ịn Siriya Ḅẹ Ọmụ-ogbo Mẹ Nẹngịma Tẹẹ
8Sakị sakị ḅụ, Siriya ḅẹ amadaḅọ ḅe Izirẹlị na ọmụgbin-arị. Arị asakị ma ḅụ, ori ori afịrịmẹnjịapụ na ḅẹrẹ-ḅiya tẹ ḅẹẹ ḅa, “Nwẹn pembe anga ḅụ mie wa ọmụgbin akpụrụ-warị pike ḅarịye” 9Kụma ịn mị ḅara kẹ ḅẹrẹ-ḅiya sakị goyegoye, Ịlayịsa oku kẹ Izirẹlị ḅẹ amadaḅọ ḅe fịrịma tẹ ò ḅeri nụnụ tẹ ḅẹẹ ḅa, “Ị́ ḅụụ ẹbị tẹ nwẹn pembe anga ḅụ ḅọrọ ma, gbala Siriya ḅẹ apụ ideri anịanga muarị.” 10Izirẹlị ḅẹ amadaḅọ ḅe nwẹnị kịnị fịrịma mu ḅa, tẹ Ịlayịsa ḍuko ọ̀ pịrị anga mẹ ḍiki. Mie ọ̀ kẹ ịba-fị fị ọ̀ pịrị tẹ ori anịanga ḅụ tọnwa asakị kẹ ọ̀ ḅụụ ḅọrọma ḅara.
11Miemẹ gotẹ Siriya ḅẹ amadaḅọ ḅe ḅioḅẹngbọ nwẹnị gburo-gburo ḅara kẹ ọ̀ ḅụụ fụkama; tẹ ọ̀ nwẹnị ori afịrịmẹnjịapụ sịn tẹ ịn ḅẹẹ, “Ọ̀ wamịna aḅụụ sime Izirẹlị ḅẹ amadaḅọ ḅe pịrị ḅọ kẹ ì ḍie ḅịa?”
12Ori afịrịmẹnjịapụ ma ḅẹ gbọrụḅọ nwẹnị ḅẹẹ, “Gbọrụḅọ-sọ ofori, yei amadaḅọ, ị̀ nyanaḅọ; kụma Ịlayịsa, ịkịankoroḅọ ḅe tẹ Izirẹlị ḅụ simearị ḅọ ḅe mie í mono-ḅio ḅụ ị́ kọn ẹkwẹn kọn ẹkwẹn ḍuko kẹ Izirẹlị ḅẹ amadaḅọ ḅe pịrịarị ye.”
13Ọ̀ nwẹnị ḅẹẹ, “Ó mu ò sime anga ḍọkị nimii, mịẹtẹ à kịnị fịrịma mu ò kun-ḅo ḅẹ ḅara.” Ịn nwẹnị ḍuko ọ̀ pịrị, “Ḍikii, ò Dotanị ḅụ emi.” 14Anieḅụ ọ̀ nwẹnị asụ na, kirimẹnjị-ọmụarụ na, gburo-gburotẹ ọmụ-ogbo na kẹ fịrịma, tẹ ịn nwẹnị ḍin ḅụ ḅo opu ama mẹ ikelema-koro. 15Ịlayịsa fịrịmẹnjịḅọ dede-ḅio dede-ḅio saakị tẹ mẹnjị paka tẹso, ọ̀ nwẹnị ẹrị, ọmụ-ogbo asụ na, kirimẹnjị-ọmụarụ na kẹ opu ama mẹ ikelema-koro wararị. Fịrịmẹnjịḅọ ḅe nwẹnị ḅẹẹ, “yei, ị̀ sịḅịdaḅọ! Wa tọ-ḅara mịẹ ḅẹ?”
16Ịlayịsa nwẹnị pakịrị, “Ḅalafa ma, wamịnị na simearị apụ ini na emi apụ nẹngịm.” 17Anịtẹso Ịlayịsa nwẹnị tẹkẹ tẹ ḅẹẹ, “Yei KỊNỊNYANAḄỌ, arị ị̀ tẹkẹm ori atọrụngbọ ma finji mịẹtẹ ò ye ẹrị ḅẹ ḅara.” Anieḅụ KỊNỊNYANAḄỌ ḅe nwẹnị asambịrịma owiḅọ ḅe atọrụngbọ ma finji tẹ ọ̀ nwẹnị ye ẹrị; ḍikii, tụndụ mẹ ḅụ mẹmgba asụ na kọrị-fịnị ọmụgbin arụ na Ịlayịsa ikelema-koro wararị.
18Siriya ḅẹ apụ ma tuuideri-ḅo owu kẹ Ịlayịsa paka ḅẹ tẹso, ọ̀ nwẹnị KỊNỊNYANAḄỌ ḅe tẹkẹ tẹ ḅẹẹ, “Arị ị̀ tẹkẹm tọrụngbọ-pụụn kẹ mịna atomi ma fomuu.” Anieḅụ Ịlayịsa wẹrịtẹ tẹkẹ ḅara ọ̀ nwẹnị tọrụngbọ-pụụn kẹ ịn fomu. 19Ịlayịsa nwẹnị ịn ḅẹẹ, “Etela mẹ mie anị-a, mie pịkị opu ama mẹ-a; ọmịnị ì ḍuka ḅo, tẹ arị ọ́ kẹ ọ́ ḍọkịarị ḅọ ḅe ḍọkụma-mu.” Tẹ ọ̀ nwẹnị ịn ḅọrọma so Sameriya mu.
20Ịn Sameriya sọ-mu gbọrụ sakị, Ịlayịsa nwẹnị ḅẹẹ, “Yei KỊNỊNYANAḄỌ, mịna atomi ma atọrụngbọ ma finji, ịn ye ẹrị ḅẹ ḅara.” Anieḅụ KỊNỊNYANAḄỌ ḅe nwẹnị ịna atọrụngbọ ma finji tẹ ịn ye ẹrịm; tẹ ḍikii, Sameriya ogboku ḅụ mie ịn simearị ye.
21Izirẹlị ḅẹ amadaḅọ ḅe ini ẹrị tẹso, ọ̀ nwẹnị Ịlayịsa gbela, “Ị̀ ḍa, àrị ịn ḅaa mọ? Àrị ịn ḅaa mọ?”
22Ọ̀ nwẹnị pakịrị, “Ị́ ịn ḅaa ḅịa. Ị́yẹrị í okologie na ḍiein na kẹ kun-a apụ ma ḅaa ḅẹ? Fịye na minji na kẹ ịn pịrị ịn fị, pịkị ḅuu tẹ so ịna sịḅịdaḅọ ḍọkụma-mu.” 23Anieḅụ ọ̀ nwẹnị gburo-gburotẹ kopini afịaị tẹlẹma ịn pịrị; ịn fịaị ma fị tẹ minji mẹ ḅuu fama tẹso, ọ̀ nwẹnị ịn fịrịma tẹ ịn so ịna sịḅịdaḅọ ḍọkụma-mu. Anịsakị ḅụ ọkị tọrọkọ mu Siriya ḅẹ apụ ḅarị jen-maaịn kẹ mu Izirẹlị ḅẹ ama gbaịn tẹ fọịn-a.
Siriya Ḅẹ Apụ Owu Kẹ Sameriya Paka Ḅẹ Tẹ Anị Ikelema-koro Ye mẹ
24Sakị kẹlẹ ḅọrọ tẹso, Bẹnị-hadadị Siriya ḅẹ amadaḅọ nwẹnị ò bebe ọmụ-ogbo kobiri tẹ mu Sameriya ikelema-koro. 25Ḅụkọ-ịnụ nwẹnị Sameriya ḅụ paka, ịn wẹrịtẹ anị ikelema-koro ḅara ḅụ; nwenii yedogi-nama gbọrụ sịḅị seleḅa pakịrị inia si lam, gbọrụ kala agbakuru ḅin ḅarị nwẹẹrẹsị pọkụ-muye seleḅa sọnọa pakịrị lam.
26Izirẹlị ḅẹ amadaḅọ ḅe ama mẹ ikelema wararị onu mẹ ọgọnọ ḅụ mẹnjị-ḅọrọarị ogbo, gbọrụ ẹrẹḅọ nwẹnị oloku ọ̀ sịn tẹ ḅẹẹ, “yei, ị̀ nyana amadaḅọ, ḅarasụa ị̀ pịrịị!” 27Ọ̀ nwẹnị ḅẹẹ, “KỊNỊNYANAḄỌ ḅe ḅarasụa ị́ pịrị-a kụma, yẹrị tọ ḅarasụa nyana ị́ pịrị ḅẹ? Mgbọlụ-sẹlẹ-kiri mẹ ḅụ ḅo ye mụnọọ, iru mịẹ anga mẹ ḅụ ḅo ye?” 28Amadaḅọ ḅe nwẹnị á gbela, “Tiye ị́ ḅụụ fụkama?” Á nwẹnị pakịrị, “Ma ẹrẹḅọ ma ị̀ ḅẹẹm àrị ì owiḅọtụḅọ kẹ ḅo tẹ wa pẹị mịmgba, ḅaa ḅụ wa pịkị árị owiḅọtụḅọ pẹị ḅa. 29#Dit 28.57; Kur 4.10Anieḅụ wa nwẹnị ì owiḅọtụḅọ ḅe sọọ tẹ ọ̀ pẹị. Ene mẹ ḅa tẹso, à nwẹnị á ḅẹẹ, ‘Í owiḅọtụḅọ ọkị-ḅo mịẹtẹ wa ọ̀ pẹị ḅẹ ḅara’ kụma árị á tụḅọ ḅọị tẹẹ.” 30Amadaḅọ ḅe ẹrẹḅọ ma ẹkwẹn-ḅịḅị ma naa fama tẹso, ọ̀ nwẹnị ọ̀ kapa kan — mịọkụ onu mẹ ọgọnọ mie ọ̀ mẹnjị-ḅọrọarị tẹ tomi nwẹnị ḍiki tẹ ẹrị, ori akpa kẹ ò suku-ḅio ḅụ sụa wararị — 31tẹ nwẹnị ḅẹẹ, “Yee Tamụnọ ọkọ mịẹ tẹ pịkị ọkọ nẹngị ḅara sọ kẹ ị̀ mịẹ, Safatị owiḅọtụḅọ Ịlayịsa sịḅị mịmgba ori apana ọgọnọ paa gbana simem ḅẹḅẹ.”
32Ịlayịsa ọ̀ warị ḅio emi, tẹ omongiapụ ma na ori na lẹgị-sime wararị. Mị sakị mẹ amadaḅọ ḅe ọ̀ fịrịmẹnjị gbọrụ owiḅọ fịrịma tọrọkọ tọrọkọ mu tẹ; kụma tẹrẹmẹ fịrịmẹnjịḅọ ḅe ḅo la Ịlayịsa nwẹnị omongiapụ ma ḅẹẹ, “Ọ́ kọkọ ḅị nini-kọnḅọ ḅe kịnị kẹ fịrịma ḅo ị̀ sịḅị pẹlẹ-siin ḅẹ ḅoarị ḅara ẹrị tẹ? Ḍikii, fịrịmẹnjịḅọ ḅe ḅo la-la, ọ́ ḅọkọ mẹ gbaịn ọ̀ pịrị tẹ kụrọma anị ọlọ wẹrị. Ori ọḅụjụ fie ma ḅoarị aḅụọ ma anie ọ̀ sịḅịdaḅọ ḅe aḅụọ ma arị-a?” 33Ọ̀ paa ini na ẹkwẹn-arị ogbo fịrịmẹnjịḅọ ḅe nwẹnị ḅo ọ̀ la tẹ ḅẹẹ, “Miemẹ anie KỊNỊNYANAḄỌ ḅe ḅụ ḅo fomu-ḅara! À pịkị paa tiegotẹ KỊNỊNYANAḄỌ ḅe koru ḅẹ?”
(C) The Bible Society of Nigeria