Roma 10
10
1Mga kalomonan ko, dakowa yang karim ko na yang mga kapag-onawa ko na Yahodi amalowas aw amasorga. Aw yan sagaw yang pyagapangayo ko sang Tohan. 2Makapangimunna ako na bara-ibada silan, awgaid yang pagpangagad nilan sang Tohan wa pagasobay sang insakto na pama-agi. 3Kay wa silan akatigam daw ono yang pama-agi ng Tohan na amponon aw atarimaun nan yang manosiya na matorid. Sabap sinyan ininang nilan yang sarili nilan na pama-agi, aw wa silan apangagad sang pama-agi ng Tohan. 4Wa silan akasabot na sabap sang Almasi yatoman aw yatapos da yang Hokoman.#10:4 Yang mana ng sabap sang Almasi yatoman aw yatapos yang Hokoman na sokad sang pagdatung ng Almasi aw sabap sang pagkamatay nan para sang dosa ng manosiya, yamaklaro na yang pagpangagad sang Hokoman dili ng pama-agi untak tarimaun ng Tohan yang manosiya na matorid. Agaw, sino-sino yang yagapangintoo kanan amponon ng Tohan aw atarimaun nan na matorid.
Yang Kalowasan para sang Kariko ng Manosiya
5Maynini yang syorat ni Nabi Mosa makapantag sang mga otaw na ma-inang ng matorid sabap sang pagpangagad sang Hokoman, laong nan, “Sino-sino yang matoman sang kariko ng mga sogowan sang Hokoman, amabowi.”#10:5 Yani na ayatan yakasorat sa Kitab Tawrat, Pangibada 18:5. 6Awgaid maynini yang yakasorat sang Kitab makapantag sang mga otaw na ma-inang ng matorid sabap sang pagpangintoo, laong nan, “Ayaw kamo pagdumdum na kinaanglan na aon komadto sang sorga,” mana nan untak pakaniun yang Almasi. 7“Ayaw oman kamo pagdumdum na kinaanglan na aon manaog adto sa saad ng lopa,” mana nan untak kamangun yang Almasi sikun sang mga patay. 8Kay yakasorat sang Kitab, “Yang Pyaglaongan ng Tohan masaid kammo kay iyan yan sang baba mo aw sang pangatayan mo.”#10:8 Yani yang yakasorat sa Kitab Tawrat, Pangagama 30:14. Na, yani na pyaglaongan makapantag sang pagpangintoo kang Isa Almasi, aw idto yang pyaga-osiyat nami. 9Kong magalaong kaw na si Isa yang Tagallang, yang Dato na Labi na Mabarakat, aw iklas yang pagpangintoo mo na byowi oman yan ng Tohan, amalowas kaw sikun sang mga dosa mo aw amasorga kaw. 10Kay amponon aw atarimaun ng Tohan na matorid yang sino-sino na iklas yang pagpangintoo nilan. Aw sabap sang paglaong nilan na yagapangintoo silan, amalowas silan. 11Kay yagalaong yang Kitab, “Sino-sino yang yagapangintoo kanan, di akamomowaan.”#10:11 Yani yang yakasorat sa Kitab Tawrat, Nabi Isayas 28:16. 12Yani na pasad para sang kariko ng manosiya, Yahodi aw dili ng Yahodi, kay way pyagabidaan nilan sa adapan ng Tohan. Sambok gaid yang Tagallang ng kariko aw yan yang yaga-atag ng kadyawan sang maskin sino na yagapangayo-ngayo kanan. 13Kay yagalaong oman yang Kitab, “Sino-sino yang yagasampit ng Tagallang, amalowas.”#10:13 Yani yang yakasorat sa Kitab Tawrat, Nabi Yowil 2:32.
14Awgaid monono da yang pagsampit nilan sang Tagallang kong wa silan apangintoo kanan? Aw monono da yang pagpangintoo nilan kanan kong wa silan pakadungug ng makapantag kanan? Aw monono da yang pagkadungug nilan kong way magapayapat kanilan? 15Aw monono da yang pagpayapat ng mga otaw kong way syogo? Awgaid aon mga syogo ng Tohan kay aon yakasorat sang Kitab na yagalaong, “Madyaw yang pagdatung ng mga yagapayapat ng Madyaw na Gogodanun.”#10:15 Yani yang yakasorat sa Kitab Tawrat, Nabi Isayas 52:7.
16Awgaid dili ng kariko ng mga otaw yadawat ng Madyaw na Gogodanun. Kay yagalaong si Nabi Isayas singaon, “Ya Tohan, tagbi gaid yang mga otaw na yagapangintoo sang pyapayapat nami.”#10:16 Yani yang yakasorat sa Kitab Tawrat, Nabi Isayas 53:1. 17Awgaid maskin maynan, makapaglaong kita na amangintoo yang mga otaw kong madungug nilan yang Madyaw na Gogodanun. Aw untak madungug nilan yang Madyaw na Gogodanun kinaanglan na aon yagapayapat kanilan ng makapantag sang Almasi.
18Na, aon paga-osip ko kamayo. Yang mga bangsa Israil na wa apangintoo sang Almasi, wa silan pakadungug ng makapantag kanan? Yakadungug silan! Kay aon yakasorat sang Kitab na yagalaong,
“Yang sowara ng mga magpapayapatay yadungug ng kariko ng mga banwa.
Yang pyaglaongan ng Tohan pyapayapat sang tibok donya.”#10:18 Yani na ayatan yakasorat sa Kitab Jabor 19:4.
19Maga-osip oman ako, “Basin wa silan pakasabot sang pyagadungug nilan? Na, di mapakay na wa silan pakasabot! Kay aon syorat ni Nabi Mosa na pyaglaongan ng Tohan makapantag kanilan, laong nan,
“Amasina kamo ng mga otaw na dili ng sakop ko.
Amadaman kamo sabap ng ipakita ko yang looy ko sang mga dili ng Yahodi na wa akilaa kanak.”#10:19 Yani yang yakasorat sa Kitab Tawrat, Pangagama 32:21.
20Aw wa oman akalluk si Nabi Isayas maglaong daw ono yang pyaglaongan ng Tohan makapantag sang mga dili ng Yahodi, laong nan,
“Kinita da ako ng mga otaw na wa apanganap kanak.
Aw maskin wa silan paga-osip makapantag kanak, pyatigam ko kanilan daw sino ako.”#10:20 Yani yang yakasorat sa Kitab Tawrat, Nabi Isayas 65:1.
21Awgaid makapantag sang mga bangsa Israil yani yang pyaglaongan ng Tohan na syorat ni Nabi Isayas,
“Sang kadogay ng panahon yagatagad ako na domood silan kanak.
Awgaid matigas yang oo nilan aw wa silan apangagad kanak.”#10:21 Yani yang yakasorat sa Kitab Tawrat, Nabi Isayas 65:2.
Zur Zeit ausgewählt:
Roma 10: KI
Markierung
Kopieren
Vergleichen
Teilen
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2012, Wycliffe Bible Translators, Inc. All rights reserved.
