लूका 3
3
ऱील सछैंज़्याव यूहन्ना
(मत्ती ३:१-१२; मर्कूस १:१-८; यूहन्ना १:१९-२८)
1माहाराजा तिबेरिअसए राज्या ओदोव पन्ध्र बर्स ओतावत पन्तियस पिलातस यहूदियालाव हाकिम उलिज़्याव। नो बेलाक हेरोद गालील खन्दलाव राजा उलिज़्याव। ओभाइ फिलिप ईतुरिया स़ोनो त्राखोनितिस खन्दलाव राजा उलिज़्याव, फरी लुसानियास अबिलेने खन्दलाव राजा उलिज़्याव। 2हन्नास स़ोनो कैयाफानी फरी ध्यान झ़िमलाव पुजारीराए याघेप्पानी निलिज़्याव।
नो बेलाक ज़ परमेस्वरए ओपाँ जकरियाए ओज़ा यूहन्नाए ओक्याँत हुके। नो मिँ बनल उलिज़्याव। 3हो बेलाकिन ज़ नोए मिँरालाई, “जेपापलाई ऱास्द, जेयुँ परमेस्वरए ल्योदा फर्कैद ऱील सछैंसिचिके। हो ताकिन ची जेपापर क्याल्सिद परमेस्वरस खैवर तान्या जेले,” है लिद सथैए सथैए यर्दन भै याक प़ाइँदा ज़ हुके। 4किताव यसैया अगमबक्ताए ओसरो, हो मिताव ज़ ताके। होए ओसरो आव ज़,
“बनल तोबोए ओर्गा अइ लिद यासथैरिज़्याव,
‘हुरिज़्याव प्रभुए ओयेम बनैद गाँत्या गुँतीलाई सदाँचिके।
5झेंःवर तैःद घैराल सब्याल्चिके, गाँत्या गुँतीलाई सदाँद काँ काँ कुँ कुँर सरिप्चिके।
6हाःकिन मिँ भरिए परमेस्वरनी बाँचैना हुवलाई रँःन्या जेले।’ ”#यसै ४०:३-५
7हो मिताव ज़ यूहन्नाए ल्योक ऱील सछैंसिना हुव माहोल्यारालाई, “ए घुलए ओथोर, जे परमेस्वरए उरिसनी धोंःन्या सुए है ओदाचिउ? 8जे साचो ज़ परमेस्वरए ल्योदा जेयुँ फर्कैन्या ल्यो ताकिन साचो हो मिताव य़ेन ब दाव ताके। जे फरी, ‘गेपुर्खा अब्राहामनी ज़ परमेस्वरए ओज़ार ताद गेले’ है जेमालिदी ब ताए। ङा साचो है ङादाचिज़्या, परमेस्वरए सींर लुँरानी तादी ब अब्राहामए ओथोर याजैधुव। 9किताव तोबो मिँए चाव सै माझाःज़्याव सींर धलैद मेंःल ओराख्याज़्याव, हिताव ज़ परमेस्वरए ब धलैन्याए जूँनी ओरोवा सींए ओजराक झाःद नैव।”
10हाःत ज़ नो माहोल्याराए, “हिताव ताकिन ते गे कै लिन्या ओताव?” है यादोक ते, 11यूहन्नाए, “जे जोस ऩेब्लो क्वा उलिकिन माल्योलाई तोबो ओयोक, स़ोनो ज़्याव उलिकिन माल्योलाई ब ओयोक,” है यादोक्यो। 12सिर्मा स्यो·ज़्यावर मनी सछैंसिना हुद, “गुर्बा, गे कै लिन्या?” है यादोक ते, 13यूहन्नाए, “जेलाई खा स्यो·न्या है दाद नैचिर, हाःज़ स्यो·च्यो, आगल्या ताराहाइच्यो,” है यादोक्यो। 14फरी सिपाईंराए पाला, “गे कै लिन्या?” है यादोक ते, यूहन्नाए, “जे कोभालाई सचे·द धुत खत लैद हाइद ताराज़्युच्यो। जेतलब खा लिज़्या हाःत ज़ लिच्यो,” है यादोक्यो।
15हाः बेलाक प़ाइँ मिँराए यूहन्नाए ओपाँ थैद, “आव ते आस दाद कींद गेनैज़्याव ख्रीस ची सा,” है लिकेर। 16यूहन्नाए नो यापाँ थैद, “ङा जेलाई ऱील सछैंज़्याव वाज़ ची। ङा ङाछींनी ङाकिन ओसक्ती ल्यो तोबो हुरिज़्या। ङा होए ओपोलाए ओच़ें पला·न्या स्यासो ब ङामाले। होए परमेस्वरए छैंव उपुरूस स़ोनो मेंःनी सछैंचिरिज़्याव। 17होए गेदा भरी नाङलील च्याप्द चाव भरी धन्सारल झाःद पुल भरिलाई खर्क ज़ माजिप्तिन्या मेंःल म़ुन्या ले।”
18इताव अर्थर कुधु ज़ झाःद यूहन्नाए मिँरालाई परमेस्वरए ओपाँ यासथैक्यो। 19हाः बेलाक राजा हेरोदए, ओभाइए ओज्या हेरोदियासलाई रैद ओनैज़्याव। यूहन्नाए, “नभाइए ओज्या नँ रैन्या माताए। नँ प़ाइँल ज़ माचाव य़ेन नदोज़्या,” है ओदोवए, 20यूहन्नालाई झ्यालखानाल झाःक्यो। है जैद हेरोदलाई पापए तर्त पाप चा·सिके।
येसु ऱील ओसछैंसिउ
(मत्ती ३:१३-१७; मर्कूस १:९-११)
21यूहन्ना झ्यालखानाल ओमाबाद मिँ भरी प़ाइँ यूहन्नानी यासछैंसिज़्याक येसु पाला सछैंसिके। येसु ऱील सछैंसिद ओपोंखारिज़्याक नम फैसिद, 22परमेस्वरए छैंव उपुरूस कुइतम मिताव भुर्हुद येसुए ओक्याँत च़ुसिके। हाःत ज़ नमतिन तोबो गा अइ लिद हुके, “नँ ङायुँलाव ङाज़ा ज़। नँलाई रँःद ङायुँ होलाँ ताज़्या।”#उत २२:२; भज २:७; यसै ४२:१
येसुए ओसाखा पुर्खार
(मत्ती १:१-१७)
23येसु ओय़ेनत उथूसिज़्याक तीस बर्सवाकाव ओल्यो। नोलाई मिँराए योसेफए ओज़ाल यागनिज़्याव।
योसेफए ओबाबु एली,
24एलीए ओबाबु मत्तात,
मत्तातए ओबाबु लेबी,
लेबीए ओबाबु मल्की,
मल्कीए ओबाबु यान्ना,
यान्नाए ओबाबु योसेफ,
25योसेफए ओबाबु मत्ताथियास,
मत्ताथियासए ओबाबु आमोस,
आमोसए ओबाबु नहूम,
नहूमए ओबाबु इसली,
इसलीए ओबाबु नग्गै,
26नग्गैए ओबाबु माथ,
माथए ओबाबु मत्ताथियास,
मत्ताथियासए ओबाबु सेमैन,
सेमैनए ओबाबु योसेख,
योसेखए ओबाबु योदा,
27योदाए ओबाबु योआनन,
योआननए ओबाबु रेसा,
रेसाए ओबाबु यरूबाबेल,
यरूबाबेलए ओबाबु सालतिएल,
सालतिएलए ओबाबु नेरी,
28नेरीए ओबाबु मल्की,
मल्कीए ओबाबु अद्दी,
अद्दीए ओबाबु कोसाम,
कोसामए ओबाबु एलमादम,
एलमादमए ओबाबु एर,
29एरए ओबाबु यहोसू,
यहोसूए ओबाबु एलीएजर,
एलीएजरए ओबाबु योरीम,
योरीमए ओबाबु मत्तात,
मत्तातए ओबाबु लेबी,
30लेबीए ओबाबु सिमियोन,
सिमियोनए ओबाबु यहूदा,
यहूदाए ओबाबु योसेफ,
योसेफए ओबाबु योनान,
योनानए ओबाबु एल्याकीम,
31एल्याकीमए ओबाबु मलेआ,
मलेआए ओबाबु मिन्ना,
मिन्नाए ओबाबु मत्ताथा,
मत्ताथाए ओबाबु नातान,
नातानए ओबाबु दाऊद,
32दाऊदए ओबाबु यिसै,
यिसैए ओबाबु ओबेद,
ओबेदए ओबाबु बोअज,
बोअजए ओबाबु सल्मोन,
सल्मोनए ओबाबु नहसोन,
33नहसोनए ओबाबु अम्मीनादाब,
अम्मीनादाबए ओबाबु आराम,
आरामए ओबाबु हेस्रोन,
हेस्रोनए ओबाबु फारेस,
फारेसए ओबाबु यहूदा,
34यहूदाए ओबाबु याकूब,
याकूबए ओबाबु इसहाक,
इसहाकए ओबाबु अब्राहाम,
अब्राहामए ओबाबु तेरह,
तेरहए ओबाबु नाहोर,
35नाहोरए ओबाबु सरूग,
सरूगए ओबाबु रऊ,
रऊए ओबाबु पेलेग,
पेलेगए ओबाबु एबेर,
एबेरए ओबाबु सेलह,
36सेलहए ओबाबु केनान,
केनानए ओबाबु अर्पसद,
अर्पसदए ओबाबु सेम,
सेमए ओबाबु नोआ,
नोआए ओबाबु लेमेख,
37लेमेखए ओबाबु मतूसेलह,
मतूसेलहए ओबाबु हनोक,
हनोकए ओबाबु येरेद,
येरेदए ओबाबु महलालेल,
महलालेलए ओबाबु केनान,
38केनानए ओबाबु एनोस,
एनोसए ओबाबु सेत,
सेतए ओबाबु आदम,
आदम फरी परमेस्वरनिकाव ओल्यो।
Zur Zeit ausgewählt:
लूका 3: NKham
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2015, Wycliffe Bible Translators, Inc. All rights reserved.
