SUAHTULNAK 5
5
Moses le Aaron Izipt Kumpi Mai Ah
1Moses le Aaron cu Izipt kumpipa i lakah, “Israel i Pathian in, ti hi; Ka mihingte cu phillawnah hawhin, keimah biaknak puai a bawl theihnak haw tukin tultik hen,” tin ti haw hi.
2“Na Topa cu akua kaw?” tin kumpi in ti hi. “Ita Topa i thu ngai in, Israel cu ka hawhtik tuk? Topa cu ka theihmi hei hi kha ma si; Israel cu tultik tuk mang,” ti hi.
3Moses le Aaron ten, “Hebru tei Pathian cu ka lak uhah phuangdun hi. Topa ka Pathian uh lak a, biakpiaknak ka bawl theihnak tukin, phillawnah ni thum sung hawh tukin hah zalin hi. Mahti bangin ka bawl uh ma ahi tale, do ngalin maw, natnakin maw, kohte cu that tuk hi,” tin ti haw hi.
4Kumpipa in Moses le Aaron lakah, “Na mihing uhte na phano in dek thei tuk ngawlin na vaihawm uh cu i na deihnak uh kaw? Hi sal hi a nadehnak hawah hawhtik un! 5Na mihing uhte hi Izipt mi sangin tam saw zo haw hi. Atu-in nadeh cawltik nuam uh ci!” tin ti hi.
6Mah ni-in, kumpi in Izipt mi sal khawngtu le Israel mi nadektu tei hotu lakah thupia in: 7“Ukkhe bawlnak tukin hampa ko pia toh pahsuh un; amuhno in hamko zei cawm haw hen. 8Mahnaven ukkhe cu tumasuan a, a bawl zah haw lengin bawltik un; pa khat mah kiam hihim pahsuh un. Nadeh tuk tam a neih haw ngawl hangin, Pathian nelah biakpiaknak bawl tukin hawh tuk ung, tin a tihnak haw cu na hi! 9Hak saw deuh le tam dedeuhin dektik un. Zolthu bek a sontu tei thu ngai ngawlin a nadeh haw teima saw haw hen,” tin ti hi.
10Sal khawngtu le Israel mi nadek hotu tei lakah hawhin, “Kumpipa in, hamko pia tukma toh ing; 11na muhnak pawpoh uhah zei in, la un; mahnaven ukkhe cu na bawlmek uh zah lengin bawl un, ti hi,” tin hilh haw hi. 12Mah hangin Israel mite cu hamko zei in, Izipt ngamah vak kawkawi haw hi. 13Sal khawngtu ten nawt nawnawm haw in, “Hamko a piak haw laihin, ni khat sung a, na bawl mek uh zah leng ni khat sungin na bawl uh kul,” ti haw hi. 14Izipt mi, sal khawngtu ten Israel nadeh hotu vatin, dehvo pia sesem haw hi. “Ita tumasuan a, ni khat sung a, na bawl mek uhmi ukkhe cu atu-in bawl thei ma uh cim?” tin liatnek haw hi.
15Israel mi nadeh hotu ten kumpipa lakah hawhin, “Ita na sal hi ti bang lawlawmin, na bawl? 16Hamko pia ma toh ci; mahnaven ukkhe bawl tuk thupia leng ci! Mah hum pen vah tianin tawk ung. Na mihingte khial hihim haw,” tin phu haw hi.
17Kumpipa in, “Noh hi thazawng uh ci, nadek na nuam ngawl uh hang, ‘Hawh tuk ung a, Topa i lakah biakpiaknak bawl tuk ung,’ tin ti uh ci. 18Mah hangin atu loliah na nadeh uh pan un! Hamko demno hei piak hi tukma uh ci; mahnaven ukkhe cu na bawl tuk zah uh bawl leng un,” ti hi. 19Israel mi nadek hotu ten, “Na bawl mek uh zah leng nisialin ukkhe bawl un,” tihmi thu a theih haw ten, haksa tatak hung hei, tih theidun haw hi.
20Kumpi lak pen tulin, amuh ngak lengtu Moses le Aaron tawk haw hi. 21Moses le Aaron tei lakah, “Kumpipa le a khutnuai bawi tei huatnak tukin na bawl uh hangin Topa in cawh zal tahen. Keimuh thahnak tukin thu bawl uh ci,” tin ti haw hi.
Moses Thungetnak
22Moses cu Topa i lakah hawhlehin, “Topa itakaw hi Israel tei humah haksatnak na hentik? Ita hi laiah kei hah nge cim? 23Nangma ai-awhin kumpi lakah ka hen bek ten na mihingte hi bawlsia li zo hi. Nangin tale amuh pantul tukin imah bawl sih ma ci,” ti hi.
Zur Zeit ausgewählt:
SUAHTULNAK 5: NBF1
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Ngawm Bible © Bible Society of Myanmar, 2014.
