लूका 2
2
येसु उजर्मिउ
1हो बेलाक तछा रोमी माहाराजा अगस्तसए रोमी राज्या भरिलाव जनसंख्या सर्न्या हुकुम याएक्यो। 2नो उस॰कताव यासरो जनसंख्या सिरिया खन्दलाव हाकिम कुरेनियसए ओपालाक ओल्यो। 3यामिन सर्सिना प़ाइँ ज़ सु सु यासाखा पुर्खार याजर्मिउ सहर सहरदा ज़ बाकेर।
4है जैद योसेफ पाला उलिज़्याव गालील खन्दलाव नासरतनी यहूदिया खन्दलाव बेथलेहेम यादोज़्याव दाऊद राजाए ओनाखारल उमिन सर्सिना बाके, काराव ल्यो ताकिन योसेफ दाऊदए ओथोलाव ज़ ओल्यो। 5ऩिद यानैज़्याव ओज्या मरियमलाई ब ओलस ज़ लाँक्यो। नो बेलाक मरियम गिसो क्याँस उलिज़्याव। 6बेथलेहेमल निलिज़्याक ज़ सुत्क्याल्नी तान्या बेला ताद, 7जेथा ज़ा दैक्यो। नो उजर्मिउ प़ाइँना ज़ दालए दाल्द बाछाराए छी ज़्यान्या पोल नैक्यो। भत्तील लिन्या पो निमादैवए गोथल निलिज़्याव।
परमेस्वरए ओचाकर्यार स़ोनो गावलार
8हो छ्याम रील नो नाखारकिन पाखाङ तोबो बाँल गावलाराए बेधार तबगाल खर्कैद यारानैज़्याव। 9हाः बेलाक ज़ परमेस्वरए तोबो ओचाकर्या उमँःजानी गावलाराए याल्योक सरैंःसिहुद परमेस्वरए ओज़गै ब प़ाइँदा ज़ ज़गै जैक्यो। नो रँःद बनै छे·केर। 10हाःत ज़ नो चाकर्याए, “जे ताछे·च्यो, ङा जेलाई बनै चाव था रैद नैद ङायाचिए। नो थात मिँ भरी बनै रेंन्या लेर। 11आछिम दाऊदए ओनाखारल इस्राएलीरालाई बाँचैन्या तोबो जर्मिद ले। नो जर्मिउ प्रभु ख्रीस ज़। 12जे नोलाई सरेस्न्या सरेस, नो भाउज़ालाई बाछाराए छी ज़्यान्या पोल दालए दाल्सिउ सेप्सिउ दैन्या जेले,” है यादोक्यो। 13हाःत ज़ नो चाकर्याए ओनैंर बनै माहोल्या हुद परमेस्वरए ल्योदा बनै खुसी ताद है लिकेर,
14“स्वर्गताव परमेस्वरलाई ज़गै मगै ओताक,
मानुवाताव उयुँलाव मिताव मिँराए यायुँ ब होलाँ ओताक।”
गावलाराए येसुलाई याचिऊनाव
15नो परमेस्वरए ओचाकर्यार स्वर्गदा याबाव छींनी नो बेधा गावलाराए या याल, “दे, गे बेथलेहेमदा गेबा, प्रभुए है ओदासिउ गेचिऊना,” है लिद, 16लाला लुलु नाखारल धोंःनाद मरियम स़ोनो योसेफनिलाई यारादैकेर। नो भाउज़ालाई ब बाछाराए छी ज़्यान्या पोल सेप्सिउ दैकेर। 17है जैद आव रँःद नो भाउज़ाए उजूँनी परमेस्वरए ओचाकर्याए है ओरादोव भरी है यारादोकेर। 18नो गावलाराए यापाँ थैव भरी प़ाइँ ज़ अचम्ब ताकेर। 19मरियम ते नो पाँ भरी उयुँल नैद खामिक्यो। 20नो गावलाराए नो चाकर्याए है ओरादोव मिताव याथैव यारँःवए परमेस्वरए उमिन सघ्योःद्याद ओल्योदा बनै खुसी ताद रेंए रेंए ओल्द बाकेर।
येसुलाई ध्यान झ़िमल यालाँव
21नो भाउज़ा उजर्मिउ आथ दिनत क्याल्न्या सरेस जैन्या छ्याम उमिन ब येसु नैदिकेर। नो मिन ओआमाए उफूल ओमासिर्जिद ज़ परमेस्वरए ओचाकर्याए नैद ओयो मिन ज़।#लेबी १२:३
22मोसाए ओकानुनलाव मिताव मरियम सुत्क्याल्नी चोखोइसिन्या बेला ओयो·वत यरूसलेमलाव ध्यान झ़िमल बाद येसुलाई परमेस्वरए उमिनत नैकिनी।#लेबी १२:६-८ 23परमेस्वरए ओकानुनलाव सर्सिउ मिताव, “ङ़ाताव जर्मिउ खेपा भरी परमेस्वरए उमिनत नैव ज़ परिए।”#प्रस १३:२,१२ 24हो छ्याम ज़ फरी ओआमा चोखोइसिन्याए जूँनी परमेस्वरए ओकानुन मिताव, कुइतम तादी ब परिवा तादी ब तोजोर लाँद चरैःव उपरिज़्याव। हो मिताव ज़ नोनी लाँद चरैःकिनी।
सेरो सिमियोनए ओपाँ
25हो बेलाक यरूसलेमल तोबो सिमियोन यादोज़्याव उलिज़्याव। नो मिँ चाव धर्मी मिँ ओल्यो। इस्राएलीरालाई बाँचैना हुन्यालाई कींव ज़ ओनैज़्याव। नोस परमेस्वरए छैंव उपुरूसए बास दाद ओनैज़्याव। 26नोए ‘परमेस्वरए ओज़ा ख्रीसलाई ङामारँःवा पै सिन्या ङामाले’ लिद परमेस्वरए छैंव उपुरूसनी सैंद ओनैज़्याव। 27है जैद तछा नोलाई परमेस्वरए उपुरूसए ध्यान झ़िमल लाँक्यो। हो बेलाक ज़ येसुलाई ब ओबाबु स़ोनो ओआमानी कानुन मितावनी परमेस्वरए उमिनत नैन्याए जूँनी ध्यान झ़िमल हुद यालिज़्याव। 28सिमियोनए नो भाउज़ालाई उरँःव प़ाइँना ज़ नोलाई ओघोइँल छींद अइ लिद परमेस्वरलाई धन्याबाद चरैःक्यो,
29“अ परमेस्वर, अब ते है नदाँव मिताव ताके।
अब ते आव संसारनी ङा ननोकोरलाई खुसीस बिदा नयाँदी ब ताए।
30संसारलाई बाँचैन्याए जूँनी नपरींव मिँलाई आव ङामीए ज़ ङारँःके।
31नोलाई प़ाइँ मिँराए याङ़ाक तयार जैद नराएके।
32छुत जातलावरालाई आवए ओक्याँनी ज़ नय़ेन सतैंद नराएरिज़्या।#यसै ४२:६; ४९:६; ५२:१०
स़ोनो नमीं इस्राएलीरालाई ब आवए ओक्याँनी ज़ याइज्यात नैद नराएरिज़्या।”
33येसुए ओबाबु ओआमानी सिमियोनए ओपाँ भरी थैद बनै ज़ अचम्ब ताकिनी। 34नकिन सिमियोनए नोरालाई असिक याद ओआमा मरियमलाई, “इस्राएलीराए याखार्ल आव भाउज़ाए ओपाँत कुधुए यायुँ त़ोल्रिज़्या, कुधुए यायुँ थ॰रिरिज़्या। परमेस्वरए आव भाउज़ालाई ओल ओसरेस मिताव जैद नैव। नोलाई कुधुए यामाभैंःज़्यावए, 35यायुँलाव पाँ भरी ननी ज़ रैंःरिज़्या। नयुँलाई पाला तरवालीए आनी हुनी सफेर्सिउ मिताव जैदींरिज़्याव,” है दोक्यो।
हन्नाए ओपाँ
36हो बेलाक ज़ ध्यान झ़िमल आसेरए ओथोलाव फनुएलए ओज़ा बनै जूचासो तोबो हन्ना यादोज़्याव मनी उलिज़्याव। नो ब अगमबादिनी ज़ ओल्यो। नोए रे ओदोव सात बर्सत ज़ ओरे सिद, 37चौरासी बर्स पै बिनु रे ज़ ध्यान झ़िमल लिद उपासिद लाकनी रील परमेस्वरलाई पोंखारिउ ज़ ओनैज़्याव। 38नोए ब येसुलाई उरँःव प़ाइँना परमेस्वरलाई धन्याबाद चरैःद यरूसलेम सहरलाव ‘गेलाई बाँचैज़्याव हुरिज़्या’ लिद कींद नैज़्यावरालाई येसुए उजूँनी हो छ्यामकिन सथैव ज़ यानैक्यो।
39योसेफ स़ोनो मरियमनी परमेस्वरए ओकानुनलाव ध्यान झ़िमलाव याय़ेन भरी ओखेमोत निझ़िम गालीललाव नासरतदा निज़ा लाँद बाकिनी। 40नो भाउज़ा घ्योःनाद ओर्सा ब ज़्यास्नाके, उबुद्धी ब छिप्नाके। परमेस्वरए ओअसिक ब ओक्याँत ज़ उलिज़्याव।
येसु बाह्र बर्स ओताव
41येसुए ओबाबु ओआमानी यरूसलेमलाव निस्तार पर्ब मानिन्याए जूँनी सालकाव तखेप निबाज़्याव।#प्रस १२:१-२७; ब्य १६:१-८ 42तछा येसु बाह्र बर्स ओतावत सालकाव याबाज़्याव मिताव ज़ फरी ब बाकेर। 43नो पर्ब भरी ओखेमोत याझ़िमदा याबाज़्याक येसु यरूसलेमल ज़ उरहिउ ओल्यो। ओबाबु ओआमानी मासैंकिनी। 44नोनी ‘गेनैंरास हुज़्याखेहो’ लिद तछाकाव येम भरी ज़ बाकिनी। छींनी यानैंराए ल्यो जीदा साप्द, 45निमादैक ते सापे सापे यरूसलेमदा ज़ ओल्द बाकिनी। 46स़ोंलात ध्यान झ़िमल घेप्पा घेप्पा धर्मगुरूराए खार्ल च़ुसिद यापाँ थैद ओअर्थ ल्यो पाँ तीद पलासो ओरापरींज़्याव रँःकिनी। 47नलाव थैज़्याव भरी येसुए उबुद्धीसकाव ओपाँर थैद प़ाइँ ज़ अचम्ब ताकेर। 48ओबाबु ओआमानी ब निताव रँःद अचम्ब ताद ओआमाए, “काराव ङाज़ा आः दुख नयासिनो? गिन नँलाई साप्द गिन्च्या सिके,” है ओदोक ते, 49येसुए, “जिन काराव ङालाई जिन्साप्नाज़्याव? ङा ङाबाबुए उझ़िमल ल्यो परिए लिन्या जिन्मासैंए रो?” है निदोक्यो। 50नोनी है उनिदोव पाँए ओअर्थ मातीधुकिनी।
51येसु ओबाबु ओआमानिस नासरतल बाद नोनी निपाँल ज़ लिके। ओआमाए आव पाँ भरी उयुँल खामिउ ज़ नैक्यो। 52येसुए ओर्सा ब छिप्नाके, उबुद्धी ब झन ज़ पुलुस्नाके। परमेस्वरए स़ोनो मिँराए बनै चाव ज़ रँःकेर।#१ समू २:२६; हितो ३:४
Zur Zeit ausgewählt:
लूका 2: NKham
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2015, Wycliffe Bible Translators, Inc. All rights reserved.
